Read Wancho Naga 1 Pukax-Pangao 14 Bible Online

1 Pukax-Pangao 14 - Wancho Naga bible

1 Pukax-Pangao 14

¹Tair wanghompa Hiram-e Dawid hato thalex-juatai mwot akat; chixe Dawid ang sedar pün, long zingpabu hia pün zingpabu wanghom homzai alai angkya hanpakmale kox.

²Dawid-e chix a Israel nok ma wanghom ang JOWANPA tokhange achangdaoale awanle hüi. Chixe khünaknu hanpakma chix wangting a tüle ahak-aluakya wangting tuita ang achang.

³Ikhato, Jerusalem ma Dawid-e sheko obi-obi lax ilaxle chix sasün hia sacha hwom huanuma puxpaile chang.

⁴Naosom ibibi a chix ang Jerusalem ma puxpaile alai: Shammua, Shobab, Nathan, Solomon,

⁵Ibhar, Elishua, Elpelet,

⁶Nogah, Nefeg, Jafia,

⁷Elishama, Beliada, ilaxle Elifelet hwom bibi.

⁸Chemtue Filistia noke, athaxpi Dawid a Israel haxtok pangnu hanpak ang wanghompa ang zingdaoale atatpuix, chix kop angkya hanpakma hwom süpahibu apao. Ikhoma Dawid a hwom füi apong ang lai.

⁹Filistia nok a Refraim haxsha to ngui ilaxle tuinabu tsuile pao.

¹⁰Dawid-e Zang ma atüi: “Kue Filistia nok to chising hia singüi? Nange ku ang lüt ang tom ang cha?” JOWANPAe lan: “Khax-a singkox! Kue nang ang lüt ang tomüihex!”

¹¹Ikhoma Dawid-e Bal Perazim ma hwom to sing ilaxle lüt. Chixe thüi: “Zan nok süpahibu omong ahakle tichen ningle le ang Zang-e ku twon” Ikhoma ikha ang Bal Perazim le nyak.

¹²Filistia nok zikle paoüima, hwome chapabu danle tox, ikhoma Dawid-e ibu zokle ashun angkya kax kox.

¹³Lebama wüi, anaolechu ija haxsha to chat ilaxle Filistia noke jali thomjole chang ang süt.

¹⁴Anaole chu Dawid-e Zang ma kaxtik. Chixe lan: “Hwom to imakhange taxsing, ikoxle akwonle le üntoxle mamachi, balsam pünbu tüikya zui makhange singlax.

¹⁵Chemtue hünzome pünkho to zankat zing atatle changüihex, ipongma singkox; chemthüikoxle Filistia nok to lüt ang nang tho to achale ku leüi.”

¹⁶Zang kaxtom ningle Dawid-e mok, ikhoma chixe Gezer lomjang fole Gibeon angkya Filistia nok jwonle achat ang tho.

¹⁷Dawid zangzing pangnu chito fuale pao, ilaxle JOWANPAe chaxwan pangnu nok towüi chix thua zale chang ang tom.