Read Wancho Naga 1 Pukax-Pangao 16 Bible Online

1 Pukax-Pangao 16 - Wancho Naga bible

1 Pukax-Pangao 16

¹Hwome ija Suak a, Dawid-e dannui achwonle thomkya khama dan angkya nyihom to anop. Ifüima hwome zangjang tö hia tumüi tö Zang ang kox.

²Dawid-e ija tö koxkya shukle changkya füima, chixe JOWANPA mün ma khünaknu to mohiman,

³ilaxle hwom pangwüi ang sütlingbu asüt. Chixe Israel khünaknu, sheko hia lüka pangwüi ang, an khaopong, atsanle akokya müi dwonpong ilaxle fupsa zan hidaopong kox.

⁴JOWANPA Tsaotsüt Suak tunthoma tsai-lwom ngaokya füi chix achuak-achenle zangshwom angkya mwottho lomzun ang Dawid-e züizüi Liwi hwom zünle kop.

⁵Asaf a lompa ang, ilaxle chix to fong ang Asaf hia chix fang angkya Jeiel, Shemiramoth, Jehiel, Mattithiah, Eliab, Benaiah, Obed Edom, hia Jeiel hwom a thuaput waxmaibu müt ang kam. Asaf a khopsya akhaole angao angkya mix changkya,

⁶ilaxle nguapa anyi, Benaiah hia Jahaziel nyi a, Tsaotsüt Suak tunthoma chithaile nyazong müt angkyabu changkya.

⁷Dawid-e, JOWANPA achuakle tsailwom ngao angkya pongwang ma Asaf ang kox ifüima JOWANPA achuakle tsailom zunkya tsaipabu ang kox.

⁸JOWANPA ang münchong fakox, chix chongkya apuk-kox; zangfang hato chix mwot bama apuk-kox.

⁹JOWANPA achuakle tsai ngaokox; chixe mokdaokya ohünotün mwot mo wünkox.

¹⁰Mongmüikox kem a chix kux changle; chix to shwomkyabu pangnusa mongmüikox!

¹¹Fong angkya lomle JOWANPA hato nguikox, ilaxle chizakle chix to shwomkox.

¹²Hünzom, JOWAN dapa Jakop sixli hwom, Zang-e zünle kopkya Israel sixli hwom, Zang-e mokkya ohünotün mwotbu texle ataklax tamchu chixe koxkya kaxfün bama a.

¹⁴JOWANPA kem Zang changpu; chix kaxtsaobu a chaxwannu pangnu hanpak changle.

¹⁵Zang kaxtsaobu otuechu taxalak, ija chixe jento ngo ang zingkya changle,

¹⁶Abraham füi atsaokya chix kaxtsao, Isak füi chixe saxkya tsaosüt.

¹⁷JOWANPAe Jakop füi tsaotsüt, ija tuita jento ngo angkya hanpak changle.

¹⁸Chixe thüi: “Kue nang ang Kanan haxtok koxüi. Ija a nang kux ang changüi.”

¹⁹Zang khünaknu a alüile chitüikya, Kanan haxtok ma wünpa tuita ang ngo.

²⁰Onok tuita tokya ata nok to hwom aham, tuita wangting makhange ata wangting to a.

²¹Zang-e hwom to owa angchu athak ang chitom; hwom kho awa ang, chixe wanghombu ang kaxkhün kox:

²²“Kue zünle kopkya ku dabu to chak taxmok; ku ajebu to taxpo.”

²³Chaxwannu pangnu, JOWANPA hato tsai ngaokox! Chixe kem khosünkya kaxho omüi nyixfo to apuk-kox.

²⁴Chaxwannu nok hato chix fuazang apuk-kox, apuk-kox khünaknu hato chongkya chix mwotbu a.

²⁵JOWANPA a achongkya le achuak angkya wüi, baozang pangnu thakma chix thua za angkya wüi.

²⁶Chaxwannu nok baozangbu a chapa wüi changle, ikoxle JOWANPAe zangkhotingbu zing.

²⁷Fuazang hia wang chongkya chix akhople, tsak-zong hia mongsome chix Zangshwom-Hom awang.

²⁸JOWANPA achuak kox, chaxwannu khünaknue, chix fuazang hia tsak-zong achuak kox.

²⁹JOWANPA fuazangkya mün achuak kox; tö apüikox ilaxle chix Zangshwom-Hom to nguikox. Chix ngai pongma Otsaopa tunthoma akhux kox;

³⁰chaxwannu pangnu, chix tunthoma abünle! Chaxwannu a oting ma sütle dan thomle, ija münamok.

³¹Mongmüikox, chaxwannu hia zangdingkho! Chaxwannu hama wünkox chix a JOWANPA a wanghom le.

³²Molo-Tinu hia ima tüikya zünmokbu, akhong kox; haxtok hia ima tüikya pangwüi mongmüikox!

³³Faokha tokya pünbu mongmüile akhong chaxwannu to apün ang JOWANPA nguipongma.

³⁴JOWANPA to münchong fakox, chix a müile; chix mongkün ma oshuk müntüi.

³⁵Chix ang thüikox: “Kwom khosün hüi, O Zang kwom khosünpa; kwom asox atomhüi; mixnokbu chak tokya kwom azün hüi, ikoxtix kwom münchong fakya füi tamchu nang otsao mün achuakkya füi ngo ang.”

³⁶JOWANPA achuak kox, Israel nok Zang a! Athax hia jento chix achuak kox! Ifüima noknue thüi: “Amen, JOWANPA achuak kox.”

³⁷Tsaotsüt tunthoma zangshwomle changpongma jento humele chang angkya hanpakma wanghompa Dawid-e Asaf hia hozui Liwi hwom ang mwot koxle thom. Hwom ang ikhama nyixfokya to hwom mwot mok ang tom.

³⁸Jeduthun sasün Obed Edom ilaxle hwom saxthom angkya 68 khünaknue chix to fong. Hosah hia Obed Edom nyi a zünkai nyetmixbu to hukya mixbu changkya.

³⁹Nguapa Zadok hia hozui zompu-zangpabu a, Gibeon ma JOWANPA to shwomkya mwot to hu angkya khünakbu changkya.

⁴⁰Wanlom ma JOWANPAe Israel nok ang koxle thomkya ningle, ja-nop to hwome ikhama otom ma lanle zokle ashunle tö kox angkya changkya.

⁴¹Ikhama hwom füi tomle Heman hia Jeduthun ilaxle oshuk chitüikya chix mongkün hanpakma JOWANPA achuakle tsai ngao ang tamsüile zünle thomkyabu tüikya.

⁴²Heman hia Jeduthun nyi a Zang achuakle tsai ngaopongma thuaput waxmai hia mama nyazong ilaxle khopsyabu twon angkya mwot to akhi angkya chuwüi hünlit laxkya nyi changkya. Jeduthun saxthom angkya khünakbu a fülom nyetmixbu to akhi angkyabu ang kam.

⁴³Ifüima pangnusa hom to pao, ilaxle Dawid chu hwom homkha füi hanpak hidaole nui ang hom to chat.