Read Wancho Naga 1 Pukax-Pangao 17 Bible Online

1 Pukax-Pangao 17 - Wancho Naga bible

1 Pukax-Pangao 17

¹Ipong Dawid a chix homlo ma ngole tüikya. Nyixta chixe ajepa Nathan se ang apaole thüi: “Ku ikhato sedar pün füi zaikya hom ma ngopu, ikoxle JOWANPA Tsaotsüt Suak a tuita Nyihom ma thomtüi!”

²Nathan-e lan: “Nang mong ma chem hüipuix ija moklax, chemthüikoxle Zang a nang füi tüile.”

³Ikoxlechu ija ja Zang-e Nathan ang thüi:

⁴“Kue ile akaxle le thüikox: Ku ngo angkya hanpakma ku ang Zangshwom-Hom zai angkya a nang münchang.

⁵Kue Israel khünaknu Ijip nok tokya azünkya nyix makhange anyix kopkya mong ma, ku a Zangshwom-Hom ma otuechu mango; ku a nyihom ma chex-chexle ngole hüipu.

⁶Israel khünaknu füi ku ipongpongle ahamle hüipu, ikoxle ku ang sedar pün füi Zangshwom-Hom zaile fa angkya lompa khama owachu kue münkam.

⁷“Idaile ku dapa Dawid hama, Khüthak Zang-e chix füi ile akax tüiale thüikox, ‘Kue nang a zimfa to chun nyele ngokya kha tokya alailaxle ku khünaknu Israel nok lompa ang zingle danpu.

⁸Nang apaopao khato ku a nang füi ngole hüipu, ilaxle nange single changpongma nang zanpabu pangwüi to kue nang ang wüi lüt ang tompu. Kue nang a chaxwannu ma achongkya lompa tuita ningle tüle nang zang fuale chang ang tomüi.

⁹Kue, ku khünaknu Israel nok hanpakma onui kamdaoa ilaxle hwom ima tingtan-nokzingle ngo ang tomdaoa. Ikhato hwom a mix fang to mün-ngoüi. Ija haxtok to hwom nguikya füi shemle hwom zongto changnong pünthomle tüikya khünakbue sing, ikoxle athax ija chatle ile münchang toxüi. Hünzom zanpabu pangwüi to anaolaxle hünzom ang simüi-limüile chang angkya kue tsaopu.

¹¹Chemtue hünzom zilaxle hünzom pupa hwom füi tomle akhünle changüihex, kue hünzom sasün hwomkha angkya tuita wanghom ang zingüi, ilaxle chix wangting a huanuma tsak-zong füi ngo ang tomüi.

¹²Ku hanpakma Zangshwom-Hom zai angkya a chix tix changüi. Kue thüipu, chix wangting a othuithuima ngo ang tomüi.

¹³Ku a chix hopa ang ngoüi ilaxle chix a ku sasün ang ngoüi. Sol awütkya ningle kue chix to fongkya otuechu awütle münchangüi. Nang wanghom ang achang angkya kuxma kue chix awütpu.

¹⁴Kue chix a ku khünaknu hia ku wangting ma hopupa ang achangüi, ilaxle chix wangting ma oshuk müntüitoxüi.’”

¹⁵Zang-e chix hama angaikya pangwüi Nathan-e Dawid hama ngaile kox.

¹⁶Ifüima Wanghompa Dawid a JOWANPA Ngwotnui Nyihom to pao, ikhato thung, ilaxle zangjop: “Nange ku to chempang changdaopuix ibu hanpakma ku ojao asule chitüikya. JOWANPA, ku homkha jaojao nguiwangle chitüi.

¹⁷Ikoxle athax ito kaile nange mokngopu; athax füichi ma ku sixli hwom kuilole chang angkya bama nange tsaosaxpu, ilaxle JOWANPA, nange athaxchu ku to tuita alixachong tukuxle e-sele hüipu.”

¹⁸Kue iboma nang füi chemle wünüi! Nange ku abakle awan ngopu, ikoxlechu ku nang dapa nange achuak-achen ngopu.

¹⁹Ku to ile chang angkya nang mongtex üntoxle mwottho tamchu ku chongkya ku hama aho ang, ibu a nang mongtex changkya.

²⁰JOWANPA nang lailaikya owachu müntüi; jento kwome awan ngopu, Zang a nang tata wüi.

²¹Chaxwannu ma Israel nok lailaikya nok mama müntüi. Israel nok a da ang ngokya nange sünle koppu ilaxle nange hwom a nang khünaknu ang zingpu. Nange hwom hanpakma chongkya hia ohünotün mwot mokle hüikya füi zangfang pangnok-jating to nang zangkya mün fuale tüile. Nange nang khünaknu Ijip nok tokya khosünpu ilaxle hwom nguikya füi tomle, ija haxtok angkya mixnokbu pangwüi jwonle apaopu.

²²Nange Israel khünaknu a jento nang khünaknu ang achang üntoxle JOWANPA, nang a hwom Zang ang achangpu.

²³“Ilaxle athax, O JOWANPA, othuithuima ku hanpakma tamchu kusix-kuli hwom hanpakma tsaosaxkya nang tsaosüt changle ngai ang tomkox, ilaxle nange chem moküile thüidaopuix ija mokkox.

²⁴Nang mowün tüle chongle paoüi, ilaxle khünaknue jento thüiüi, ‘Pangnusa to lütkya Khüthak Zang a Israel nok Zang changle.’ Ilaxle nange ku wangting othuithuima sünle thomüi.

²⁵Kue nang to ija zangjop jop ang mongchongpu, Ku Zang, chemthüikoxle ibu pangwüi nange nang dapa hama ngaile ahodaoa, ilaxle nange kusu-kusa hwom wanghom ang achangle ngo angkya akaxdaoa.

²⁶JOWANPA, nang a Zang changle, ilaxle nange ku hama iningkya ohünotün tsaosaxle changpu.

²⁷Kue nang ma, ku sixli hwom to mohiman laxkox, ile hwome nang cha-o ma chizakle mongmüi ma naxngo. JOWANPA, nange hwom to mohimandaoa, ilaxle nang mohiman a hwom füi jento naxngokox.”