Read Wancho Naga 1 Pukax-Pangao 20 Bible Online

1 Pukax-Pangao 20 - Wancho Naga bible

1 Pukax-Pangao 20

¹Ifüi angkya tsozit-wazit ma, chemtue wanghom zan to ka angkya tu changkya hex, Joap-e süpahibu azui ilaxle Amon nok haxtok to sing; wanghompa Dawid a Jerusalem ma nuile tüikya. Hwome Rabbah tingnu akhople kop, ija to sing, ilaxle ija tingtakle ama.

²Amon nok baozang Molek chapa ma hun khohom tüikya, otuak ma ija a 75 paon tüikya. Ija ma likwün tüikya, ija Dawid-e lax ilaxle chix khohom ma apüt. Chixe tingnu angkya tuina müimamale tsuile kop.

³Chixe ija tingnu angkya khünakbu chuwüi kop ilaxle hwom ang kho-jan hia wa, ibu füi mwot amok. Amon nok mama tingnu tokya khünakbu to chuwüi chixe ile hwon. Ifüima chix hia chix khünakbu Jerusalem to chat.

⁴Ofüima Gezer ma Filistia nok füi zan lai. Ipongma Hushah angkya Sibbekai-e Sippai le amünkya tomchong-hualo tuita lang, ilaxle Filistia nok to lüt.

⁵Filistia nok füi anaolechu tam azan, ilaxle Jair sasün Elhanan-e Lahmi, Gath angkya Goliath honao lang; ija mixsün paxfua a nyitak lya dang pong tüikya.

⁶Anaole chu Gath ma tam azan, ituk ma tomchong-hualo sün tuita, chikhi chak-khi azok pong füikya mix tüikya. Chix a kaipongkya tomchong-hualo sixli changkya.

⁷Chixe Israel nok adix-ada, ilaxle Dawid hotüi Shammah sasün Jonathan-e chix lang.

⁸Ibu mixsün azom, opang Dawid hia chix khünakbue langpuix, ibu a Gath nok angkya tomchong-hualo libu changkya.