Read Wancho Naga 1 Pukax-Pangao 21 Bible Online

1 Pukax-Pangao 21 - Wancho Naga bible

1 Pukax-Pangao 21

¹Haxshix-e Israel khünaknu hato tingtui apüi angkya mongtsu, ilaxle chixe Dawid ang khünak huak akiakle chang angkya mongkho adünle kox.

²Ikhoma Dawid-e Joap, tuita chix süpahi lompa akhokya mix ang kaxkoxle thüi: “Israel nok pangnu khato paokox, onok kaochi makhange ata-chikao alople khünak huak akiakle changkox. Hwom chemtukux tüipuix kue awanse tsule.”

³Ikoxle Joap-e lan: “Wanghompa, JOWANPAe Israel khünaknu a anyix tüikya to othom hotae nüile pu-tsale chang ang naxtom, ilaxle ibu ngün ang kople JOWANPAe nang tsünlo-zaknuile ngo ang naxtom. Ikoxle wanghompa, nange ija akiakle changkya makhange onok pangnusa thai ang tomse le büthüikoxle thütpu?”

⁴Ikoxlechu wanghompae Joap-e ija chix kaxtom apa angkya atsang. Joap laile pao, Israel haxtok pangkhato wüi aham, ilaxle Jerusalem to chat

⁵Süpahi mwot to süt ang tsuakle tüidaokya 1, 100, 000 khünak a Israel ma ilaxle 470, 000 khünak a Judah male akiakle alaikya chixe wanghompa Dawid hato kaxwün wang.

⁶Joap-e wanghompa kaxtom füi mongzom chimüi, ikhoma chixe Liwi hia Benjamin homjen angkya khünak huak chiakiak.

⁷Chixe mokkya ija mwot füi Zang ang mong chimüi, ikhoma chixe Israel nok to sikangün.

⁸Dawid-e Zang ang thüi: “Ija mwot mokkya ma kue huanuma ochax lyenle changdaoa! Chingchalaxle ku thaikya alak hüi. Kue ongat ma ija mokle changdaoa.”

⁹Ifüima JOWANPAe, Dawid ajepa Gad füi akax,

¹⁰“Paokox ilaxle Dawid ang thüikox, kue chix ang tütatapu thüichu zün angkya oli azom koxpu. Chixe chem zünle koppuix, kue ija moküi.”

¹¹Gad a Dawid hato ngui ilaxle chix ang thüi: “JOWANPAe ibu khama ojaja chang koxle müiüile ta?

¹²Zanglao azom otui-onuak laxüi hia? Chichangba lyetjang azom hünzom zannokbu thoto paole samngo angkya laxüi hia? Chichangba mong ma, JOWANPAe chix changlo füi sing ilaxle hünzom haxtok hato kaknu-laknu ahüi, ilaxle Israel haxtok pangkha towüi khünaknu zikmüt mangkho ahüi angkya chix kaxtaimix ahüi angkya laxüi hia? Kue JOWANPA kax to chemle kaxlan faüi?”

¹³Dawid-e Gad kax to lan: “Ku a khosam ashukle tüile! Khünaknue sikngün fakya kue laxse müntsu. Ku to sikangün angkya a JOWANPA chix wüi naxchanglax, chemthüikoxle chix ma chingchajaja tüile.”

¹⁴Ikhoma JOWANPA Israel nok hato kaknu-laknu ahüi ilaxle 70, 000 khünak zi ang tom.

¹⁵Ifüima chixe Jerusalem ama angkya hanpakma chix kaxtaimix ajo, ikoxlechu chixe chix mong alüix ilaxle kaxtaimix ang thüi: “Zakün! Ibibi wüi nguidaoa!” Kaxtaimix a, Jebu nok tsaxnak nui hama ajongle tüikya.

¹⁶Ija kaxtaimix kotho to ajongle ngokya Dawid-e ngünle lax; chix chak ma changlo koplaxle ija kaxtaimix a Jerusalem amüt ang achwonle tüikya. Ifüima Dawid hia khünaknu lompabu: opange nyikhwon awunlaxle tüikya hex: hwome thüne hax to lyetle akhux.

¹⁷Dawid-e zangjop: “O Zang, thaipupa a ku changpu. Khünak huak akiak angkya kax kue koxpu. Ibu a chem chitikkya taishixbu changle! JOWANPA, nange ku tamchu ku homkha to sikangünkox, ikoxle ibu khünaknu to chemle chu taxthüiünkox.”

¹⁸Araunah tsaxnak nui ma JOWANPA ang tö-tsap tuita zing angkya hanpakma ikha to pao angkya kaxtom kox angkya bama JOWANPA kaxtaimixe Gad füi akax.

¹⁹Gad-e akaxkya ningle Dawid-e JOWANPA kaxtom kax ma laxle mok.

²⁰Ija tsaxnak nui ma Araunah hia chix sasün hwom alie tsax nakle ngokya, ikoxle chemtue hwome ija kaxtaimix ngünle laxpuix, chix sasün hwom a paolaxle azwon.

²¹Araunah-e wanghompa Dawid nguile ngokya ngünkya füi tomle, chixe tsaxnak ngokya dantoxlaxle, chix thüne hax to lyetle akhuxle shwom.

²²Dawid-e chix ang thüi: “Kaknu-laknu le le ngokya azak angkya hanpakma ikhama kue JOWANPA ang tö-tsap tuita zaile alai angkya hanpakma ija nang tsaxnak nui laxhüi, kue nang ang othakho nguile koxüi.”

²³Araunah-e lan: “Wanghompa, laxlax, ilaxle nange chem mokse tsupuix, ija moklax. Ija tö-tsap ma tö ang koxle zokle ashun angkya hanpakma maihupong ibu chu laxlax, anaole ha ang lax angkya hanpakma tsaxnak khua chuwüi laxlax. Ifüi tomle tö ang kox ang wonglai tsax ibu chuwüi laxlax. Kue ibu pangwüi nang ang koxpu.”

²⁴Ikoxle wanghompa-e lan: “Ile münchangüi, kue nang ang otha anguile koxüi. Chempang nang kux changpuix, oja ku kux chichangpuix, ibu kue tuita chu JOWANPA ang tö tuita ang kox ang müntho.”

²⁵Ilaxle chixe ija tsaxnak nuiting hanpak ang Araunah ang hun ngunkhix 600 kox.

²⁶Ikhama chixe tö-tsap tuita zaile alai ilaxle JOWANPA ang zokle ashunkya tö hia notom tusüi tö kox. Chixe zangjop, ilaxle JOWANPA zangkho tokya wün adütle ija tö-tsap ding ma tüikya töbu zokle ashun ang koxkya füi chix zangjop to lan.

²⁷JOWANPA chix changlo dan angkya hanpakma akax, ilaxle kaxtaimixe ija kax ma lax.

²⁸Ija ngünlaxle, JOWANPAe chix zangjop to lankya Dawid-e ngün ang kop, ikhoma chixe Araunah tsaxnak nuiting ma tüikya kha angkya tö-tsap ma töbu kox.

²⁹Ija tuk kople, Mosa-e faokha to tüipongma zingkya JOWANPA Ngwotnui Nyihom, ilaxle tö-tsap oja ding ma töbu koxle shwomle hüikya hex, ija a Gibeon ma wüi tüitan changkya.

³⁰Dawid ikhato paolaxle Zang-e shwomle chang ang chitho, chemthüikoxle chix a JOWANPA kaxtaimix changlo thua za.