Read Wancho Naga 1 Pukax-Pangao 22 Bible Online

1 Pukax-Pangao 22 - Wancho Naga bible

1 Pukax-Pangao 22

¹Ikhoma Dawid-e thüi: “JOWANPA Zangshwom-Hom zai angkya onui a ikha changle. Israel khünaknue zokle ashunle tö kox ang tö-tsap ima tüikoxle müiüi.”

²Israel haxtok ma mixnokbu chemtukux ngole tüilaxpuix, pangwüi asox angkya Dawid-e kaxkox, ilaxle chixe hwom a mwot to asüt. Hwom züizüie zangshwom nui zai angkya longbu asex.

³Chixe pün füi fülom zaikya ma lax ang janlak hia jankhyepbu zing ang jan huanuma ilaxle othüt chitüile khopjanbu kox.

⁴Chix hato sedar püntho okhonguile apüi angkya hanpakma Tair hia Sidon nok füi zangwün tsuak.

⁵Dawid-e ajang: “Zangshwom-Hom oja kusae zai angkya hex, ija a tüle müile tamchu zangfang ma zangle wünkya chang angkya oli. Ikoxle chix a chemlüichu matikkya naosün tuita changle, idaile kue wüi ibu pangwüi atha-anyemle tox angkya oli changle!” Ile Dawid-e chix ozün ma tüipongma wüi homzai mwot-kat okhonguile achwon.

⁶Chixe sasün Solomon se ang apao, ilaxle JOWANPA, Israel nok Zang ang Zangshwom-Hom tuita zai angkya kaxtom kox.

⁷Dawid-e chix ang thüi: “Ku sasün, kue JOWANPA ku Zang achuak-achen ang Zangshwom-Hom tuita zaisele texhupu.

⁸Ikoxle kue khünak müimamale langdaoa ilaxle zan obithomthom ma hexle azanle changdaoa. Kue ibibile khünak aji ajen daokya khoma, ija Zangshwom-Hom, JOWANPAe ku ang zing ang müntom.

⁹Ikoxlechu chixe ku füi tsaotsütle akaxle, ‘Tumüi lomkhaole apün angkya nang ang sasün tuita tüiüi, chemthüikoxle pangnu ochax-ozan chak tokya chix ang tumüi-wanmale ngokya koxüi. Chix mün a Solomon, changüi, chemthüikoxle chixe apünkya tuk ma kue Israel nok ang mongsom hia ojik-naja tüi ang tomüi.

¹⁰Ku hanpakma Zangshwom-Hom chixe zaile alaiüi. Chix a ku sasün ang changüi, ilaxle ku a chix hopa ang changüi. Israel haxtok angkya chix wangting münachexüi.’”

¹¹Dawid-e chizakle akax: “Ku sasün, athaxpi JOWANPA nang Zang nang füi naxngo, ilaxle nange chix hanpak ang Zangshwom-Hom tuita zaile changkya zuma mwot pangwüi tsuakle hüi angkya hanpakma chix kaxtsao tüikya chixe otia ma naxthom.

¹²Ilaxle chix Wanlom ma chemle tüipuix ilailaile nange Israel khünaknu apün-awangle tsuak angkya hanpakma JOWANPAe nang ang tutex-mongjang hia je-hwon naxfakox.

¹³Israel nok hanpak ang JOWANPAe Mosa ang koxle toxkya wanlombu kax ma laxle jangtüi, nange pangnu tho-lünle changüi. Mong ma koplax ilaxle mongong tüilax, nang chem machu abüt-aban ang taxtom.

¹⁴Zangshwom-Hom hanpak ang, ku azong-among laxle hun 3400 metrik ton onüi ilaxle khop 34000 metrik ton onüi, Zangshwom-Hom zaikya ma lax ang afox-atomle changdaoa. Ija tok to, othüt chitüile jan hia wi, ibu apüidaoa. Kue hun hia longbu chuwüi achwonle changdaoa, ikoxle ito bole nange apüi angkya changle.

¹⁵Nang ang mwotmok mix huanuma tüile. Longthwot nui to mok angkya longzüt mixbu, long swon ang hia pünbu mwot mok angkya zingpabu tüihule, ilaxle mama-mama zingsa-jaosa mankyabu tüihule.

¹⁶Hwome hun, khop, wi ilaxle jan ibu füi zingkya lili pangwüi hwome zingüi. Athaxpi mwot owang wang kox. JOWANPA nang füi tüile.”

¹⁷Israel nok lompa pangnusae Solomon to asun angkya Dawid-e kax kox.

¹⁸Chixe thüi: “JOWANPA hünzom Zang hünzom füi tomle tüikya ilaxle chixe hünzom ang pangnu lom ma wüi mongsom fale hüipu. Ija haxtok ma ngole hüikya khünakbu pangnusa to JOWANPAe ku ang wüi lüt ang tompu, ilaxle athaxpi hwom a hünzom zongto tamchu JOWANPA zongto pünsa naoli ang achangdaoa.

¹⁹Athaxpi JOWANPA, hünzom Zang to hünzom kün-mong hia chamua pangnu koxle thothakox. Zangshwom-Hom zaikya mwot owang wanglax, ikoxle hünzome JOWANPA Tsaotsüt Suak ilaxle chix to shwomtole changpongma laxkya mama otsao mwot-katbu pangwüi ima dan ang tsuaküi.”