Read Wancho Naga 1 Pukax-Pangao 28 Bible Online

1 Pukax-Pangao 28 - Wancho Naga bible

1 Pukax-Pangao 28

¹Israel nok süpahi lompabu pangwüi Jerusalem ma asox angkya wanghompa Dawid-e kaxtom kox. Ikhoma, homjen-homjen ma süpahi lompabu pangwüi; wangting sütho mwotlom to akhi-amikle hume ngokya lompabu pangwüi, saxthom-saxthom lompabu pangwüi, wanghompa hia chix susa hwom tsom-pom hia tuina to akhi-amikle hume ngokya okax-okhobu pangwüi, wanghom homkha angkya okax-okhobu pangwüi, mixmüi tüichongbu; süpahibu tamchu khütkhaxkhaxkya khünakbu to lünle, pangwüi Jerusalem ma asox.

²Dawid a, hwom pangwüi tunthoma ajong ilaxle pünzün-wangsaile akax: “Ku wangpünnu, ku kax to apahüi. Kem JOWANPA chiting nui, chix longza-Kaxfün Suak hanpakma othuithuima lax ang kue hom tuita zaile alaise tsupu. Kue chix achuak-achenle chang angkya hanpakma Zangshwom-Hom zai angkya achwon-athale changdaoa,

³ikoxlechu ija kue zing angkya münchangle JOWANPAe abaxle, chemthüikoxle süpahi tuita ang ngolaxle kue huanuma aji ajenle changdao koxpu.

⁴JOWANPA, Israel nok Zang-e, Israel nok thakma jento apün-awangle ngo angkya ku tamchu ku sixli hwom zünle kopdaoa. Chixe Judah homjen a lompabu alai angkya hanpakma zünle kopdaoa, ikoxle Judah homkha angkya chixe kwom apa homkha zünle kople. Ija kwom homkha angkya, Israel nok pangnu thakma apün-awangle chang angkya mix ang ku zünle kopkya a chix mongtex changle.

⁵Chixe ku ang sasün hwom müimamale koxle, hwomkha angkya chixe JOWANPA wangting Israel nok thakma apün angkya Solomon kamle.

⁶“JOWANPAe ku ang thüile, ‘Ku ang Zangshwom-Hom zaile kox angkya mix a nang sasün Solomon changle. Chix a ku sasün ang ilaxle ku a chix hopa ang changle ngo angkya kue kamle kopdaoa.

⁷Athax chixe mokle ngokya ningle chizakle chixe ku wanlombu hia kaxtombu pangwüi kax ma laxle jangchang thüiningle, kue chix a othuithui hanpak ang wanghom ang achangüi.’

⁸“Idaile, athax, ku wangpünnu, Zang tunthoma ilaxle JOWANPA khünaknu Israel nok pangnusa tunthoma, JOWANPA, kem Zang-e kem ang fale tüikya kaxtom pangwüi khile kax ma laxle tüi angkya kue hünzom füi akaxpu, ile changkox tix ipongle müikya ija haxtok a hünzom ku ang ngoüi ilaxle othuithui hanpak ang hünzome füichi susa hwom chak to ija haxtok ataile koxle tox ang tsuaküi.”

⁹Anaole chixe Solomon ang thüi: “Ku sasün, nange hünpa ku Zang to otsing changpule ngaitsuak angkya oli changpu ilaxle mong züizüihanle chichang homtoxle mongtsutsule chix thotha angkya changpu. Chixe kem küntex-mongsung komkaile tsingle. Nang chix hato hüile jangchang thüiningle, chixe nang a pongle kopüijao; ikoxlechu nange chix hato tok ahole jangchang, chixe othuithui hanpak ang nang a awütüi.

¹⁰JOWANPAe nang a, chix Zangshwom-Hom zai angkya khünak ang kamle laxdaoale nange awan angkya wüi changpu. Athax ija ile moklax: ilaxle ija a chatsu-mongluakya füi moklax.”

¹¹Dawid-e Solomon ang Zangshwom-Hom zai angkya, pungbu hia mama nuibu, ilaxle Ataxkya Otsao Nui, ojongkha ma ochaxbu thailak tüi angkya hex, ibu zing angkya olom bakle apuale kox.

¹²Chix mongto nya-o hia ija akhople nuibu zaile chang angkya mong ma ajangle ngokya pangwüi kox. Zangshwom-Hom tuina hia JOWANPA ang atsaole koxle thomkya hinghobu thomnui pungbu zai angkya chix mongtex bakle ngaile kox.

¹³Zangshwom-Hom ma mwot mok angkya ilaxle ima tüikya tiklakbu to humele chang angkya hanpakma, zompu-zangpabu hia Liwi hwom tusox zing angkya chix tutex chuwüi ngaile kox.

¹⁴Tiklakbu jao angkya hanpakma khop hia hun chemtukux lax angkya hex, ibu bama chixe pangwüi adangle kox.

¹⁵Tuinabu a: wüntik hia lotsap, ibu pangnu hanpakma,

¹⁶khopjan tsap hanpakma, ilaxle Zang ang tö kox angkya an dan angkya hun tsaplyabu hanpakma, ibibi.

¹⁷Ibibi mwot-kat zing angkya hanpakma hun tsaotsao chemtukuxle lax angkya hex, ibu chixe adangle fa. Müitop-san, khupsa ilaxle polo, ibu zing angkya hanpakma chemtukux lax angkya hex, tiklakbu zing ang khop hia hunbu chemtukux lax angkya hex,

¹⁸ongan müikya so zok angkya hanpakma tö-tsap zaikya ma hun tsaotsao chemtukux laxüi ilaxle JOWANPA Tsaotsüt Suak to o-le tüikya, ozang füikya zünmokbu dan angkya hanpakma man-kanlin zing ang hun tsaotsao chemtukux laxüi, ibu pangwüi adangle fa.

¹⁹Wanghompa Dawid-e thüi: “JOWANPA, chix jaoe, ku ang mokle pao angkya hanpakma adangle fakya zale thomkya mwotlom ibu tsaothale tüile.”

²⁰Wanghompa Dawid-e chix sasün Solomon ang thüi: “Mong taxhi ikoxle mongchongle changlax. Mwt owang wang kox, owaechu nang to abax ang taxtom. Kue owa to thothale hüipuix, ija JOWANPA nang füi tüiüi. Otuechu chixe nang danle müntoxpu, ikoxle chix Zangshwom-Hom ma mokse mwot ashukle machang tanto chix a nang füi ngo angkya changle.

²¹Zompu-zangpabu hia Liwi hwom ang Zangshwom-Hom mamok angkya mwot koxdaoa. Küjo-küjele zing ang mankya zingpabue nang to asunle chang angkya mongtsutsule tüile ilaxle khünaknu pangwüi üntoxle hwom lompabu abakle nang kaxtom kax ma laxle moküi.”