Read Wancho Naga 1 Pukax-Pangao 29 Bible Online

1 Pukax-Pangao 29 - Wancho Naga bible

1 Pukax-Pangao 29

¹Wanghompa Dawid-e noknu tu asoxkya khama ngai: “Ku sasün Solomon ang Zang-e zünle kopkya khünak changle, ikoxlechu athax chix a naosa tamchu tüta lüi matsing. Mokle alai angkya mwot a huanu, chemthüikoxle ija a khünak chongwang hwom ngwotnui münchang ikoxle JOWANPA to shwom angkya Zangshwom-Homnu changle.

²Kue Zangshwom-Hom hanpak ang tuinabu achwon ang zongbakle azongdaoa, ilaxle hun, khop, wi, jan, püntsi, oza-onyox hanpak ang lax ang thalix longbu, ibu okhonguile achwondaoa.

³Ibibi tok to chatle chu kue Zang Zangshwom-Hom to mongkün huanuma tüikya khoma, ku suakthong tokya hun hia khop, ibu alaile koxdaoa.

⁴Kue hun amüikya othum 115 tukux ilaxle khop amüikya othum 265 tukux lüjao, Zangshwom-Hom aza-apuale chang angkya

⁵ilaxle zingpabue pangnu olom to, zing ang twon angkya hanpakmale koxdaoa. Athaxpi, ma küntsu monglualua to JOWANPA ang iningkyabu tuina koxsele mongtsukya khünak obi tüi?”

⁶Ifüima saxthom konu tüichongbu, homjen angkya nguakax-wangkhobu, süpahi lompabu, ilaxle chongwang hwom tuina to akhi-amikle hungokya luawang-naomüi hwome,

⁷Zangshwom-Hom zaikya mwot to lax angkya hanpakmale ibibi tuina kox ang mongtsule lai: hun a othum 190, khop a othum 380, khop a othum 675, ilaxle jan a otuak ma 37500 tukuxle apüi;

⁸thalix long tüikyabuechu ibu Zangshwom-Hom tuina khato dan, ilaxle ibu to Gershon saxthom kha angkya Liwi sün Jehiel-e humele chang.

⁹Küntsu monglua laxle khünaknue ibu tuina JOWANPA ang kox, ilaxle okhonguile koxtsuakkya hanpakma hwom ang tüle mongmüi. Wanghompa Dawid ang chuwüi mong huanuma müi.

¹⁰Ikhama khünaknu tunthoma Dawid-e Zang achuakle thüi: “Kwom putong Jakop Zang, nang a oshuk-okim chitüile naxachuak kox!

¹¹Akhole tsak-zongkya, fuazangkya, fixfax-jikjeple müikya, tüle zaxzangkya Zang a nang changle. Ding hia hax ma atüitüi komkaile nang kux, ilaxle nang a chongwang hwom pangnu thakma apünkya Zang.

¹²Ahak-aluakya hia tüi-nangkya komle nang tokhange tix hüipu; nange pangnusa to, nang-tsak nang-zong hia janzüi füi apünle ngopu; ilaxle tütapuchu nange tsak-zongle tüi ang hia chuakchongle tüi ang koxtsuak.

¹³Athax, kwom Zang, kwome nang ang münchong fapu, ilaxle kwome nang fuazangkya mün achuakpu.

¹⁴“Ikoxlechu ku khünaknue tamchu kue nang ang otsing tomtata ma chemchu chikox tho, chemthüikoxle atüitüi pangwüi nang hinghoho wüi chang koxle; ikhoma kwome koxpule münzaza, ikoxle nang kux wüi nang ang achatle koxpu.

¹⁵O JOWANPA, nange awan ngopu, kwom chuwüi kwom pupa hwom lailaile zanda ang hia pünpao ang ngokya chifün kaile hüidaoa. Kwom nyix-hi-hanpak ang zangkhung paoüi ningle, ilaxle kwom a zikmüt mangkho chak tokya azangle pao ang chitho.

¹⁶O JOWANPA, kwom Zang, ibibi tuina komkaile, nang otsao mün achuakle Zangshwom-Hom tuita zaile alai angkya hanpakmale nange kwom ang asox-atom ang tompu, ikoxle ibibi pangwüi nang tokhange tix hüipu ilaxle nangkux-kux wüi changpu.

¹⁷Nange pangnusa kün-mongto thwontsing ilaxle khünak opang thajao wünhai chitüile tüilaxpuix, ibu füi nang mongzom müikya kue awanpu. Sukya hia mongkoxkya makhange ibu pangwüi kue nang chak to danpu, ilaxle ikhama tüikya nang khünaknu ibu tö chemtukux mongmüi atungle asox ngotüipuix, ija kue ngün ang kople.

¹⁸Kwom putong Abraham, Isak, hia Jakop, hwom Khüthak Zang, nang khünaknu mong khama iningkya haxjop-zangkhom jento janzüi tüikya füi ngo ang tomkox ilaxle jento nang to mongong tüikya füi ngo ang tomkox.

¹⁹Zangshwom-Hom zai angkya hanpakma kue chempang achwonle changdaopuix, ija Zangshwom-Hom zai angkya bama nang kaxtom kax ma laxle tüi angkya hanpakma ku sasün Solomon ang chatsu-mongluakya kün-hi-mong fakox.”

²⁰Ifüima Dawid-e khünaknu ang kaxtom kox: “JOWANPA, hünzom Zang achuak kox!” Ilaxle asoxle tüikya noknusae Zang achuak üntoxle hwome akhuxlaxle JOWANPA achuak-achen tamchu wanghompa ang chazakya aho.

²¹Ifüima hwome tö hanpak ang müi lang, ibu Zang ang atsaole kox, ilaxle ibu omüi khünaknu ang sax ang kox. Ija tö to obo ang, hwome maihupong 1000, chun ola 1000, chun hosa 1000, ibu a otom ma lanle zokle ashunle tö-tsap ma JOWANPA ang kox. Hwome grepti-ju tö chuwüi apüile kox.

²²Ija nyix hwome JOWANPA tunthoma sax-lingle chang ilaxle hwom ang mong tüle müi. Anyi-lükya ma hwome Solomon a wanghom ang achangkya khuapu. JOWANPA mün ma hwome chix to münga füi lile kox, ile wanghom ang kam ilaxle Zadok a nguakho ang kam.

²³Ile JOWANPAe zingle fakya wangting ma hopa lüi ang chix wanghom ang achang. Chix a tüle tho-lünkya wanghompa tuita ilaxle Israel khünaknu noknusae chix kax ma lax.

²⁴Nguakax-wangkhobu, süpahi lompabu, Dawid sasün hwom mamabue ngaxchu, Solomon a wanghompa changpule chix kax ma laxle tüi angkya tsaosax.

²⁵JOWANPAe Israel nok pangwüi Solomon hato chazakya ahole ajong ang tom, ilaxle chixe apünle hüikya zuma Israel nok a, ija apünle hüidaokyabu pangnu thak to fuazangle chang ang tom.

²⁶Jesse sasün Dawid-e Israel haxtok pangwüi zanglao 40 apün-adale hüi.

²⁷Chixe Hebron ma zanglao anüt apün ilaxle Jerusalem ma zanglao 33 apün.

²⁸Tüle ahak-aluale tamchu achuak-achenle, azu khothole tix chix zi, ilaxle chix sasün Solomon a chix man ma wanghom ang achang.

²⁹Wanghompa Dawid pukax, owang makhange oshuk alople, Samuel, Nathan, hia Gad, nguapa hwom azom laizabu ma komkaile zale tüile.

³⁰Chixe chem apünkya hex, chix chemtukux tsak-zongle tüikya hex, ilaxle chixe chempang apongle hüipuix tamchu Israel nok hia tomzi nokbu füi chempang apongle hüidapuix, ibu pangwüi laiza ibu ma bangüi.