Read Wancho Naga 2 Pukax-Pangao 1 Bible Online

2 Pukax-Pangao 1 - Wancho Naga bible

2 Pukax-Pangao 1

¹Dawid sasün Solomon-e Israel wangting shingmongle ziakop ilaxle JOWANPA, chix Zang-e chix to mohiman üntoxle tüle tsak-zongle chang ang tom.

²Wanghompa Solomon-e, ojat hia oho pong ma athomkya othom lompabu, tingpün-nokwangle ngokyabu, homjen-homjen ma saxthom konu tüichongbu, ilaxle khünaknu pangwüi ang,

³Gibeon ma zangshwomnui to chix füi tomle pao angkya ahyenle kaxkox. JOWAN dapa Mosa-e faokha to tüipongma zingkya JOWANPA Ngwotnui Nyihom ikhato wüi chang koxle hwom ikhato pao angkya lai. (

⁴Ikoxlechu Tsaotsüt Suak a Jerusalem ma wüi tüikya. Kiriath Jearim tokya apüilaxle Dawid-e ija, chixe ija dan ang zaikya Nyihom ma thomle tüikya.)

⁵Uri sasün, Hur susün Bezalel-e zingkya wi tö-tsap chuwüi Gibeon to JOWANPA Ngwotnui Nyihom tunthoma tüikya. Wanghompa Solomon hia khünaknue ikhato JOWANPA to shwom.

⁶Nyihom tunthoma wanghompa-e JOWANPA to shwomle wi tö-tsap ma tö kox; chixe ikhama hajat tuita müi lang ilaxle otom ma lanle zokle ashunle tö kox.

⁷Ija ja Solomon hato Zang ngaile lai ilaxle atüi: “Kue nang ang chem fakoxle müiüile nange thütpu?”

⁸Solomon-e lan: “Nange apa Dawid hato chongkya nang mongkün ahole hüidaoa, ilaxle athax nange ku ang chix man ma wanghom ang achang ang tompu.

⁹O JOWANPA, nange apa hama tsaosaxle changkya changle hüi ang tomhüi. Nange ku a, e ang chithole tüikya khünaknu thakma apün ang zünle koppu,

¹⁰idaile hwom to apün-adale ajit-awa tsuak angkya hanpakma ku ang je-hwon hia tsak-zong fahüi. Ile chichang thüikoxle nang khünaknu ibibi to kue chemle ajit-awa ang thoüi?”

¹¹Zang-e Solomon kax to lan: “Nange changkya wüi zünle kopdaoa. Tuina, tingtok, fua-ngamkya, zan amüt angkya hia ma tsünlwot-khothwot, ibu chichangle, ku khünaknu opang thakma kue nang wanghom ang zingle tüipuix, hwom to apün-awang tsuak angkya je-hwon hia tsak-zong jukya, nange changkya jao jupu.

¹²Kue nang ang, je-hwon hia tsing-wankya koxüi. Ilaxle ija to bole, kue nang ang tuina, tingtok, ibu pangwüi koxüi. Nang thoma iningle jetüi-hwonlangkya mix owa münbang ilaxle nang tokfüi ma nang ningkya khünak müntüitoxüi; kue nang a ile zaxzangle chang ang tomüi.”

¹³Ilaxle Solomon a, JOWANPA Ngwotnui Nyihom tüikya Gibeon danle tox ilaxle Jerusalem to chat. Imakhange owang wangle chixe Israel nok apün-awangle chang.

¹⁴Chixe 1400 man-kanlin makhange azan angkya süpahibu ilaxle 1200 mankho makhange azan angkya süpahibu zingle dan. Jerusalem ma züizüi toxlaxle mamabu a tingnu-tingnu to tiale ngo ang tom.

¹⁵Chixe apünle changpongma, Jerusalem ma khop hia hun, ibu a tütakhahex chithüile long ningle tüikya, ilaxle sedar pünbu a zangjang saikomor pünbu ningle okhonguile tüikya.

¹⁶Musri ilaxle Silisia, nok tokya man thalex angkya,

¹⁷tamchu Ijip nok tokya man-kanlin thalex angkya, ibu mwot wanghompa lompabue hwom chak ma lax. Hwome Hit nok hia Siria nok wanghombu füi, man hia man-kanlin ibu a, khopjan ngunkhix 600 pong ang ilaxle man a, tuipong to. Ngunkhix 150 pong ang hang.