Read Wancho Naga 2 Pukax-Pangao 11 Bible Online

2 Pukax-Pangao 11 - Wancho Naga bible

2 Pukax-Pangao 11

¹Chemtue wanghompa Rehoboam a Jerusalem to nguipuix, chixe 180, 000 süpahibu sümüimüi, Benjamin hia Judah homjen angkya sele asox. Chixe shuakux nok Israel zan to ka ilaxle hwom to chuwüi chixe apünle thomse tsu.

²Ikoxlechu JOWANPAe ajepa Shemaiah füi akaxle

³wanghompa Rehoboam hia chix khünaknu hama ija kaxho kox ang tom:

⁴“Hünzom Israel khünak tomtom zan to taxka. Hünzom pangnusa wüi hom to chat bak lax. Chemle changdaopuix, ija a ku mongtex changle.” Hwome JOWANPA kax ma lax ilaxle Jeroboam füi azan ang chika.

⁵Rehoboam a Jerusalem ma nui ilaxle Judah hia Benjamin ma tingnu ibibi pan zailaxle ziakop:

⁶Bethlehem, Etam, Tekoa,

⁷Bethzur, Soko, Adulam,

⁸Gath, Mareshah, Zif,

⁹Adoraim, Lakish, Azekah,

¹⁰Zorah, Aijalon, hia Hebron bibi.

¹¹Shingmongle pan zailaxle chixe ibu ziakople chang ilaxle ibu ma tiale süpahi lompa tuipong kamle dan tamchu pangnu khato wüi chixe sütling, olip-münga hia grepti-ju ibu apüile kox.

¹²Chixe ibu ang di hia paxbu chuwüi kox. Ile chix a Judah hia Benjamin nyi to apün-awangle ngo.

¹³Israel haxtok wankam pangnu tokhange zompu-zangpabu hia Liwi hwom shuathongchi Judah nok to ju.

¹⁴Liwi hwome müitsom nui hia mama haxtokbu dantoxlaxle Judah hia Jerusalem to pao, chemthüikoxle Israel nok wanghompa Jeroboam hia chix füi angkya wanghombue hwom ang JOWANPA zomzang mwotbu mok ang chitom.

¹⁵Jeroboam-e chix lualua to zompu-zangpabu kam ilaxle songsaribu baozang to shwomkya nui to mwot mokle chang ang tom ilaxle baobu hia maihu lailaile zingkya chapabu to shwom ang tom.

¹⁶Israel homjen angkya khünakbu opange mongkoxle JOWANPA, Israel nok Zang to shwomse tsupuix, ibu a Liwi hwom füito azuile Jerusalem to pao, ilaxle ikhato hwome hwom pupa hwom Zang, JOWANPA to shwom ang kop.

¹⁷Ile changkyae Judah wangting a sisile pu-tsale chang, ilaxle hwome zanglao azom hanpakma Solomon sasün Rehoboam to fongle, wanghompa Dawid hia Solomon nyi fang ma ngole hüikya ningle ngohom.

¹⁸Rehoboam-e kako ang Mahalath lax. She hopa a Jerimoth, Dawid sasün changkya ilaxle honu a Abihail, Eliab sacha ilaxle Jesse sucha changkya.

¹⁹Okhi ang sasün azom, Jeush, Shemariah, ilaxle Zaham hwom tüikya.

²⁰Ofüima chixe Makah, Absalom sacha lax, ilaxle hokhi ang sasün ali: Abijah, Attai, Ziza, ilaxle Shelomith hwom bibi tüikya.

²¹Pangnu athüt koxle Rehoboam ang kakonu hwom 18 tüikya, danucha hwom 60 tüikya, ilaxle chix a sasün hwom 28 ilaxle sacha hwom 60 hopa changkya. Chixe mama wangcha hia danuchabu to nüile Makah to mongkün.

²²Hosa hwombibi khamachu chixe Abijah to ataxle mongkün, ilaxle ija naosün ang chix man ma wanghom ang achang angkya chixe wüi kamle tox.

²³Müimamale atsing-atsangkya füi Rehoboam-e sasün hwom ang hünlit ahanle kox, ilaxle hwom Judah hia Benjamin haxtok angkya ziakople panzai thomkya tingnubu to tiale ngo ang tom. Chixe hwom to otsuaktsuak ma humele kox ilaxle hwom kakobu ang lax ang sheko obibihex lomle kox.