Read Wancho Naga 2 Pukax-Pangao 15 Bible Online

2 Pukax-Pangao 15 - Wancho Naga bible

2 Pukax-Pangao 15

¹Obed sasün Azariah hato JOWANPA chasa hüi,

²ilaxle chix a wanghompa Asa füi apong ang pao. Chixe nyakle thüi: “Wanghompa Asa, tamchu Judah hia Benjamin ma ngokya khünaknu, ku kax to apahüi! Hünzom chix füi ngokya kople JOWANPA a hünzom füi tüipu. Hünzom chix lomle jangchang, chixe hünzom ang chix atak ang tomüi, ikoxlechu hünzome chix hato tok ahole jangchang chixechu hünzom hato tok ahoüi.

³Israel nok a okuilole otsingtsing Zang chilax homtoxle ngole hüipu, hwom hama anwot-anole kox angkya nguapabu hia wanlom chilax homtoxle a.

⁴Ikoxle chemtue sikngün hüile changpuix, hwom a JOWANPA Israel nok Zang hato chat. Hwome chix lom ilaxle chix atakle lax.

⁵Ipongma owachu haxmüi-zangmale aham-atüile chang ang chitho, chemthüikoxle ipongma pangnu khato wüi thama hia tuma-wanshixe awangle ngo.

⁶Zang-e hwom hato thama-thomshix apüile ngokoxle onok tuita mama nok to afangle thom, ilaxle tingnu tuitae ata tingnu to afangle thom.

⁷Ikoxlechu hünzom a mongchonglax, mong taxhix. Hünzome mokle hüikya mwot bama hingho olüi kox angkya changpu.”

⁸Chemtue Asa-e Obed sasün Azariah-e akaxkya jekax atatle laxpuix, chix ang mongchong. Judah hia Benjamin haxtok angkya tamchu hwom Efraim nok angkya kople tüikya tingnubu ma tüikya chapa pangwüi awüt. Chixe Zangshwom-Hom Lopsha ma tüikya JOWANPA tö-tsap zingle amüi.

⁹Efraim, Manasseh hia Simeon, tamchu chix wangting ma ngole tüikya khünakbu huanuma Asa chito hüi, chemthüikoxle chix füi JOWANPA tüile ngokya hwome ngünle lax. Asa-e khünaknu ibu tamchu Judah hia Benjamin khünakbu pangwüi sele asox.

¹⁰Asa wanghom ang achangkya füima zanglao 15 ma lyetjang azom lükya to hwom a Jerusalem ma asox.

¹¹Ija nyix, hwome kople apüikya kha angkya, JOWANPA, hwom pupa hwom Zang ang töbu kox; hwome maihu 700 to bole chun 7000 kox.

¹²Izuma hwome, JOWANPA, hwom pupa hwom Zang to kün-hi-mong makhange zongbakle shwom angkya tsaosax.

¹³Naosom hia mixmüi, sheko hia lüka, owae chix tong to chishwomle changüihex, ija khünak a langüi.

¹⁴Ija tsaotsüt chiama angkya hwome JOWANPA mün ma tsaole takdün, ilaxle hwom akhongle nyazongbu müt.

¹⁵Hwome mongbakle ija tsaotsüt laxkya khoma Judah angkya khünakbu a huanuma mongmüi. JOWANPA shwomle chang angkya hwom ang mong huanuma müi ilaxle chixe ija pongle kop ilaxle pangnu chito wüi chixe tumüi-lomkhaole ngo ang tom.

¹⁶Wanghompa Asa-e hopi Makah, wangchanu ang ngokya athai, chemthüikoxle she-e okop-olwot baozangchanu Asherah chapa zinglaxle shwomle ngo. Asa-e ija chapa dakle atsun ilaxle atex, ilaxle Kidron Haxsha to ija zokle asum.

¹⁷Asa-e chix chaxwan angkya songsari baozangbu to shwomkya onui bakle chiama tho koxlechu, chix a, chix tsüntsün ma JOWANPA to mongong tüikya füi ngo.

¹⁸Hopa Abijah-e Zang ang koxle atsaole dantoxkya tui-mwot pangwüi chixe Zangshwom-Hom ma dan, ito bole chixe atsaole dankya hun hia khopbu chuwüi dan.

¹⁹Chixe apünkya zanglao 35 makaikya kople ochax-ozan chemchu chitüile ngole hüi.