Read Wancho Naga 2 Pukax-Pangao 19 Bible Online

2 Pukax-Pangao 19 - Wancho Naga bible

2 Pukax-Pangao 19

¹Judah nok wanghompa Jehusafat a haxmüi-zangmale chix homlo Jerusalem to chatle ngui.

²Ajepa tuita, Henani sasün Jehu a wanghompa füi apong ang ngui ilaxle thüi: “Ochax khünakbu to asun angkya tamchu JOWANPA thua anule changkyabu chima se angkya nange sukya mwot le thütpia? Nange chem mokpuix, ijae nang füi JOWANPA ang mongtsik adünle changdaoa.

³Ile chang koxle nang ma müikya oli züita tüile. Nang khünakbue shwomle ngokya baozangchanu Asherah chapabu pangwüi nange awüt tsuakdaoa, ilaxle nange JOWANPA mongtex ma laxle chang angkya azongdaoa.”

⁴Wanghompa Jehusafat a Jerusalem ma ngokoxle chu, chix a khünaknu füi apong angle, JOWANPA hwom putong hwom Zang hato khünaknu tamchatle ahyen angkya hanpakmale chix a shuathongchi ma Bersheba makhange shuakuxchi Efraim haxsüt haxnushuk alople chizakle ahamle ngo.

⁵Pan zailaxle ziakople tüikya Judah tingnu pangkha towüi chixe kaxfünpabu kamle dan

⁶ilaxle hwom hama ile adangle fa: “Kaxfün thothuile chifa angkya bama khünzailax, chemthüikoxle hünzome a khünak tsak-zong mwot mokkya münchang ikoxle JOWANPA tsak-zong mwot mokpu, ilaxle nange kaxfün fale changpongma chix a nang füi tüile ngole.

⁷JOWANPA chathua zakya tüilaxle ilaxle khün-likya füi kaxfün falax, chemthüikoxle JOWANPA, kem Zang-e, dyen-ngankya, masüi-mixlüile changkya hia zuizun, ibu füi adukya müntüi.”

⁸Jerusalem ma Jehusafat-e Liwi hwom, nguapabu, tamchu tüichong mixmüibu, ibu khatokya khünak züizüi, JOWANPA Wanlom ma thaile changkya hia tingnu ma ngole tüikyabu bama longzi manghua hia mama-mama ma atsi-alakya zangwün laiba fün-wünle tsuak angkya hanpakma kaxfünpabu ang kamle dan.

⁹Chixe hwom ang ibibile adangle fa: “Hünzome hünzom mwot JOWANPA chathua zakya füi, hünzome mokkya pangnuli to mongong tüikya füi chix kax ma laxle mok angkya oli changpu.

¹⁰Tingnubu to ngole tüikya ma füi tomwüi ngole tüikya nokpu owawae, mik-maxkya, wanlom hia kaxtombu ma thaikya, iningkyabu tsetwon-zangwün apüile changpongma, ija tsetwon-zangwün to nguipongma JOWANPA zongto ochax lyenle thaikya chitüi angkya hanpakma chemle zanglom-saikha angkya hex, ibu olom müile apua-ano kox angkya oli changpu. Hünzome ile chimok thüiningle, hünzome tamchu hünzom füikya nokpu tüita-naopabue JOWANPA mongtsik ahyenle lax angkya hato hüiüi. Ikoxlechu hünzome hünzom mwot tsuakle jangchang, hünzom ma thaikya chemchu müntüiüi.

¹¹Zanglom füikya zangwün pangnu lom ma Nguakho Amaziah a zangwün tsuakle fakya mix ang changüi, ilaxle chaxwannu mama tingpün-nokwangkya zangwün bama a Ishmael sasün Zebadiah, Judah angkya gowarnor a pangwüi zangwün tsuakle fa angkya mix ang changüi. Khwalo ma tsaifün kaxwün tsuakle fadaokya mwot ang achangle mokchahex ang hu angkya a Liwi hwom mwot changüi. Ibu adangle fakya mwot pangwüi mokle tsuak angkya hanpakma mongchonglax, ilaxle sukya olom ma JOWANPA a hünzom chima naxtüi fa!”