Read Wancho Naga 2 Pukax-Pangao 20 Bible Online

2 Pukax-Pangao 20 - Wancho Naga bible

2 Pukax-Pangao 20

¹Noxta lekya füima Moab ilaxle Amon nok süpahibu, nokmüi ma ngole tüikya Meun nokbu, füi tomlaxle Judah nok tingsung.

²Züizüi kaxhomixbu nguilaxle wanghompa Jehusafat hato tsing ang kox: “Omang Tinu mama kao tokhange nang to sing angkya hanpakma Edom nok süpahibu huanuma nguile changdaoa. Hwome Hazazon Tamar hwople koptsuakdaoa.” (Ija a Engedi ang koxkya mama mün tuita.)

³Jehusafat tüle za ilaxle JOWANPA ma tikshole chix lom azui angkya hanpakma zangjop. Ifüima chixe chix chaxwan pangnu khato wüi chisax-chilingle zangjople atsao angkya kax kox.

⁴Judah haxtok angkya tingnu pangkha tokya wüi JOWANPA ma tsaitik-kaxshole chang angkya hanpakma Jerusalem to nonokhaile asox,

⁵ilaxle hwom hia Jerusalem angkya khünaknu pangwüi Zangshwom-Hom angkya khwa hozün ma athüt. Wanghompa Jehusafat ngui ilaxle hwom thüntho ma ajong.

⁶Chixe akhongle zangjople thüi: “O JOWANPA, kwom pupa hwom Zang, zangkho wangting tokhange nange zangfang angkya onok pangwüi thakma apünle ngopu. Nang a tsak-zong tamchu zaxzangle tüikya mix, ilaxle owaechu nang füi alünle chang ang chitho.

⁷Nang a kwom Zang changle. Chemtue nang khünaknu Israel nok ija haxtok to ngui ang achexle changpuix, ipongma nange ikhato ating-anokle tüikya khünakbu jwonle apao ilaxle ija haxtok a, nang zuipa Abraham sixli hwom ang, jento hwom tingtok ang lax ang koxpu.

⁸Hwome ijongkha ma ngolaxle nang achuak-achen angkya hanpakmale hwome Zangshwom-Hom zaile alaipu,

⁹ija a, tüta ningkya thama-thomshix: ochax-ozan, okak-olak, otui-onuak, iningkyabu hwom thama adünle jangchang ija nang to shwomle ngokya Zangshwom-Hom to nguilaxle hwom nang tunthoma ajong ang tsuaküi. Hwom thangshixle changpongma hwome nang to jop ang tsuaküi, ilaxle nange atatlaxle hwom kho awale kop ang thoüi.

¹⁰“Ikoxle athax a Amon nok, Moab nok tamchu Edom nok, ibue kwom to single ngotüi. Ijip haxtok tokya kwom pupa hwom nguile ngopongma, nange ibu haxtok akaile le ang chitsan, ikhoma kwom pupa hwom a ibu chamtua atsyenle le ilaxle hwom to chemchu chithüile danle toxpu.

¹¹Ikoxle hwome kwom to jannong ile alüile: nange kwom ang koxkya haxtok angkya kwom jwonle apao angkya hanpakma hwom nguile.

¹²Nang a kwom Zang changpu! Ibu to sikngün ang tomkox, chemthüikoxle kwom a, kwom zan to dongle ngokya, ipongpong luile tüikya khünaknu tuto chem ziakhochu münngui. Chemle hwon koxle müiüile kwom ang jankho samkya khoma nang hato asunhüile nguipu.”

¹³Judah haxtok angkya khünaknu, hwom kako hia naosom hwom pangwüi athütlaxle ija Zangshwom-Homkha ma ajongle tüikya.

¹⁴Ija khünaknu othom khama tüikya Liwi sün tuita hato JOWANPA Chasa ngui. Chix a Zekariah sasün Jehaziel changkya; chix a Asaf saxthom angkya khünak tuita ilaxle chix a Mattaniah, Jeiel, hia Benaiah hwom makhange hüikya sixli.

¹⁵Jehaziel-e thüi: “Wanghompa tamchu Judah hia Jerusalem ma ngole tüikya nang khünaknu, JOWANPA thüile, hünzom a müimamakya süpahi changle le chiza angkya chichangba abüt-abanle chichang angkya akaxle. Azankya a Zang füifüi changpu, hünzom füifüile münchang.

¹⁶Hwom Ziz lomnu makhange laipongma ngainyix singkox. Faokha to ngokya Jeruel nok to le angkya haxsha oshuk chito hünzome hwom apongle changüi.

¹⁷Ija zanhok ma hünzom azan ngo angkya jao münchang. Hünzome chwon koplax ilaxle hule ngolax; JOWANPAe hünzom ang lüt ang tomkya hünzome ngün ang kopüi. Judah hia Jerusalem angkya khünaknu, cha-ao-mongsaokya hia zakya taxtüi. Zan to kakox, JOWANPAe hünzom to asun angkya changle!”

¹⁸Ifüima wanghompa Jehusafat a hax to thüne thule akhux, ilaxle chix füi tomle khünaknuechu akhuxle noknusae JOWANPA to shwom.

¹⁹Kohath hia Korah saxthom angkya Liwi hwom ajong ilaxle akhongle JOWANPA, Israel nok Zang mün achuak.

²⁰Ngainop ningle swomsa ma wüi khünaknu a Tekoa nok zui ma tüikya faochi to pao. Hwom ka ang laipongma, Jehusafat-e ile pünzün-wangsaile chang: “Judah hia Jerusalem angkya khünaknu! JOWANPA, hünzom Zang to mongong tüikox, ile jangchangba hünzom shingmongle ajong ang thoüi. Chix ajebue akaxkya kax to mongongkya tüikox, ikoxle hünzome lütkya kopüi.”

²¹Khünaknu füi künzang mongzangwünle changkya füima, dingpabu ang hwome zomzing pongma laxkya zu alik angkya tamchu “JOWANPA achuak kox! Chix mongkün ma oshuk müntüi!”, le akhongkya füi, süpahibu tunthoma thothutle le angkya wanghompa-e kaxkox.

²²Chemtue hwome tsai ngaopuix, ija füi tomle JOWANPAe single hüingokya süpahibu tüle chabüt-lasünle chang ang tom.

²³Amon nok hia Moab nok süpahibue Edom nok süpahibu to single hwome komkaile amüt, ilaxle hwom tata füi alünle khamkhitle jao azan.

²⁴Chemtue Judah nok süpahibu sak-hax ma tüikya zanhunui alople changpuix, hwome zan nokbu to hukoxle hwom pangwüi mang ang achangle hax ma nguakle ngokya ngün. Hwom opupuchu paole azang ang chikop.

²⁵Jehusafat hia chix süpahibu a ibu tuina tsui ang zik, ilaxle hwome tsom-pom, süt-wong, nyi-za, iboma mama thalix tuinabu huanuma kop. Hwome ibu tuina tswonle ikhato nyix azom nui, ile ikhama hwome chitsuile dantoxkya oli chemchu chitüi.

²⁶Nyix ali lükya to hwom Berakah Haxsha ma asox ilaxle JOWANPAe chempang mokdaopuix, ibu hanpakma chix achuak-afuale chang. Ikhoma ija haxsha ang “Berakah.”

²⁷JOWANPA hwom zan to anaole changkya khoma, Jehusafat-e thothut laxle süpahibu hwom Jerusalem to sungdün ahukle chat.

²⁸Chemtue hwome tingnu alople changpuix, thuaput-waxmaibu hia nyazongbu mütle hwom Zangshwom-Hom to ngui.

²⁹Chemle JOWANPAe Israel nok zanpabu to lütle changpuix, ija ozing atatkya pangwüi abüt,

³⁰ikhoma Jehusafat-e tumüi-lomkhaole apün-awang, ilaxle pangnu lomkua towüi Zang-e chix kho awale thom.

³¹Jehusafat a Judah nok wanghompa ang zanglao 35 ma tüipongma achang ilaxle chixe Jerusalem ma zanglao 25 apünle ngo. Chix honu a Azubah changkya; she a Shilhi sacha changkya.

³²Chix tho angkya hopa Asa lailaile, chixe JOWANPA mik-hu ma chem supuix ijaja mok,

³³ikoxlechu songsari baozangbu to shwomkya onuibu a chiama. Ikhoma hwom pupabu Zang to shwom angkya hanpakma khünaknu a mongpak-fünthole künlop-monglüikya kha chitüi.

³⁴Jehusafat-e mokkya oli pangwüi, owang makhange oshuk ma lünle, Hanani sasün Jehu Pukax Laipex ma zale tüile. Ija laipex a Israel Nok Wanghombu Pukax laipex füikya changle.

³⁵Hanpak tuita ma Judah nok wanghompa Jehusafat-e Israel nok wanghompa Ahaziah, owae huanuma chichang-chizang mwot mokle changdaopuix, chix füi nokmüi zing.

³⁶Ezionzebar ma hokhie tinu mongto aham angkya khuanubu zing.

³⁷Ikoxlechu Mareshah tinglong angkya Dodawahu sasün Eliezar-e Jehusafat ang kaxkhün koxle akax: “Nange Ahaziah füi nokmüi zingkya khoma, hünzome chempang zingdaopuix ibu a JOWANPAe pünle amaüi.” Khuabu pangwüi akhixle pao ilaxle tamngaxchu tinu mongto cheile aham ang chitho.