Read Wancho Naga 2 Pukax-Pangao 21 Bible Online

2 Pukax-Pangao 21 - Wancho Naga bible

2 Pukax-Pangao 21

¹Jehusafat zile pao, ilaxle chix a Dawid Tingnu angkya wanghom hwom zukting ma akhün. Chix man ma chix sasün Jehoram wanghom ang achang.

²Wanghompa Jehusafat sasün Jehoram ang tüita naopa hwom azok: Azariah, Jehiel, Zekariah, Azariahu, Mikail, ilaxle Shefatiah hwom bibi tüikya.

³Hopae hwom ang hun, khop hia mama-mama thalix tuinabu huanuma kox, ilaxle hwom pangwüi Judah haxtok angkya pan zailaxle ziakople thomkya tingnubu tuipong to hu angkya hünlit koxle thom. Jehoram a tüichongsa chang koxle Jehusafat-e chix man ma wanghom ang kam.

⁴Chemtue Jehoram a wangting to ole shingmongle tüikya hex, ipongma chixe chix tüita-naopa hwom pangwüi langle awüt, iboma Israel nok lompabu chuwüi züizüi langle awüt.

⁵Jehoram ang zanglao 32 ma wanghom ang achang, ilaxle Jerusalem ma chixe zanglao achyet apün.

⁶Chix kakonu ang Ahap sacha laxle tüikya khoma chixe wanghompa Ahap angkya hia Israel nok wanghombu angkya chichang-chizang hwon lax, ilaxle chixe JOWANPA zongto ochax lyen,

⁷ikoxlechu wanghompa Dawid füi tuita tsaosaxle, chix sixli hwome jento apün-awangle ngo angkya hex-ole akaxkya chix kax tüikya khoma Dawid wangting olithule amüt angkya JOWANPA mong chitsu.

⁸Jehoram-e apünle ngokya tuk ma Edom noke Judah nok füi alünle ajong ilaxle hwomchu pongwün wangting ang achangle pao.

⁹Ikhoma Jehoram hia chix süpahi lompabu man-kanlinbu füi kalaxle Edom nok to sing. Ikhato Edom nok süpahibue hwom akhople kop, ikoxlechu zangnak ma hwom oba hyetle paole azang.

¹⁰Imakhange Edom nok a othuithui hanpak ang Judah nok chak tokya pongwün nok ang achangle pao. Jehoram-e JOWANPA, hwom pupa hwom Zang hato tok ahole changkya khoma, ipong ponge wüi Libnah nok chuwüi hwom füi alünle ajong.

¹¹Judah haxtok ma tüikya haxkhobu to chixe songsari baozangbu to shwom angkya onuibu zaile alai ilaxle Judah hia Jerusalem ma ngole tüikya khünakbu ang JOWANPA zongto ochax lyenle chang ang tom.

¹²Ajepa Elija-e Jehoram hato laiza tuita akat. Ija laiza ma ile za: “JOWANPA, nang putong Dawid Zang-e nang a ajao-ahaidaoa, chemthüikoxle nange hünpa wanghompa Jehusafat ningle chimok chichangba hünpu wanghompa Asa ningle chimok.

¹³Itülüi thüikox nange Israel nok wanghombu mantole chang ilaxle Judah hia Jerusalem angkya khünaknu ang, wanghompa Ahap hia chix füima Israel nok ma wanghom ang achangkyabue mokkya lailaile, Zang to mongongkya chitüi homtoxle ngo ang tom. Nange nang füi ataitoxle khünak mixmüibu changkya nang tüita naopa hwom ngaxchu langle awütpu.

¹⁴Ija khokho ma JOWANPAe nang khünaknu, hünzom naosombu to, hünzom kakonubu to sikangünle changüi ilaxle hünzom tingtok komkaile amüt ang tomüi.

¹⁵Nang jaojao chuwüi wok ma kak paxle changüi, ilaxle ija a nyixfokya to sükhün-sükhünle khünle paoüi.”

¹⁶Züizüi Filistia hia Arab nokbu, shuakax achole Etheopia nok ngole tüikya khato ating-anokle tüikya. JOWANPA khünak ibu a Jehoram zan to kale chang ang tom.

¹⁷Hwome Judah haxtok hwople kop, wanghom homkha tsuile pao, ilaxle naoshukpa Ahaziah tata toxlaxle wanghom kako wangnu wangchabu hia sasün hwom pangwüi zanda ang kople pao.

¹⁸Ibu ile changkya füima JOWANPA wanghompa hato che ma kak pax ang tom.

¹⁹Ija kak koplaxle zanglao anyi fuxtsüi ngokya füima wanghompa a nuzao ashukle zile pao. Chix wangpünbue, thochima wanghombu zipongma, hwom mongma ahole, ha athünlaxle wüntakle changkya ningle wün chitak.

²⁰Jehoram a zanglao 32 ma wanghom ang achang laxle Jerusalem ma chixe zanglao achyet apün. Chix zipongma owa mong tochu chikak. Hwome chix Dawid Tingnu ma akhün, ikoxlechu wanghom hwom zukting ma chichang.