Read Wancho Naga 2 Pukax-Pangao 24 Bible Online

2 Pukax-Pangao 24 - Wancho Naga bible

2 Pukax-Pangao 24

¹Joash a Judah ma zanglao anüt towüi wanghom ang achang, ilaxle chixe Jerusalem ma zanglao 40 apün. Chix honu a Zibiah, Bersheba tingnu angkya mixcha changkya.

²Nguapa Jehoiada ozün ma ngokya kople chixe JOWANPA zong sukyakya wüi mok.

³Jehoiada-e wanghompa Joash hanpak ang kakonu anyi zün, ilaxle hokhie chix ang sasün hia sacha hwom puxle kox.

⁴Chix wanghom ang achangkya füima aluile chingo homtoxle chixe Zangshwom-Hom azünle zingle amüi angkya mongtsu.

⁵Zangpua fole Zangshwom-Hom zaikya mwot alan angkya hanpakma Judah angkya tingnubu to paolaxle khünaknu angkya ngun okhonguile sai angkya hanpakma chixe nguapabu hia Liwi hwom tsan. Chixe hwom a mom-momle mok angkya akax, ikoxle Liwi hwom shenle ngo,

⁶khünaknu süi saile chichangkya büthüikoxle chingünpu? (

⁷Ija chimüikya mixnu, Athaliah füito azuikyabue Zangshwom-Hom huanuma ajo-ajüile awüt ilaxle otsao tuinabu huanuma Bal shwomkya khato laxle ngo.)

⁸Wanghompa-e Liwi hwom ang saikya ngun sho angkya suak zinglaxle Zangshwom-Hom fülom ma dan angkya kax kox.

⁹Ami faokha to tüipongma Mosa-e saikya othui süisai JOWANPA hato apüile kox angkya hanpakma Jerusalem hia Judah angkya khünaknu pangnusa hato kaxho apao.

¹⁰Ijae khünaknu hia hwom lompabu ang mong amüi, ilaxle hwome ma süibu apüile shokyae ija suak awang.

¹¹Ija angkya ngun akiak ang thomkya okax-okhobu hato Liwi hwome ija suak nyixfole apüile kox. Ija awangle changfofo, wanghom chakzamix hia Nguakho to fong ang ngokyabue ikha angkya ngun dok ilaxle suak chatle onui ma wüi danle tox. Ile hwome ngun huanuma saile athün ang kop.

¹²Wanghompa hia Jehoiada nyie ngun ibu a Zangshwom-Hom azünle zaikya mwot akhi ang ngokyabu chak to kox, ilaxle hwome long swon mixbu, pün mwot mokkyabu, ilaxle jan mwot mokkyabu omün ang kox.

¹³Hwome pangnusae mwot azongle mok, ilaxle Zangshwom-Hom a amipongkya lailaile, tüle haxtak-zangmongle zingle amüi.

¹⁴Chemtue ija azünle zaikya mwot tsuakle hüipuix, ota-otua tüikya hun hia khopbu a wanghompa hia Jehoiada nyi ang achatle kox; ilaxle hokhie ibu a Zangshwom-Hom ama lax angkya khup hia tiklakbu zing ang twon. Jehoiada ozün ma ngokya kople, Zangshwom-Hom ma töbu chithaile koxle ngo.

¹⁵Chix a müimamale azule zanglao 130 nguile changkya füima zile pao.

¹⁶Israel nok hanpakma, Zang hanpakma tamchu Zangshwom-Hom hanpakma chixe mokle hüidaokya mwotbu to e-sekya ningle hwome chix mang a Dawid Tingnu ma wanghom hwom zukting ma akhün.

¹⁷Ikoxlechu Jehoiada zikya füi shemle, Judah nok lompabue wanghompa Joash a hwom kax ma laxle chang angkya jikle tsuak.

¹⁸Ikhoma khünaknu Zangshwom-Hom ma JOWANPA, hwom pupa hwom Zang to shwomkya zakle max, ikoxle chapabu hia baozangchanu Asherah muabu to shwom ang süt. Hwome lyenkya ija ochax khoma Judah hia Jerusalem hato JOWANPA mongtsik ahüi.

¹⁹Hwom chix hato chatle chang angkya hanpakma kaxkhün fa ang JOWANPA ajebu ahüi, ikoxle khünaknue hwom kax to chiapa.

²⁰Ipongma nguapa Jehoiada sasün Zekariah to Zang chasae khui-wai. Khünaknue ngün ang kopkya onui ma chix ajong ilaxle akhongle thüi: “Chix kaxtom kax ma chilaxle, ma hato alüile thama apüile hünzom büthüikoxle tüipule JOWANPAe hünzom ang thüitüia! Hünzome chix hato tok ahopu, ikhoma chixe hünzom danle toxdaoa!”

²¹Zekariah amüt angkya khualop zangwün khato wanghompa chuwüi hak, ilaxle Zekariah a Zangshwom-Hom lopsha ma long füi thuple lang angkya chixe khünaknu ang kax kox.

²²Zekariah hopa Jehoiada-e ipongpongle chix mwot mokle koxkya wanghompae alakle awüt, ilaxle chixe Zekariah mik max ang tom. Zekariah zakshuüi khakhama: “Nange chem mokpuix ija JOWANPAe naxngünkox ilaxle nang to sikangünle naxchang kox”, le akhongle soplaxle zile pao.

²³Ija zanglao tsozit wazit ma Siria noke Judah hia Jerusalem tingtakle ngui, hwom lompabu pangwüi langle awüt, ilaxle tui-mwot huanuma tsuilaxle hwom Damaska to chat.

²⁴Khünaknue JOWANPA, hwom pupa hwom Zang chilaxle awütkya khoma, Siria nok süpahi hiadaole wüi changkoxchu müimamale tüikya Judah nok süpahibu to lüt ang chixe tom. Ija ningle wanghompa Joash to sikangün.

²⁵Chix to ziamale jao maklax, ilaxle zan nokbu chatle changkya füima, chix süpahi mixsün anyie, nguapa Jehoiada sasün mik max ang tomkya olüix khomkya ningle lyakho angkya chix lang ang tung laxle chix mik amüt. Chix a Dawid Tingnu ma akhün, ikoxlechu wanghom hwom zukting ma chichang. (

²⁶Atsing laxle chix mik amütkya mixsün nyi a, Shimeath le amünkya Amon nok mixcha sasün Zabad hia Shimrith le amünkya Moab cha sasün Jehozabad nyi changkya.)

²⁷Wanghom hwom Pukax Laitong ma Joash sasün hwom pukax, chixe apong angkya shoma bama ajekyabu, chixe Zangshwom-Hom chemle zingle amüipuix, ibu zale tüile. Chix sasün Amaziah a chix man ma wanghom ang achang.