Read Wancho Naga 2 Pukax-Pangao 25 Bible Online

2 Pukax-Pangao 25 - Wancho Naga bible

2 Pukax-Pangao 25

¹Amaziah a zanglao 25 ma wanghom ang achang, ilaxle chixe Jerusalem ma zanglao 29 apün. Chix honu a Jerusalem angkya Jehoadin changkya.

²Chixe JOWANPA zongto sukyakya wüi mok, ikoxle zaxkak ashukle mok.

³Chixe oshing mongle apüile hüikya zuma, chixe hopa mik amütkya nguakax-wangkhobu lang.

⁴Ikoxle chutix chixe hwom susabu a chilang, ikoxle Mosa Wanlom ma tüikya: “Naosombu ochax khoma nu-pa hwom mik amüt angkya münchang, ija ningle nu-pa hwom ochax khoma susa hwom mik amüt angkya münchang; mae mokkya ochax mwot khoma tix khünakbu a mik max ang tom angkya oli!” lükya JOWANPA kaxtom kax ma lax.

⁵Wanghompa Amaziah-e Judah hia Benjamin homjen angkya khünakbu pangwüi othom-thom ma, saxthom-saxthom ma asüile süpahibu ang zingle dan, ilaxle jatpong thakma hia hopong thakma lompabu kamle dan. Ikhama zanglao 20 makhange thakchichi lüka sühuak pangwüi wom, pangnu athüt koxle mixhuak 300, 000 tüikya. Ibu a zünle kopkya süpahi othom, azan ang achwonle ngokyabu, pax hia di, ibu twon ang olüi awandaokyabu.

⁶Ija to bole chixe Israel nok angkya süpahi 100, 000, khop otuak ma ton ali koxlaxle shakle lax.

⁷Ikoxlechu ajepa tuita wanghompa hato nguilaxle chix ang thüi: “Ibu Israel nok süpahibu nang füito laxlaxle taxpao. Ibu Shuakux Wangting angkya khünakbu füi JOWANPA müntüi.

⁸Nange thütüi koxlax, ibue azan pongma nang sisile tsak-zongle chang ang tomüi, ikoxle nange lüt ang hia nang to lüt ang tomkya a Zang tix changpu, ilaxle chixe nang to zannokbue lüt ang tomüi.”

⁹Amaziah-e ajepa ma atüi: “Ikoxle kue hwom mün to koxdaokya khopbu a chemle changüi?” Ajepae lan: “JOWANPA nang ang ithak to lyemle kox ang thoüi!”

¹⁰Ikhoma Amaziah-e shakle laxkya süpahi mahom-hom to chatlax le achat. Ija khoma hwom a Judah nok füi zongbakle mongma laxle hom to chat.

¹¹Amaziah-e chix mong achen ilaxle Humnu Haxsha to chix süpahi othom zunlaxle ka. Ikhato hwom azan ilaxle Edom nok süpahi 10, 000 lang,

¹²ilaxle ozün ma mama 10, 000 lole kop. Hwome ozün ma lole kopkya zanpabu Sela tingnu angkya zakkho to dün ilaxle ibu zakthong to tswonle awüt, ile ibu a zakthong tokya longbu to futle zi ang tom.

¹³Ipongma Amaziah-e achatle toxkya Israel nok süpahibue Samaria hia beth Horon nyi ba angkya Judah nok tingnubu tingtakle 3000 khünak lang, ilaxle tui-mwot huanuma tsuile pao.

¹⁴Edom nok to lütlaxle Amaziah chatkya zuma, chix füi tomle chixe ibu noke shwomkya chapabu laxlaxle chat, ibu ajong, ibu to shwom, ilaxle ibu ang ongan müikya sobu zokle kox.

¹⁵Ile changkyae JOWANPA ang mongtsik adün, ikhoma chixe Amaziah hato ajepa ahüi. Ija ajepae ngangle sa: “Nang chak tokya hwom khünakbu khosele kop ang ngaxchu chithokya mixnok baozangbu to nange büthüikoxle shwompu?”

¹⁶Ija kax apale Amaziah-e thüi: “Chemtu makhange kwome nang wanghom zün angkya wangnak-wangshem ang achang daopu? Nange taxakax ngo, kue nang langle awüt langa!” Ajepa kax zak, ikoxlechu chixe ija kax tsuakle tox: “Nange ibu mwot mokkya hia ku zünkax-saikax to na chithale changkya khoma, athaxpi JOWANPA nang mik amüt angkya mongzangwünle tsuakdaoale kue awandaoa.”

¹⁷Wanghompa Amaziah hia chix nguawang hwome Israel nok zan to ka angkya olom zing. Ifüima chixe Israel nok wanghompa Jehoash hato azan angkya tsiakle kaxho tuita akat. Jehoash a Jehoahaz sasün, Jehu susün changkya.

¹⁸Jehoash-e Amaziah hato kaxnong ija achat: “Hanpak tuita ma Lebanon Haxnu angkya kongbüi-zu tuitae sedar pün hato, chix sasün ma chix sacha laxhüi, le jukya kaxho tuita akat. Ipongma faomüi tuita le le asu, ijae kongbüi-zu to tingle akhüntox.

¹⁹Amaziah, athax ang a Edom nok to lüttsuakpule angamle tsaichong-kaxbongle changtüi, ikoxlechu kue nang ang ojongtochu chipaole hom ma nui angkya kax koxpu. Nang hia nang khünaknu hato thama apüi lan angkya tingtui omalax ang adünle ngolaxpu?”

²⁰Ikoxlechu Amaziah-e ija kax to ojao chiapa. Chixe Edom nok chapabu to shwomle changkya khoma, zane chix to anao angkya a Zang mongtex changkya.

²¹Ikhoma Israel nok wanghompa Jehoash a Judah nok wanghompa Amaziah füi azan ang ka. Okhi a Judah angkya Beth Shemesh ma apong.

²²Judah nok süpahibu to lüt ilaxle hwom süpahibu a mahom-hom to zikle pao.

²³Jehoash-e Amaziah kop ilaxle Jerusalem to apüi. Ikhato chixe Efraim Pan makhange Komar Pan alople olwot ma fak 200 tukuxle chixe tingnu pan atsun.

²⁴Chixe Zangshwom-Hom angkya tuinabu tuita zan ma kopkya ningle chixe Samaria nok to laxlaxle chat. Tuina ibu a Obed Edom sixli hwome nyele thomkyabu, tamchu wanghom hwom tui-mwotbu changkya. Anaole chu chixe chix füi tomle kople thomkya khünakbu chuwüi laxlaxle chat.

²⁵Judah nok wanghompa Amaziah a Israel nok wanghompa Jehoash to zanglao 15e nüile tsünlole ngo.

²⁶Chixe apünle hüikya pongwang tokhange oshuk alople Amaziah-e mokkya mwot pangwüi Judah hia Israel Nok Wanghombu Pukax Laipex ma zale thomle.

²⁷Chixe JOWANPA zongto chichangle omok wangkya tokhange, Jerusalem ma chix mik amüt angkya oshua lomle ngokya tüikya. Oshuk ma chix a Lakish tingnu to pao, ikoxlechu chix zanpabue chix tole ikhato ngui ilaxle chix langle awüt.

²⁸Chix mang a mankho ma angat laxle Jerusalem to apüi, ilaxle chix a Dawid Tingnu angkya wanghom hwom zukting ma wün to zokle ashun.