Read Wancho Naga 2 Pukax-Pangao 26 Bible Online

2 Pukax-Pangao 26 - Wancho Naga bible

2 Pukax-Pangao 26

¹Judah angkya khünaknu pangnusa mongtsu laxle Amaziah sasün Uzziah, zanglao 16 nao, hopa man ma wanghompa ang kam. (

²Amaziah zile paokya füima Uzziah-e Elath kop ilaxle ija tingnu tamchatle zingle amüi.)

³Uzziah a zanglao 16 ma wanghom ang achang, ilaxle chixe Jerusalem ma zanglao 52 apün. Chix honu a Jerusalem angkya Jekoliah changkya.

⁴Hopa thüi anole, chixe JOWANPA zongto chem supuix ija mok.

⁵Zanglom ma chix to zünsaile ngokya mix Zekariah ozün ma ngokya kople, chixe mongong tüikya füi JOWANPA thothale chang, ilaxle Zang-e chix to mohiman.

⁶Uzziah a Filistia nok zan to ka. Gath, Jamnia, ilaxle Ashdod, tingnu ibu angkya pan long katukbu chixe thuple atsun, ilaxle Ashdod zui ma tamchu Filistia haxtok pangnu khato chixe tingnubu zinglaxle pan zaile ziakople thom.

⁷Filistia nok to lüttsuak angkya bama Zang-e chix to fong, ile chixe Gurbal ma ngole tüikya Arab nok, tamchu Meun nok, ibu to lüt.

⁸Amon noke Uzziah ang süi tha, ile chix a Ijip nok alople zangle wünkya tsak-zong füikya tuita ang achangle pao.

⁹Komar Pan, Haxsha Pan, tamchu long katukbu kwotkya khakha ma zanhunuibu zaile alaile Uzziah-e Jerusalem ziakopkya a oshing among.

¹⁰Chix ang hannopchi haxnucha hia haxsha to chix ang müizyembu huanuma tüile ngokoxle, chixe tatok tochu zanhunuibu zing ilaxle tiluabu thole alai. Chixe manzai to mongkün, ikhoma haxhuabu to grepbu küile ali angkya tamchu haxzao tüikya khato küisa-wüili alaile mokmo angkya khünaknu ang zong adün.

¹¹Chix ang zan to ka ang achwonle ngokya süpahibu huanuma tüikya. Ibu mwot pangwüi, wanghom khua angkya alixachong tuita Hananiah apua-anole fakya kax ma laxle, chakzamix Jeiel hia Maseiah nyie lai ma zale thom.

¹²Chix süpahibu a 2, 600 lompabue azuile tüikya.

¹³Hwom fang ma, wanghompa khose ang awale azan ang thokya süpahibu 307, 500 khünak huak tüikya.

¹⁴Uzziah-e chix süpahibu ang di, paxlo, jan khohom, jan nyipong, hapnu hia san, zothup longtom, ibu pangwüi apongle kox.

¹⁵Jerusalem ma chix zingpabue sanhapbu zing tamchu ding tokhange thuple adüt angkya hanpakma zanhunuibu hia long katuk khwotle tüikya khato longnubu adün. Chix zing tüle chongle pao, ilaxle Zang-e chix to fongle changkya tokhange chix a tüle tsak-zongle tüikya mix ang achang.

¹⁶Ikoxlechu chemtue chix tüle tsak-zongle changpuix, Uzziah a mongngam füikya mix ang achangle pao, ijae chix athomle adüt. Zangshwom-Hom to ongan müikya so zokle tö koxkya tö-tsap ma chixe ongan müikya so zokle changkya khoma, chixe JOWANPA, chix Zang akhu ang tom.

¹⁷Nguapa Azariah, chix boma otsak-ozong füi tamchu mongchongle tüikya nguapabu 80 koplaxle, wanghompa abax angkya hanpakma chix füito azuile nop.

¹⁸Hwome thüi: “Uzziah! JOWANPA ang ongan müikya so zokle kox angkya nang mwot münchang. Ija mwot mok ang Arun makhange hüikya nguapabue tix ija mok tsuak angkya le hwom atsao thompu. Ija otsao nui angkya laiün. Nange JOWAN Zang zongto chimüikya mwot suadaoa, athax nang ma mohiman chemchu müntüi.”

¹⁹So khua koplaxle Uzziah a Zangshwom-Hom angkya ongan müikya so zokkya tö-tsap zui ma ajongle tüikya. Chix ang nguapabu füi mong huanuma tsik, ifüi shemle chix khangpong makhange ngwon kak ngai.

²⁰Azariah hia hozui nguapabue wanghompa khangpong to khomtsile hu ilaxle chix a Zangshwom-Hom angkya laile pao ang atsang. Chix to JOWANPAe sikngün koxdaokoxle ikha angkya chix a nonokhaile pao.

²¹Ija ngwon kak khoma wanghompa Uzziah a chix tsüntsün ma zanglom ma chitsaokya mix ang ngo. Chix a Zangshwom-Hom to tamchatle nop ang chitho, chix a homkha lanlan ma ngole hom, chix-süt chix-mwot komkaile danle tox, ilaxle chix sasün Jotham-e wangting apün-adale chang.

²²Chixe apünle ngopongma Uzziah-e chempang mokpuix ibu pangwüi Amoz sasün ajepa Isaia-e chakza ma thom.

²³Uzziah a zile pao, chix a wanghom hwom zukting ma akhün, ikoxle chix ma ngwon kak tüikya khoma wanghom hwom zuk-kha to a chisho. Chix sasün Jotham a chix man ma wanghom ang achang.