Read Wancho Naga 2 Pukax-Pangao 28 Bible Online

2 Pukax-Pangao 28 - Wancho Naga bible

2 Pukax-Pangao 28

¹Ahaz a chix zanglao 20 ma tüipongma wanghom ang achang, ilaxle chixe Jerusalem ma zanglao 16 apün. Chixe hopu Dawid angkya müikya zanglom chilax, ikoxle cheme JOWANPA ang mong amapuix, chixe ijaja mok.

²Chixe Israel nok wanghom hwom hwon lax. Chixe jan makhange zingkya Bal mua thom,

³ilaxle Hinnom Haxsha ma ongan müikya so zok, ilaxle Israel khünaknu nguile ngopongma ija haxtok angkya JOWANPAe jwonle apaokya khünakbue mokkya nushix dongkya mwot thüi anole chapabu ang zokle tö tuita ningle chixe sasün ngaxchu wüi zokle ashunle kox.

⁴Songsari baozangbu to shwomkya nui, haxkhobu to tamchu pünnubu tong to Ahaz-e töbu kox ilaxle ongan müikya sobu zok.

⁵Wanghompa Ahaz achaxkya khoma, JOWANPA, chix Zang-e chix to Siria nok wanghom ang lüt ang tom tamchu Judah khünakbu zanda ang koplaxle Damaska to pao ang tom. JOWANPAe Israel nok wanghompa Pekah, Remaliah sasün ang chuwüi wanghompa Ahaz to lüt ang tom, ilaxle chixe nyixtakya fang ma Judah nok zankat naomüibu 120, 000 khünak langle awüt. JOWANPA, hwom putong hwom Zang-e ija ile chang ang tom, chemthüikoxle Judah khünaknue chix hato tok aho.

⁷Israel nok süpahi tuita Zikri le amünkya mixsüne wanghompa Ahaz sasün Maseiah, khwa ma nguakax-wangkho Azrikam, ilaxle Elkanah, owa wanghompa füi atakya mix changkya hex, hwom bibi mik amüt.

⁸Judah noke chuwüi hwom zongto mamix chang koxlechu, Israel nok süpahibue mixnu-naosa pangwüi athütle 200, 000 khünak kop ilaxle Samaria to zanda ang laxlaxle pao; hwome tui-mwotbu chuwüi müimamale tsuile pao.

⁹Oded le amünkya JOWANPA aje tuita Samaria tingnu ma ngole tüikya. Judah nok zandabu koplaxle chatüi Israel süpahibu ija tingnu alop-hax khakha ma chix füi apong. Chixe hwom ang thüi: “JOWANPA, hünzom putong hwom Zang a Judah nok füi mongma laxle hünzom ang lüt ang tompu, ikoxlechu athax a hünzome hwom to chisumüile hwonle ibu mik amütkya chix na to wangle changdaoa.

¹⁰Athax chaktung-chaktung ma Jerusalem hia Judah angkya khünakbu, sheko lüka pangwüi hünzom dabu ang achang ang hwonpu. Hünzome chuwüi JOWANPA zongto ochax lyenle changkya hünzom texle münatak hexnyi?

¹¹Ku kax to apalax! Zanda ibu a hünzom tüita naopa hwom changpu. Ibu pao ang dankox, chichang thüiningle hünzom tochu JOWANPAe chix mongtsiktsik ma sikngün fakya tüiüi.”

¹²Shuakuxchi Wangting ma lompa tüichong hwom mixsün ali, Jehohanan sasün Azariah, Meshillemoth sasün Berekiah, Shallum sasün Jehizkiah, ilaxle Hadlai sasün Amasa hwome chuwüi süpahibu füi ile mokkya to münmüi lüwüi thüi.

¹³Hwome thüi: “Zanda ibu ikhato taxapüi! Keme JOWANPA zong ochax lyenle changdaoa ilaxle kem ang sikngün fatang le chix ang mongtsik adündaoa. Athax hünzome süchongchongle kem thaikya alai angkya oli moksele tsungopu.”

¹⁴Ikhoma süpahibue zandabu hia tui-mwot pangwüi khünaknu hia hwom lompabu chak to kox,

¹⁵ilaxle ibu mixsün ali a zandabu ang nyi-za hia tui-mwotbu ahanle kox ang kam. Hwome khünaknu ang awun angkya nyi-za hia sox angkya chisox, ibu kox, osüt-oling okhonguile kox, ilaxle hwom makbu to olip münga füi zole kox. Oham jao chithole ashole maxkyabu a mantsakbu khoma angatle lax, ilaxle ibu zandabu a Judah nok longzipong, pam pünbue awangle tüikya Jeriko tingnu alople chatle tox. Ifüima Israel nokbu a Samaria to hwom hom to chat.

¹⁶Anaole chuwüi Edom noke Judah nok tingtakle chang ang süt, hwome zandabu müimamale kop, ikhoma wanghompa Ahaz-e Asiria nok chongwangpa Tiglath Pilesar ma, hwom asun angkya hanpakma tsaiju-kaxju.

¹⁸Ipongponge wüi Filistia nokbue hannopchi haxchithong tokya tinglongbu hia shuathongchi Judah tingtakle chang. Hwome Beth Shemesh, Aijalon, ilaxle Gederoth, ilaxle Soko tingnubu, Timnah, ilaxle Gimzo, ibu hia hwom tingkhuabu hwople kop ilaxle ikhato onyem ang tingtan nokzing laxle ngo.

¹⁹Judah nok wanghompa Ahaz-e chix khünaknu angkya tingpu chifün amütle tamchu JOWANPA mün amale changkya khoma Judah nok hato tingtui apüi.

²⁰Asiria nok chongwangpae Ahaz to fonghax kux tsyen to, chix füi alünle ajong ilaxle tingtui adünle kox.

²¹Ikhoma Ahaz-e Zangshwom-Hom hia wanghom khualo ma tüikya tamchu khünaknu lompabu chak to tüikya hunbu chongwangpa chak to kox, ikoxlechu ijae tüta pong chithap.

²²Chix tingtuibu huanu ziama ma changpong khae, ija mixsün Ahaz-e ozangjang to kaile JOWANPA zongto ochax lyen.

²³Chix to lütle changkya Siria nok baozangbu ang chixe töbu koxle chang. Chixe thüi: “Siria nok baozangbue Siria nok wanghompa to asunle, iningle kue chu töbu koxle jangchang, hwome ku tochu asunle changüi.” Ijae chix tamchu chix wangting hato thama apüi.

²⁴Ija tok to, chixe Zangshwom-Hom angkya otsao tuinabu lax, ibu thuple akhix. Chixe Zangshwom-Hom hak ilaxle Jerusalem pangkha towüi baozangbu to shwom angkya tö-tsapbu zaile alai.

²⁵Judah haxtok angkya tingnu hia tinglong pangkha towüi chixe songsari baozangbu to shwom angkya onui zaile alai, ikhato hwome mixnok baozangbu ang ongan müikya sobu zokle tö kox. Ija ningle chixe ma hato alüile, hwom putong hwom Zang, JOWANPA mongtsik ahyenle lax.

²⁶Pongwang makhange oshuk ma lünle, chixe mwot hia apongle hüikyabu pangwüi Judah hia Israel Nok Wanghombu Pukax Laipex ma zale tüile.

²⁷Wanghompa Ahaz zile pao, chix a Jerusalem ma akhün, ikoxlechu wanghom hwom zuk khato chisho. Chix man ma chix sasün Hezekiah a wanghom ang achang.