Read Wancho Naga 2 Pukax-Pangao 3 Bible Online

2 Pukax-Pangao 3 - Wancho Naga bible

2 Pukax-Pangao 3

¹Solomon hopa, wanghompa Dawid-e Zangshwom-Hom ajong angkya homting to achale wüi humele tox. Ija onui a Jerusalem angkya Moriah Haxnu ma, Dawid füi JOWANPA apongkya kha ma changkya. Ikha a Jebu sün Araunah-e chix tsaxnaknui ang laxle ngokya kha.

²Chix wanghom ang achangkya zanglao ali lyetjang anyi lükya to wanghompa Solomon-e homzai mwot owang wang.

³Solomon-e zaikya Zangshwom-Hom a olwot ma fit 90 ilaxle okhao ma fit 30 le tüikya.

⁴Nam-nopkya kha nui a, hom khaokhao bakle, fit 30, ilaxle ochuak ma fit 180 tsuale tüikya. Hommongkha a hun tsao-tsao füi lile tüikya.

⁵Lopsha a sedar pün füi kaxkom zaile tüikya ilaxle ija a hun füi lilaxle chwople tüikya, ibu ma pam-pün hia janbüibu noksa zingle tüikya.

⁶Wanghompa-e Zangshwom-Hom a Parwai nok tokya apüikya thalix long hia hun, ibu füi aza-apuale zaile tüikya.

⁷Chixe Zangshwom-Hom katuk, shatkwon, kapox hia kahak, ibu to li ang hun lax. Katuk ma homzai mixbue ozang füikya zünmokbu. Zingle alai.

⁸Ataxkya Otsao Nui a olwot ma fit 30 ilaxle okhao ma fit 30, ija a Zangshwom-Hom okhaokhao bakle tamle tüikya. Ija Ataxkya Otsao Nui Katukbu to chwop ang hun 20 metrik ton to nüile bak;

⁹janlak zing angkya hun tuak 570 lax, ilaxle thakchi angkya nui katukbu tochu hun füi wüi chwop.

¹⁰Homzai mixbu füi, wanghompa-e jan makhange ozang füikya zünmok anyi zailaxle ibu to hun füi chwop ilaxle Ataxkya Otsao Nui ma dan angkya kax kox.

¹¹Ija nyi a, atale, fülom chito othüne hule ajong. Pangnyi ang wüi ozang tuipong sok 5 pong khaole, ozang anyi-nyi pong zaile tüikya. Ozang kaoponge machichi katuk to lyet ilaxle tuipong a nui osung wama tata zang füi apongle, sok 18 tukux khaole pünlaxle tüikya.

¹⁴Ataxkya Otsao Nui ma atsyenkya nyi a jak füi hia mama zibu füi takle nakle hing, lumle khi ilaxle nakle-nakle khikya zong koxlaxle ozang füikya zünmok ningle aza-apuale tüikya.

¹⁵Wanghompa-e long thongnu anyi zing, pangwüi sok 15 pong chuakle, ilaxle ibu a Zangshwom-Hom homtho ma küi. Pangnyi ma wüi thongkho sok 3 pong chuakle tüikya.

¹⁶Thongkho akixkya khama apütkya janbüi füi thongnu anyi asop ilaxle wi jan füi zingkya pomegrenetbu noksa 100, ija janbüi ma apütle aza-apua laxle tüikya.

¹⁷Thongnu anyi a Zangshwom-Hom fülom atadingle ajong: shuathongchi angkya thongnu ang Jakin le mün kox ilaxle shuakuxchi angkya thongnu ang a Boaz le mün kox.