Read Wancho Naga 2 Pukax-Pangao 30 Bible Online

2 Pukax-Pangao 30 - Wancho Naga bible

2 Pukax-Pangao 30

¹Lyettex-hantyale thomdaokya ningle owang angkya lyetjang ma wüi khünaknue Kaitox Pangpwon sax ang chitsuak, ipongma ma alüile atsao koxle ngokya zompu-zangpa okhonguile chitüi tamchu Jerusalem ma khünaknu a aluile chiasox. Ikhoma wanghompa Hezekiah, chix nguakax-wangkhobu, ilaxle Jerusalem na tüikya khünaknue lyetjang anyi lükya to tik ija pangpwon sax angkya zangwün azutle tsuak, ija ningle Judah hia Israel khünaknu pangnusa hato wanghompa-e kaxho apuk. Tamsüile chu chixe Efraim hia Manasseh homjen nyi hato, Jerusalem angkya Zangshwom-Hom to nguilaxle JOWANPA, Israel nok Zang achuakle ija Kaitox Pangpwon sax ang ngui angkya hanpakma laiza jao akatle chang angkya to khünkhile mok.

⁴Wanghompa hia chix khünaknu a, hwom ija ile mok ang azuale tsuakkya bama mongmüi,

⁵idaile hwome, Mosa Wanlom ma tüikya ningle ija Kaitox Pangpwon saxle changpongma, amipongkya füi onüi luile ngui angkya hanpakma shuakuxchi Dan angkya hia shuathongchi Bersheba angkya Israel khünakbu pangwüi ahyen.

⁶Ahyenkya kax ija füi, wanghompa hia chix nguakax-wangkhobu kaxtom ma, kaxhomixbu a Judah hia Israel haxtok pangkha towüi aham: “Israel khünaknu, hünzom, Siria noke kem chaxwan tingtakle changpongma azangkyabu, athaxpi hünzom pangwüi JOWANPA, Abraham, Isak hia Jakop hwom Zang hato mongchatle changhüi, ile jangchangba chixchu hünzom hato chatüi.

⁷Israel khünak hünzom putong hwom hia hünzom mamixbu, opange JOWANPA, hwom Zang to mongong chithomle tüidaolaxpuix, ibu lailaile taxchang. Chixe hwom to thama adünle sikngün fakya hünzome ngünle hüidaoa.

⁸Hwom lailaile mong taxtsak, ikoxle JOWANPA kax ma laxlax. JOWANPA, hünzom Zang-e othuithui hanpakma otsao ang zingle tüikya Jerusalem angkya Zangshwom-Hom to nguihüi, ilaxle chix ang otuechu hünzom füi küntsik-mongmakya chitüi angkya hanpakma chix to shwomle changhüi.

⁹Hünzom JOWANPA hato chatle jangchang, hünzom haxnu-homsabu zanda ang koplaxle paole thomkya khünakbue hwom to chingchajajale changüi ilaxle hwom a hom to chat ang danüi. Hünzom JOWANPA a mongkün hia chingcha füikya Zang changpu, ilaxle hünzom chix hato chatle janghüi, chixe hünzom a ponglekop angkya changle.”

¹⁰Kaxhomixbu a Efraim hia Manasseh homjenbu ngokya haxsüt to, shuakuxchi ma Zebulun alople, tingnu pangwüi to aham, ikoxle khünaknue hwom cha nyile wanjai.

¹¹Ikoxlechu Ashar, Manasseh hia Zebulun tokya khünakbu, Jerusalem to nguisele tsukyabu chuwüi tüile ngokya.

¹²Wanghompa hia chix nguakax-wangkhobu kaxtom to le chix mongtex kax ma laxle chang angkya bama ma küntsu monglua to hwom pangwüi motomle chang angkya hanpakma Zang-e Judah ma mwot mokle tüikya.

¹³Twonkhax chiawonkya Anthut Pangpwon sax angkya hanpakma lyetjang anyi lükya to Jerusalem ma khünaknu müimamale asox.

¹⁴Jerusalem ma töbu koxle hia sobu zokle chang angkya hanpakma twonkya tö-tsapbu pangwüi alailaxle hwome ibu Kidron Haxbang to tswonle awüt.

¹⁵Ija lyetjang nyix 14 lükya to hwom Kaitox Pangpwon tö ang kox angkya hanpakma chun hosabu lang. Zompu-zangpabu hia Liwi hwom, ma alüile otsao ang ma-achangkyabu zakkop ashukle JOWANPA chak to ma alüile atsaole kox, ifüima hwome chu Zangshwom-Hom ma töbu kox ang tsuakle chang.

¹⁶Zang khünak Mosa Wanlom ma adangle fale tüikya ningle hwome Zangshwom-Hom ma ma ngwotnuibu lax. Tö ang kox angkya hanpakma Liwi hwome zompu-zangpabu chak to ajibu kox, ilaxle hwome ibu füi tö-tsap to sak.

¹⁷Zanglao ma otsao ang machangkya khünakbu huanuma tüile ngokya khoma, hwome Kaitox Pangpwon chun hosabu lang ang chitho, ikhoma Liwi hwome hwom hanpak ang ibu mokle kox ilaxle chun hosabu JOWANPA atsaole kox.

¹⁸Ito bole, Efraim, Manasseh, Isakar, ilaxle Zebulun, ibu homjenbu tokhange nguikyabu hwom a zanglom ma otsao ang chiachang, ikhoma hwome ija Kaitox Pangpwon a olom ma chichang homtoxle mok. Hwom hanpak ang wanghompa Hezekiah-e ija zangjop jop:

¹⁹“O JOWANPA, kwom putong hwom Zang, nang künmüi-mongmüi füi, ma kün-hi-mong makhange zongbakle nang to shwomle ngokyabu, zanglom ma hwom otsao ang machang koxlechu, ibu thaikya nange alakkox.”

²⁰JOWANPAe Hezekiah zangjop to lan, chixe khünaknu thaikya alak, ilaxle hwom to oma chemchu chimok.

²¹Hanpak nyix anüt, Jerusalem ma asoxle tüikya khünaknue mongmüi atungle Twonkhax Chiawonkya Pangpwon sax, ilaxle nyixta füima nyixta le Liwi hia zompu-zangpa hwome janzüi abakle JOWANPA achuak.

²²JOWANPA to shwomkya tüle manle shwom ang thomkya khoma Zedekiah-e Liwi hwom achuak. Hanpak nyix anüt bama JOWANPA, hwom putong hwom Zang achuakle töbu koxle changkya füima,

²³hwom pangwüi ang anaolechu hanpak nyix anüt pangpwon saxle nui ang mongtsu. Hwome tüle mongmüi-pwonlale ija pangpwon sax.

²⁴Khünaknue langle sax angkya hanpakma wanghompa Zedekiah-e maihupong 1000 ilaxle chun 7000 kox, tamchatlechu nguakax-wangkhobue maihupong 1000 ilaxle chun 10, 000 kox. Ipongma zompu-zangpabue huanuma ma alüile atsaole zomzing.

²⁵Hwom pangwüi mong atungle chang, ikhama: Judah nok, zompu-zangpabu, Liwi hwom, shuakux chitokhange nguikya khünakbu, ilaxle Judah hia Israel haxtok ma onyem ang ngole tüikya mixnokbu, ibu pangwüi tüikya.

²⁶Jerusalem tingnu a mongmüie awangle tüikya, chemthüikoxle Dawid sasün Wanghompa Solomon tsün tokhange anyix kopkya mong ma iningle chemtue machangtox.

²⁷Zompu-zangpabu hia Liwi hwome khünak hanpakma mohiman ju. Zangkangting chix hom tokhange Zang-e hwom zangjop atat ilaxle hwom pongle kop.