Read Wancho Naga 2 Pukax-Pangao 33 Bible Online

2 Pukax-Pangao 33 - Wancho Naga bible

2 Pukax-Pangao 33

¹Chix Judah nok ma wanghom ang chang pongma Manasseh a zanglao 12 changkya, ilaxle chixe Jerusalem ma zanglao 55 apün.

²Chix khünaknu nguile ngopongma, ija haxtok angkya JOWANPAe jwonle apaokya mixnokbue mokkya nushixdongkya mwotbu thüi anole Manasseh-e JOWANPA zongto ochax lyen.

³Hopa Hezekiah-e pünle ama daokya songsari baozangbu to shwomkya onuibu chixe zaile alai. Chixe Bal to shwom angkya tö-tsapbu zaile alai, baozangchanu Asherah muabu zingle alai, ilaxle lyettsibu to shwom.

⁴JOWANPA jento chix shwomkya onui hex-ole kamle kopdaokya Zangshwom-Hom ma chixe songsari baozangbu to shwomkya tö-tsapbu zing.

⁵Zangshwom-Hom lopsha anyi ma jao chixe lyettsibu to shwom angkya tö-tsapbu zing.

⁶Hinnom Haxsha ma chixe chix sasün hwom tö ang koxle zokle ashun. Chixe o-nan hule ilaxle jenu-shipabu füi tik-to le chang. Chixe JOWANPA zongto huanuma wüi ochax lyenle JOWANPA ang mongtsik adün.

⁷Zang-e Dawid hia chix sasün Solomon hokhi füi: “Israel nok homjen 12 haxtok pangnu khama, ija Jerusalem ma, ija Zangshwom-Hom ma ku to shwom angkya hanpakma kue zünle kop.

⁸Ilaxle Israel nok pangnusa ku kaxtombu kax ma laxle jangchang, ilaxle ku dapa Mosa-e hwom ang koxkya Wanlombu pangwüi tole jangchang, kue hwom putong hwom ang koxle changdaokya haxtok angkya hwom otuechu pao ang müntom”, le akaxkya onui ma chixe chapabu dan.

⁹Chix khünaknu nguile ngopongma ija haxtok angkya JOWANPAe jwonle apaokya mixnokbu to ngaxchu kaile Manasseh-e Judah nok ang ochax lyenle chang ang tom

¹⁰JOWANPA hwom ang kaxkhün koxle chang koxlechu, Manasseh hia chix khünakbue ija to münapapule angam.

¹¹Ikhoma JOWANPAe Asiria nok süpahi lompabu ang Judah nok tingtak ang tom. Hwome Manasseh kop, chix nakua ma jankuix awün, chix to janbüi füi khak, ilaxle chix a Babilon nok to kat.

¹²Chix sikngün khato ngopongma chix puinaile chang, JOWANPA, chix Zang hato mongchat, ilaxle chix ma chingcha ju.

¹³Zang-e Manasseh zangjop pongle lax ilaxle chix kax to lanle, chix a Jerusalem to nguilaxle tamchatle apün ang kox. Chixe Manasseh hama JOWANPA ang Zang changpule aho ang tho.

¹⁴Ija füima, Manasseh-e Dawid Tingnu zongma handünchi pan katuk, Gihon shuasa zui angkya haxsha pong makhange shuakux chito Nyax Zünkai hia Ofel tingnu wankam alople swonle atsua. Pan zailaxle ziakople thomkya Judah nok tingnubu to tiale lompa-e azui laxle süpahi othom tuipong dan.

¹⁵Chixe Zangshwom-Hom angkya chixe dankya mixnok baozangbu hia muabu pangwüi awüt. Zangshwom-Hom tüikya haxhua kho ma tüikya hia Jerusalem mama-mama khato tüikya songsari tö-tsapbu pangwüi ama, ilaxle chixe ibu tingnu tokna to alailaxle tswonle awüt.

¹⁶Chixe JOWANPA to shwomkya kha angkya tö-tsap zingle amüi, ilaxle chixe ija ding ma notom-tusüi tö hia münchong fakya tö, ibu kox. Chixe Judah khünaknu ang JOWANPA, Israel nok Zang to noknusae shwom angkya kaxtom kox.

¹⁷Khünaknue mama-mama zangshwomnuibu to töbu koxle chang koxlechu, hwome ibu JOWANPA tata ang kox.

¹⁸Manasseh-e mokkya mwot pangwüi, chixe chix Zang to zangjopkya, ilaxle JOWANPA, Israel nok Zang mün ma ajebue chix füi akaxkya kaxbu, ibu pangwüi a Israel Nok Wanghombu Pukax laipex ma tüile.

¹⁹Wanghompa zangjop hia ija to lankya Zang kaxlan, ilaxle chix künlop-monglüile changüi thoto chixe ochax lyenle: chichang-chizang mokkya changkya pukax, songsari baozangbu to shwomkya onuibu, chixe zaile alaikya baozangchanu Asherah muabu ilaxle chixe shwomle ngokya chapabu: ibu pangwüi bama Ajebu Pukax laipex ma tüile.

²⁰Manasseh a zile pao ilaxle chongwang khwa ma akhün ilaxle chix sasün Amon a chix man ma wanghom ang achang.

²¹Judah nok wanghom ang achang pongma Amon a zanglao 22 changkya, ilaxle chixe Jerusalem ma zanglao anyi apün.

²²Chix hopa Manasseh lailaile wüi chixe JOWANPA zongto ochax lyen, ilaxle chixe chuwüi hopae shwomle hüikya chapabu to shwom.

²³Ikoxlechu chix a, hopa lailaile JOWANPA hato mongchatle chihüi, ikoxle hopa to kaile chix tuita ochax khünak ang achangle pao.

²⁴Amon nguakax-wangkho hwome chix to tung ilaxle khwa hommong ma chix lang.

²⁵Judah nokbue Amon langle changkyabu mik amüt ilaxle chix man ma chix sasün Josiah a wanghom ang achang.