Read Wancho Naga 2 Pukax-Pangao 35 Bible Online

2 Pukax-Pangao 35 - Wancho Naga bible

2 Pukax-Pangao 35

¹Wanghompa Josiah-e Jerusalem ma tüle JOWANPA achuak-achenle Kaitox Pangpwon sax; pongwang angkya lyetnu nyix 14 lükya to hwome ija pangpwon hanpakma müibu lang.

²Chixe zompu-zangpabu ang Zangshwom-Hom ma mok angkya hwom mwotbu kox ilaxle müile mok angkya bama hwom mong achenle akax.

³Israel nok hwon-nwotmixbu, Liwi hwom ang chuwüi chixe mwot adangle fa. Liwi hwom a JOWANPA hanpak ang atsaole koxle thomdaokyabu changkya. Chixe thüi: “Dawid sasün, wanghompa Solomon-e zaile alaikya Zangshwom-Hom ma Tsaotsüt Suak dankox. Athaxpi hünzome ija Suak onui tuita kha angkya ata khato le azyale aham ngo angkya mwot müntüi; athax hünzom mwot a, JOWANPA, hünzom Zang hia Israel nok thotha manzai angkya tix changle.

⁴Saxthom saxthom ma süile hünzome Zangshwom-Hom ma ma ngwotnuinui koplax, ilaxle wanghompa Dawid hia chix sasün wanghompa Solomon hokhie adangle fapupule ma hünlitlit laxkox,

⁵ilaxle hünzome Israel nok pangnu homkha to humele koxtsuak ang-ole achwonlax.

⁶Kaitox Pangpwon chun hosa hia zwon, ibu hünzome lang angkya changle. Athax hünzom a zanglom ma otsao ang zingle danlax hünzom füikya Israel khünaknue Mosa makhange JOWANPA adangle fakya pangwüi haxmüi-zangmale mokle tsuak angkya kuxma tö kox angkyabu achwonlax.”

⁷Kaitox Pangpwon tuk ma khünaknue lax angkya hanpakma, Wanghompa Josiah-e chix müizyem kha angkya chun 30, 000, chun hosabu, ilaxle zwonsabu, ilaxle maihupongbu 3, 000 kox.

⁸Khünaknu hanpak ang tamchu zompu-zangpabue hia Liwi hwome twon ang chix nguakax-wangkhobue chuwüi huanuma kox. Ilaxle Zangshwom-Hom to hu angkyabu—Nguakho Hilkiah, Zekariah, ilaxle Jehiel, hwome zompu-zangpabu ang chun hosabu 2, 600 ilaxle zwonsabu tamchu maihupongbu 300, ibu pangpwon tuk ma tö ang kox.

⁹Liwi hwom khama lompabu—Konaniah, Shemaiah ilaxle chix tüita-naopa Nathanel, Hashabiah, Jeiel, ilaxle Jozabad, hwome chuwüi chun hosabu 5, 000 ilaxle zwonsabu tamchu maihupongbu 500, ibibi Liwi hwom ang tö kox ang kox.

¹⁰Wanghompa-e kaxtom fakya ningle chemtue Kaitox Pangpwon hanpakma achwonkya mwot tsuakle hüipuix, zompu-zangpabu hia Liwi hwome ma mwot-mwot kop.

¹¹Chun sasün hia zwonsabu langle changkya füima, Liwi hwome ibu okhwon khuak, ilaxle zompu-zangpabue tö-tsap ding to ajibu sak.

¹²Ilaxle Mosa Wanlom ma zale tüikya ningle hwome tö ibu koxle tsuak angkya hanpakma, zokle ashunkya tö kox angkya müibu, kako-kako ma süile khünaknu othom-othom ma ahan.

¹³Hwom wanlom ma bangkya ningle Liwi hwome Kaitox Pangpwon töbu wün ma hangle atsan, ilaxle otsao töbu a tik, jantik hia khuakhao, ibu ma lum ilaxle mommomkhaile khünaknu ang ahanle kox.

¹⁴Ibu mwot tsuakle chang füima, Liwi hwome hwom hanpakma tamchu Arun sixli zompu-zangpa hwom hanpakma müibu kop, chemthüikoxle zompu-zangpabu a zangnak kople, tö-tsap ding ma müizao hia otom ma lanle zokle ashunkya tö, ibu kox ang chakjao chingaile mokle ngo angkya lai.

¹⁵Dawid-e hwom ang adangle fakya wanlom tole, Asaf saxthom angkya Liwi tsaipabu: Asaf, Heman, ilaxle Jeduthun, chix a wanghom ajepa, hwom ibibi a ma ngwotnui koplaxle ngole tüikya. Fülom nyetmixbu ojao chiachexle fülom ma tiale ngo, chemthüikoxle hwom hanpak ang Kaitox Pangpwon a mama Liwi hwome mokle tsuak.

¹⁶Kaitox Pangpwon saxle nuikya, ilaxle tö-tsap dingma zokle ashunle tö koxkya, ibu pangwüi JOWANPA to shwomle changkya nyixnyix wüi mokle tsuak angkya hanpakma wanghompa Josiah-e kaxtom kox.

¹⁷Ikhama tüile asukya Israel nok pangnusae Kaitox Pangpwon hia Twonkhax chiawonkya Anthut Pangpwon saxle nyix anüt nui.

¹⁸Ajepa Samuel tsün tokhange wüi, Kaitox Pangpwon a ija lailaile otuechu chisax toxkya. Wanghompa Josiah-e zanglao 18 apünkya mong ma, wanghompa, zompu-zangpabu, Liwi hwom, ilaxle Judah hia Jerusalem angkya khünaknue izuma saxkya ningle

¹⁹ledaokya wanghom hwom opupu tsün tochu chisax.

²⁰Zangshwom-Hom hanpakma wanghompa Josiah-e ibibi mwot pangwüi tsuakle hüikya füima, Ijip nok wanghompa Neko-e Eufrat Shuanu angkya Karkemish ma azan ang süpahibu laxlaxle ngui. Josiah-e chix abax ang azong,

²¹ikoxle Neko-e Josiah hato ija kaxho akat: “Izuma azankya a, ku nang zan to kale ngokya münchang ikoxle ku zanpabu füi azan ang ngui wüi, ilaxle JOWANPAe ku ang akhangle mok angkya akaxdaoa. Zang a ku chima tüile, idaile ku taxabax, chichang thüiningle chixe nang tha amale changüi.”

²²Ikoxlechu Josiah-e azan angkya wüile lai. Wanghompa Neko makhange akaxkya Zang kax to chixe chiapa ang khato le angam, ile chix a sün aje laxle Megido haxsha ma azan ang lai.

²³Zanhok ma wanghompa Josiah to Ijip nok sanhape süt. Chixe chix dapa ang thüi: “Ku to pi sütdaoa, ku ikha angkya paokox!”

²⁴Hwome ija man-kanlin kho angkya chix nwonle ajo ilaxle mama man-kanlin ma danlaxle chix a Jerusalem to apüi. Chix ikhato zi ilaxle chix mang a wanghom hwom zukting to akhün. Judah hia Jerusalem angkya khünaknue chix mang sople nui.

²⁵Ajepa Jeremia-e wanghompa Josiah hanpakma mangsop tsai zing. Chix mang sople changpupu ma, Israel nok tsaipabue ngao ang wanlom tuita ang laxle jao twon Ija tsai a mangsop tsaibu athütle zakya khama bangle.

²⁶Josiah-e mokkya pangwüi: chixe JOWANPA to jop-tokya, chixe Wanlom kax ma laxkya,

²⁷ilaxle chix pukax pongwang tokhange oshuk kople: ibu pangwüi Judah hia Israel Nok Wanghombu Pukax laipex ma zale tüile.