Read Wancho Naga 2 Pukax-Pangao 36 Bible Online

2 Pukax-Pangao 36 - Wancho Naga bible

2 Pukax-Pangao 36

¹Judah khünaknue Josiah sasün Joahaz Jerusalem to apüilaxle hopa man ma wanghom ang münga füi lile kam.

²Chix zanglao 23 ma Judah ma wanghom ang achang, ilaxle chixe Jerusalem ma lyetjang azom apün.

³Ijip nok wanghompa Neko-e chix a zanda ang koplaxle pao ilaxle Judah nok ang khop otuak ma 7, 500 ilaxle hun a tuak 75 kox ang tom.

⁴Neko-e Joahaz honao Eliakim a Judah ma wanghom ang achang ilaxle chix mün a Jehoiakim le lüile kox. Joahaz a Neko-e Ijip nok to pao.

⁵Chix wanghom ang achang pongma Jehoiakim a zanglao 25 changkya, ilaxle chixe Jerusalem ma zanglao 11 apün. JOWANPA chix Zang zongto chixe ochax lyen.

⁶Babilon nok wanghompa Nebukadnezar-e Judah nok tingtak, Jehoiakim kop, ilaxle janbüi füi khaklaxle chix a Babilon nok to pao.

⁷Nebukadnezar-e Zangshwom-Hom angkya tui-mwot züizüi pao ilaxle ibu a Babilon to chix homlo ma dan.

⁸Jehoiakim-e mokkya pangwüi, chixe mokkya nushixdongkya hia chichang-chizang mwotbu Israel hia Judah nok Wanghombu Pukax laipex ma zale tüile. Chix man ma chix sasün Jehoiakin wanghompa ang achang.

⁹Judah nok ma wanghom ang achang pongma Jehoiakin a zanglao 18 changkya, ilaxle chixe Jerusalem ma lyetjang azom nyix bün apün. Chixe chuwüi JOWANPA zongto ochax lyen.

¹⁰Tsozit-wazit nguikya zuma, wanghompa Nebukadnezar-e Jehoiakin a Babilon nok to zanda ang koplaxle pao ilaxle Zangshwom-Hom angkya tui-mwotbu tsuile pao. Ifüima Nebukadnezar-e Jehoiakin hopasa a Zedekiah a Judah hia Jerusalem ma wanghom ang achang.

¹¹Judah nok wanghom ang achang pongma chix a zanglao 21 changkya, ilaxle chixe Jerusalem ma zanglao 11 apün.

¹²JOWANPA kax akaxle koxkya ajepa Jeremia kax to somdangle chiapa homtoxle chixe JOWANPA zongto ochax lyen.

¹³Zang mün ma tsaotsüt ang chix atsangkya wanghompa Nebukadnezar zongto alünle Zedekiah ajong. JOWANPA, Israel nok Zang hato mongchatle münhüipu le chix mong angam.

¹⁴Ito obo ang, Judah nok lompabu, zompu-zangpa hwom, ilaxle khünaknu, ibu hwom akhople tüikya khünakbu ningle chapabu to shwomkya olom tole ochax lyenle changkya khoma, JOWANPA, chix jaoe atsaole dankya Zangshwom-Hom chitsaokya ang achang.

¹⁵JOWANPA, hwom putong hwom Zang-e chix khünaknu ang kaxkhün kox angkya hanpakma chizakle ajebu ahüile ngo, chemthüikoxle chixe hwom tamchu Zangshwom-Hom sünle thomsele tsu.

¹⁶Oshuk-shuk ma chix khünaknu füi tsikkya JOWANPA mongtsik thoto hwom azangle pao ang chithole machang tanto hwome Zang kaxhomixbu chanyi wanjai, chix kax ajao ilaxle ajebu adale chang.

¹⁷Ikhoma JOWANPAe hwom zan to Babilon nok wanghompa akat. Wanghompa-e Judah nok naosünbu Zangshwom-Hom ma jaojao lang. Chixe owatochu chingcha ahokya chitüile, mixmüi hia naosom, sheko hia lüka, kakmix hia bwotmix owa chu shanle chitox. Zang-e hwom pangwüi chix chak to dan.

¹⁸Babilon nok wanghompa-e, Zangshwom-Hom, Zangshwom-Hom tuinabu, wanghompa hia chix nguakax-wangkho hwom tuinabu, ibu pangwüi tsuile koplaxle Babilon nok to kat.

¹⁹Chongwang homlobu hia tuinabu pangwüi füi afomle chixe Zangshwom-Hom hia tingnu zokle ashun ilaxle tingnu long katukbu atsunle ama.

²⁰Ozün ma toxkyabu pangwüi chixe Babilon to kat. Ikhato hwome, Parsia nok Wangting laile machang tanto chix thotha manzaile da mwot mokle ngo.

²¹Ile changkya tokhange: “Otuechu chitole awüt thomkya Sabath nazakle nuikya ang achangle haxtok a zanglao 70 man chizaikya haxtok ang thomüi”, le JOWANPAe chix ajepa Jeremia makhange ajekya kax changle ngai ang tom.

²²Parsia nok Sairas chongwangpa, ang achangkya pongwang lükya zanglao ma JOWANPAe chix ajepa Jeremia makhange akaxkya chix kax changle ngai ang tom. Wangting angkya pangnok-jating towüi ija kaxtom laiza ma zale apaolaxle noknusae atatle e ang tom angkya chixe Sairas mongto mongtsukya tuita ahüi:

²³“Ija a Parsia nok chongwangpa Sairas kaxtom changle. JOWANPA, zangkho wangting Zang-e ku a zangfang pangnu thakma apün angkya chongwangpa ang zingle dandaoa ilaxle chixe Judah angkya Jerusalem ma chix hanpak ang zangshwom-hom tuita zaile alai angkya ku ang hünlit koxle changdaoa. Ilaxle athax hünzom opang Zang khünaknubu changpuix, hünzom ikhato chatlax ilaxle JOWANPA a hünzom füi naxtüifa.”