Read Wancho Naga 2 Pukax-Pangao 4 Bible Online

2 Pukax-Pangao 4 - Wancho Naga bible

2 Pukax-Pangao 4

¹Wanghompa Solomon-e wi makhange tö-tsap tuita zaile alai, ija a olwot hia okhao sok 9 pong ilaxle ochuak a sok 9 apongle tüikya.

²Chixe wi-jan makhange tibom chuwüi tuita zingle alai; ija a sok 2.2 zule, 4.4 sok okan-mong ilaxle sok 13.2 okan tüikya.

³Tibom kothochi kaxkom akhople ozyen anyi, noksa thak-thak-fangle zingle aza-apua laxle tüikya. Ibu a tibom zaikya khop-khop wüi müilaxle zaikya changle.

⁴Tibom a, khop makhange zingkya maihupong 12 tok ma athongle dan. Ibu maihupongbu a homtho chito othüne hule, kaopong to azom ponge hule tüikya.

⁵Ija tibom a chakpat 75 tütle tüikya. Ija okax a wansa kax ningle, okho chito maipua aputkya lailaile kwotle tüikya. Ija tibom a ti 60, 000 pe tukux shale tüikya.

⁶Hwome Zangshwom-Hom ma dan ang khuatsum chuwüi bün zing, aga a shuathongchi ma dan ilaxle aga a shuakuxchi ma dan. Hwome ibu a zokle ashunkya tö ang kox angkya müibu, olom-olom titsao füi sole chang angkya hanpakma twon Tibom angkya ti a nguapabue so-zing ang lax-twon angkya hanpakma thom.

⁷Bangkya olom tole hwome hun makhange tö-tsap 10 zing, mama tsap10 zing, ilaxle ibu a Zangshwom-Hom lopsha ma dan; wüntik lotsap hia tsap aga pong atale dan. Hwome hun khupsabu 10 chuwüi zing.

⁹Zompu-zangpabu hanpak ang hwome hommongchi ma nui zai ilaxle nuilom chuwüi zaile alai. Ija nui anyi oba angkya kahakbu a wi-jan füi chwople tüikya.

¹⁰Tibom a shuathongchi ma handünchi homzong ma dan.

¹¹Hwome tiklax, hok-kho ilaxle khup, ibu huanuma zing. Zangshwom-Hom ma lax ang chixe zingle faüihex-ole Solomon füi kaxngaile changdaokya tuina chixe komkaile zingle alaikox. Ibu tuina a: Fakngom anyi Fakngom anyi okho ma chwopkya khup lailaikya anyi Ibu a thongnukho ma chwopkya ma asople apütkya janbüibu Wi-jan makhange zingkya pomegrenet 400 tsyen anyi füi thongkho azale apütkya Nyihom lin-zyenbu Khuatsum 10 Tibom tuita Tibom to thuale thomkya maihupongbu 12 Thongbu, hok-khuabu, ilaxle hoklakbu JOWANPA Zangshwom-Hom ma lax angkya hanpakma, Solomon-e chix ang kaxtom fakya lailaile zingpa akhokya Huram-e tuina ibu fwotle atsyet daokya khop-janbu füi zingpabue ibu mwot-katbu zingle alai.

¹⁷Wanghompa-e ibu pangwüi, Jordan haxsha angkya Sukkoth hia Zeredah nyi zo ma tüikya jansong nui ma zingle alai.

¹⁸Mwt-katbu huanuma, wi-jan chemtukux laxpuix, ija owaechu thüt-zingle chang ang chithole zingle alai.

¹⁹Wanghompa Solomon ang hun füi zingle tsuakkya, Zangshwom-Hom tuina: tö-tsap hia Zang ang tö ang koxkya an dan angkya tsap, ibu tüikya;

²⁰wanlom ma tüikya ningle Ataxkya Otsao Nui tunthoma atsop angkya hanpakma zingle alaikya hun wüntik hia ibu dan angkya lotsapbu,

²¹aza-apakya maipuabu, wüntikbu ilaxle khapbu;

²²wüntik amüt angkya jali, khupbu, ongan müikya so hanpakma khuakhaobu, wündix okham hokle aham angkya khuakhaobu; ibu mwot-kat pangwüi hun tsaotsao füi zing. Zangshwom-Hom homtho kahakbu hia Ataxkya Otsao Nui kahakbu to hun füi lile chwop.