Read Wancho Naga 2 Pukax-Pangao 6 Bible Online

2 Pukax-Pangao 6 - Wancho Naga bible

2 Pukax-Pangao 6

¹Ifüima Wanghompa Solomon-e zangjop, “JOWANPA, nange zangfwom hia zangnakbu ma ngo angkya zünle koppu.

²Athax kue nang hanpak ang Zangshwom-Hom chongkya zingdaoa, othuithuima nang ngo angkya hanpakma a.”

³Ikhama Israel nok pangwüi ajongle tüikya. Wanghompa-e hwomchi to chix thüne hu ilaxle Zang ma hwom to mohiman angkya ju.

⁴Chixe thüi: “JOWANPA, Israel nok Zang achuak kox! Chixe ku apa Dawid füi tsaosaxle akaxkya zangwün otia ma thomle.

⁵Ija kaxtsao a, ‘Kue ku khünaknu Ijip nok tokya alaile apüikya nyix makhange anyix kople, kue Israel haxtok ma, ijongkha makhange ku to shwom angkya hex-ole tingnu tuita chu zünle münkop; ilaxle ku khünaknu, Israel nok lom azui angkya hanpakma kue khünak owachu zünle münkop.

⁶Ikoxlechu athax kue ku to shwom angkya onui ang Jerusalem zünle kopdaoa, ilaxle Dawid a ku khünaknu thakma apün angkya mix ang zünle kopdaoa.’”

⁷Solomon-e chizakle akax: “Ku apa Dawid-e JOWANPA, Israel nok Zang to shwom angkya hanpakma Zangshwom-Hom zaile alai angkya, chix mong ma texle lax,

⁸ikoxlechu JOWANPAe chix ang thüi: ‘Nange ku to shwom angkya Zangshwom-Hom tuita zaile alaisele mong ma texkya changhupu,

⁹ikoxlechu nang ija chemtuechu münzaiüi. Ija a nang sasün tomtatae tix zaile alai angkya changpu.’

¹⁰“Athax JOWANPAe ija chix tsaotsüt otia ma thomdaoa. Ku a, apa Dawid man ma, Israel nok wanghompa tüntong kople changdaoa, ilaxle JOWANPA, Israel nok Zang ang, kue Zangshwom-Hom tuita zaile alaidaoa.

¹¹Tsaotsüt Suak kue Zangshwom-Hom ma dandaoa. Ija Suak a JOWANPAe, chix khünaknu, Israel nok füi kaxfün laxle changpongma koxkya longkhao anyi changpu.”

¹²Ifüima khünaknu tunthoma Solomon dong ilaxle tö-tsap tunthoma ajong üntoxle chak ajong laxle zangjop. (

¹³Solomon-e khopjan füi tanlya zailaxle ija a lopsha osungwa ma ajong. Ija a olwot hia ojang ma sok 2.2 pong ilaxle sok 1.3 chuakle tüikya. Chix ija tanlya ma dong, noknusae ngüntsuakkya khama chikux thong, ilaxle dingchi to chak ajong.)

¹⁴Chixe zangjop: “JOWANPA, Israel nok Zang, thakchi ding to tamchu fangchi hax to nang lailaikya zang owachu müntüi! Nange nang khünaknu füikya tsaotsüt thom ilaxle hwome kün-hi-mong makhange abakle nang kax ma laxle changpongma nange hwom hato nang mongkün aho.

¹⁵Nange ku apa Dawid füi tsaosaxkya otya ma thom; anyix ibu zangwün komkaile changle ngaidaoa.

¹⁶Ilaxle athax, JOWANPA, Israel nok Zang, hwome khünkhikhile nang Wanlom kax ma laxle jangchang thüiningle, Israel haxtok apün angkya hanpakma wanghom a jento chix sixli kha angkya wüi ngo angkya changle le apa Dawid füikya nang tsaotsütchu otya ma wüi thom hüile kue nang to joppu.

¹⁷Idaile athaxpi, O Israel Zang, apa Dawid, nang dapa füi tsaosaxkya pangwüi changle hüi ang tomhüi.

¹⁸“Ikoxle, O Zang, nang a chaxwannu ma sheko hia lüka tham to ngo ang tho ang chami? Zangdingkho ibibi ma ngaxchu nang shatang onui chitüi, idaile kue zingkya Zangshwom-Hom tomning nguiüi hia?

¹⁹JOWANPA, ku Zang, ku a nang dapa changle. Ku zangjop to lanhüi, ilaxle anyix kue nang ma jukya ku ang fahüi.

²⁰Ija Zangshwom-Hom to zangnak zangngaile nyele ngohüi. Ija a nang to shwom angkya hanpakma nange zünle kopkya onui changle. Ija Zangshwom-Hom chito hulaxle kue zangjop pongma nange ku to apahüi.

²¹Ija onui chito hulaxle kue tamchu nang khünaknue zangjople changpongma, nange kwom zangjop to lanhüi. Zangkho-wangting nang hom tokhange kwom to lanhüi ilaxle kwom ang thailak tüihüi.

²²“Khünak tuita hozuipa owawa zongto mütkopdaoale kaxhux fele nang tö-tsap zui to apüi ilaxle chix a chithaikya mix changpule tsaosaxle changpongma,

²³O JOWANPA, zangkangting tokhange apahüi ilaxle nang dabu bama kaxfün fahüi. Chix ma asukya ningle thaikya mix to sikangünkox, ilaxle chithaikya mix a sukya ang achang kox.

²⁴“Hwome nang zongto ochax lyenle changpongma chemtue nang khünak Israel nok to zanpabue lütle changüihex, ilaxle chemtue hwom künlop-monglüi laxle nang hato chatle ija Zangshwom-Hom to nguiüihex, tamchu puinaikya füi nang ma thailak jule changüihex

²⁵zangkangting tokhange hwom to lanlax. Nang khünaknu thaikya ochaxbu alakkya tüikox, ilaxle nange hwom pupa wom ang koxkya haxtok to hwom tamchatle apüikox.

²⁶“Nang khünakbue nang zongto achaxkya khoma chemtue nange zangwat abaxle thom, ikoxle hwom chemtue mong aloplaxle ija Zangshwom-Hom chito thün aho ilaxle puinaikya füi nang to zangjople changüihex,

²⁷JOWANPA nange, zangkangting tokhange hwom zangjop to lankox. Israel nok wanghom hia khünaknu thaikya ochaxbu alakkox. Chem supuix ija mok angkya hwom hama anwot-anole changkox. Ifüima, nange nang khünaknu ang othuithuima hwom kux ang fakya nang haxtok hato zangwat ajole changkox.

²⁸“Chemtue ija haxtok ma otui-onuak tüiüihex chichangba kaknu-laknu lele changüihex chichangba tsaxsa-hikha chei-june ama tamchu kuk-wyae saxle changüihex, chichangba chemtue nang khünakbu to zanbue single changüihex, chichangba hwome okak-olak apongle changüihex,

²⁹ipongma hwom zangjop to apakox. Israel nok nang khünak owawae athukle küntsik-mongmakya tokhange, ija Zangshwom-Hom chito chakthui laxle zangjople changpongma

³⁰hwom zangjop to lankox. Nang ngwotnui zangkho-wangting tokhange hwom to apakox, hwom thaikya alakkox ilaxle hwom to asunkox. Khünak tutex-mongtsang nang tatae awanwüi. Pangnusa füi olom ma mokmole changhüi,

³¹ikoxle hwome ija haxtok ma ngokya kople nange kwom putong hwom ang koxkya kax ma othuithuima laxle naxngokox.

³²“Chemtue ochu to ngokya mixnokbue nang zaxzangkya zing tamchu nange nang khünakbu hanpakma chongkya mwot mokkya zing atatle laxüihex, ilaxle ija Zangshwom-Hom ma nang to shwom ang nguile changüihex,

³³chix zangjop to lankox. Nang ngokya zangkangting tokhange chix kax to lankox ilaxle chixe mok-hüile thüikya mokle laxkox, ikoxle tix nang khünaknu Israel nok ningle chaxwannu khünaknu pangnusae nang tsingüi ilaxle nang kax ma laxle tüiüi, Ifüima hwome, ija kue zaile alaikya Zangshwom-Hom a nang shwomnui changpule awanle laxüi.

³⁴“Nange nang khünaknu hwom zanpabu zan to ka angkya kaxtom koxle changpongma, hwome chemtue nang to zangjople changüihex, tüta jongto khange wüi changlax, nange zünle kopkya tingnu hia kue zaile alaikya Zangshwom-Hom chito hwome thün ahole changpongma,

³⁵hwom zangjop to lankox. Zangkangting tokhange hwom zangjop to lankox ilaxle hwome hwom zanpabu to lüt ang tomkox.

³⁶“Chemtue nang khünaknue nang zongto ochax mwot mokle changüihex: ilaxle ochax lyenkya khünak owachu chitüi: ilaxle nang mongtsik füi nange hwom to zanpabue lüt ang tom ilaxle ojongjong tsailo chaxwan to changkoxchu zanda ang kople pao ang dan,

³⁷ipongma nang khünaknu zangjop to natha hüi. Mixnok chaxwan ikhato, hwom ang künlop-monglüi ilaxle nang to jople jangchang, hwom chemtukuxle ochax tamchu chichang-chizangle tüikya khünakbu changkya hex, ibu ngaile jangchang, O JOWANPA, ibu zangjop to apakoxmi.

³⁸Ija chaxwan to hwom otsing tomtata ma ilaxlechu mongkoxle künlop-monglüile jangchang, ilaxle hwom pupa hwom ang nange koxkya ija haxtok hia nange zünle kopkya tingnu tamchu kue nang hanpak ang zaile alaikya Zangshwom-Hom chito thün aho laxle hwome nang to zangjople jangchang,

³⁹ipongma wüi hwom zangjop to lankox. Zangkangting nang hom tokhange nange hwom to lanhüi ilaxle nang khünaknu ang hwom ochax pangwüi thailak hia chingcha tüi ang tomkox.

⁴⁰“Athax, O ku Zang, kwomchi to hulax ilaxle ikhama kwome jople changkya to apalax.

⁴¹Athax, ajonghüi, JOWAN Zang, Tsaotsüt Suak oja nang janzüi münwan hex, ija füi tomle Zangshwom-Hom ma nguilax, ilaxle ikhama othuithuima ngolax. Nang zompu-zangpabue mokkya mwot pangwüi to mohimanhüi ilaxle hwom zongto nang tüle müikya khoma nang khünaknu pwonla tungle ngo ang tomkox.

⁴²JOWAN Zang, nange zünle kopdaokya wanghom chilaxle tax-awüt. Nang dapa Dawid hanpakma tüikya nang mongkün.” Texle ataklax.