Read Wancho Naga 2 Pukax-Pangao 7 Bible Online

2 Pukax-Pangao 7 - Wancho Naga bible

2 Pukax-Pangao 7

¹Chemtue wanghompa Solomon-e chix zangjop ashukpuix, zangkangting tokya wün düt ilaxle tö koxkya pangwüi zokle ashun, ilaxle JOWANPA Nguikya zangchangjep wünzunge Zangshwom-Hom awang.

²Zangshwom-Hom a zangchangjepe awangle tüikya khoma, zompu-zangpabu ikhato nop ang chitho.

³Chemtue Israel khünakbue zangkho tokya wün düt laxle ija wünzunge Zangshwom-Hom awangle changkya ngünpuix, hwome chix müikya hia oshuk chitüikya chix mongkün bama achuakle Zang shwom.

⁴Solomon hia khünaknu noke JOWANPA ang tö kox.

⁵Chixe maihu 22, 000 ilaxle chun 120, 000, ibibi a tuita notom-tusüi tö ang kox. Ile chix üntoxle khünaknu pangnue Zangshwom-Hom jople atsao.

⁶Zompu-zangpabu hwom ngwotnui ma ajong, ilaxle hwomchi to hule Liwi hwom ajong, ilaxle wanghompa Dawid-e hwom ang koxkya thuaput-waxmaibu angaole ilaxle JOWANPA achuakle tsaibu ngao: “Chix mongkün ma oshuk müntüi!” Ija hwome wanghompa Dawid-e atsyenle koxkya ningle mok. Khünaknu pangnu ajangle tüipongma zompu-zangpabue nyazong müt.

⁷Solomon-e Zangshwom-Hom lopsha osungwa hia homtho atsaole Zang ang kox ilaxle ikhama otom ma lanle zokle ashunkya tö, tsaxjun tö hia notom-tusüi to, ibu hanpak ang müizaobu tö kox. Hwome zaile tüikya wi tö-tsap ibu pangwüi mwot alan ang huanuma hixkya khoma hwome ile mok.

⁸Solomon hia chix khünaknu pangwüi, Pomsa Pangpwon nyix anüt nuile sax. Shuakuxchi Hamath Lomnu hia shuathongchi Ijip nok longzipong, ipongpong tsailo tokyabu asoxlaxle khünaknu tusox a müimamakya tusox tuita changkya.

⁹Hwome tö-tsap atsao ang nyix anüt nui ilaxle Pangpwon hanpak ang mama nyix anüt, le nui. Akiakya nyix hwome wünzua hanpak lax,

¹⁰ilaxle ifüi angkya nyix a, anüt lükya lyetnu ma nyixtsa azom lükya to tix Solomon-e khünaknu a mahom-hom to afan. Israel khünaknu to, Dawid to, Solomon to, JOWANPAe mohiman fakya pangnu bama hwom ang tüle mongmüi.

¹¹Wanghompa Solomon-e Zangshwom-Hom hia wanghom homlo zaikya chix mongjang lailaile pangwüi tsuakle hüikya zuma,

¹²JOWANPA a chix hato zangnak ma ngai. Chixe Solomon ang thüi: “Kue nang zangjop atatdaoa, ilaxle ija Zangshwom-Hom a ku ang kox angkya onui tuita ang pongle kopdaoa.

¹³Chemtue kue zangwat tsyenle tuipuix chichangba tsaxziak sax ang kuknubu ahüile changüihex chichangba khünaknu hato okak-olak ahüile changüihex,

¹⁴ipongma ku khünaknue künlop-monglüi füi ku to zangjople jangchang, ilaxle hwome mokle ngokya ochax mwotbu hato tok ahole jangchang, ipongma kue zangkangting tokhange hwom zangjop atatüi ilaxle hwom thaikyabu alaküi ifüima hwom haxtok a tamchatle ahak-aluale chang ang tomüi.

¹⁵Kue ija Zangshwom-Hom to nyele ngoüi ilaxle ikhama jopkya zangjop pangwüi to apa ang ku achwonle tüile,

¹⁶chemthüikoxle kue ija zünle koplaxle othuithuima ku shwom-nui ang atsaole dandaoa. Kue ija to nyele thomüi ilaxle othuithuima kue ija kho-awale thomüi.

¹⁷Hünpa Dawid lailaile mongong tüikya füi nange chuwüi ku thotha manzaile jangchang ilaxle ku wanlom kaxtombu pangwüi kax ma laxle jangtüi,

¹⁸kue hünpa Dawid füi, chixsu chixsa hwome jento apün-adale chang angkya tsaosaxkya ku tsaotsüt otia ma thomüi.

¹⁹Ikoxlechu nang üntoxle nang khünaknu, kue koxkya wanlom hia kaxtombu kax ma chilaxle tamchu mixnok baozangbu to shwomle jangchang,

²⁰izuma kue nang ang koxle tüikya haxtok ija angkya kue nang apaoüi, ilaxle ku to shwom angkya kha hex-ole atsaole dankya Zangshwom-Hom kue dantoxüi. Zangfang angkya khünaknue ija wanjaile tamchu ajao-adale changüi.

²¹“Athax Zangshwom-Hom a huanuma achuak-achenle ngopu, ikoxlechu epongma ija zui makhange leüi khünak noknusae khosamle abütkyae ile atüiüi, ‘JOWANPAe ija haxtok hia ija Zangshwom-Hom to iningle chemkhoma mokpuix?’

²²Khünaknue lanüi, ‘Hwome JOWANPA, hwom Zang awütle changkya khoma ija ile changputa. Ijip nok tokya hwom pupa hwom chixe sünle apüikya changhupu; ikoxle athax a, ibue mixnok baozangbu füi muamüi ilaxle ibu to shwomle. Ikhoma JOWANPAe hwom hato iningkya thama hüi ang tomle.’”