Read Wancho Naga 2 Pukax-Pangao 8 Bible Online

2 Pukax-Pangao 8 - Wancho Naga bible

2 Pukax-Pangao 8

¹Zangshwom-Hom hia chix homlo zai ang Solomon-e zanglao 20 lax.

²Wanghompa Hiram-e chix ang koxkya tingnubu chu chixe azünle zaile amüi, ilaxle ibu ma ngo ang Israel khünaknu dan.

³Chixe Hamath hia Zobah haxsüt hwople kop,

⁴ilaxle sak-hax to Palmira tingnu zingle alai. Tingnu ibu a tuina athün angkya tamchu ibu ahanle apao angkya hanpakmale zaile alai.

⁵Solomon-e tingnu ibu chuwüi zaile amüi: Thakchi angkya beth Horon hia Amachi angkya Beth Horon nyi (Pan angkya zün-kabu hak ang tsuakle, panzailaxle ziakople thomkya tingnubu).

⁶Balath tingnu, ilaxle süt-wong pangwüi athünle thomkya tingnubu pangwüi, ilaxle chix man hia man-kanlinbu azakle thomkya tingnubu zai. Chixe Jerusalem, Lebanon ilaxle chixe apünle tüikya haxtok pangnu khato wüi longhombu zaile alai angkya mwot olom zing.

⁷Israel noke chaxwan kople nguipongma chilang homtoxle toxkya Kanan nok susabu ang Solomon-e atsangle mwot amok. Ibu khama Hit nok, Amor nok, Peri nok, Hip nok, Jebu nok, opang susa hwom anyix kople da ang achangle ngotüipuix, ibibi.

⁹Atsangle mwot amokkya khama Israel nok a wom ang chitom, ikoxle hwome süpahi mwot, nguakax-wangkhobu mwot, man-kanlin ahamkya lompabu, mankho ma zan to kale changkyabu, ibu mwot mok.

¹⁰Tüjong tüjong to longhombu zaile changkya mwotbu to akhile hume angkya hanpakma, okax-okhobu 250 khünak tüikya.

¹¹Solomon-e Ijip nok wangcha laxkya chix wangchanu tuita a, she hanpakma zaile alaikya Dawid tingnu angkya hom ma ngo ang tom. Chixe thüi: “She a Israel nok wanghompa Dawid homlo ma chingoüi, chemthüikoxle Tsaotsüt Suak thomdaokya onui a otsao changle.”

¹²Chixe zaikya Zangshwom-Hom tuntho angkya tö-tsap ma Solomon-e tö kox.

¹³Mosa wanlom ma tüikya ningle chixe ibibi otsao nyix chithaile zokle ashunkya to kox: Sabath nyix, Lyetzün Pangpwon nyix, ilaxle zanglao pangpwon azom: Twonkhax chiawonkya Anthut Pangpwon, Saxcha-wün ilaxle Pomsa Pangpwon.

¹⁴Hopa Dawid-e tanle toxkya wanlombu tole, tsailom azuikya hia mama-mama nguapabu süt-mwot to asun-azule chang angkya zompu-zangpabu hia Liwi hwom ang hanpak foto ma mwot-mwot ahanle kox. Chixe chuwüi, Zang khünake Dawid-e kaxtom koxle toxkyabu kax ma laxle, fülom foto, nyixfokya to, ibu nyekya mwot mok angkya hanpakma, nyetmixbu othom-othom ma ahanle kox.

¹⁵Pung to hu angkya hia mama süt-mwot bama wanghompa Dawid-e chemle zompu-zangpabu hia Liwi hwom ang dangle fapuix, ibu pangwüi otia ma mok.

¹⁶Ipongma Solomon mongjang mwotbu pangwüi tsuakle hüi. Homting thole thong küikya nyix makhange homzai alaikya nyix kople, mwot pangwüi tsuakle mokle hüi.

¹⁷Ifüima Solomon-e Edom nok haxtok angkya Agaba tinu kax ma tüikya khua zaknui Ezionzebar hia Elath to pao.

¹⁸Wanghompa Horam-e chix hato ma nguakax-wangkhobu ilaxle olüi awandaokya khuachei mixbue zople khuabu akat. Hwome Solomon nguakax-wangkhobu füi tomle Ofir haxtok alople khua zople azui ilaxle Solomon hato hun otuak ma 50, 000 apüile kox.