Read Wancho Naga Izra 6 Bible Online

Izra 6 - Wancho Naga bible

Izra 6

¹Ikhoma Chongwangpa Dairas-e, Babilon nok chongwang hwom laiza ma kople thomkya ija zangwün lom angkya kaxtom kox.

²Ikoxle Medi nok haxsüt angkya Ekbatana tingnu ma ibibi zangwün zale tüikya laitün atak:

³“Chixe apünkya pongwang lükya zanglao ma Chongwangpa Sairas-e-e, töbu koxle zokle ashun angkya onui hanpak ang Jerusalem ma tüikya Zangshwom-Hom azünle zaile alai angkya kaxtom kox. Zangshwom-Hom a okhao hia ochuak ma sok 45 pong changüi.

⁴Katukbu a longdün azom pong ding ma püntsi dünpong athünle zai angkya changle. Ija bama chemtukux bakpuix chongwang hwom suakthong angkya bak angkya changpu.

⁵Ilaxle chu Jerusalem Zangshwom-Hom angkya hun hia khop tiklak-khuakhe chemtukux Nebukadnezar-e Babilon to apüile tüipuix, ibu pangwüi achatle Jerusalem Zangshwom-Hom ma omanman ma wüi dan angkya oli changpu.”

⁶Chongwangpa Dairas-e ibibi kaxnong achat: “Hannop-Eufrat angkya Gowarnor Tattenai, Shethar Bozenai, ilaxle Hannop-Eufrat ma tüikya hünzom zuikhui okax-okhobu hato. “Zangshwom-Hom füi atsaile ngolax

⁷ilaxle ija zaikya mwot-kat to tsa-ngaokya taxtüi. Owangpong ma ajongle tüikya homting man ma wüi Judah nok Gowarnor hia Judah nok lompabue ija Zang Zangshwom-Hom naxzaikox.

⁸Kue hünzom ang ija homzai mwot to asunle kox angkya kaxtom koxpu. Mwot thothojole chichang angkya kuxmale ija homzai ma bakkya pangwüi, chwonchwonle wüi chongwang hwom suak angkya ashix angkya changle.

⁹Nyixfokya to, ojao chithaile, hünzome Jerusalem angkya nguapabu ang hwome aju-alomlom: huzanpongsabu, chun chichangba Zangkangting tokya Zang shwomle töbu ang kox angkya hanpakma chun hosabu pangwüi, chichangba wonglai tsax, hum, grep-ti, chichangba olip münga, ibu pangwüi kox angkya oli changpu.

¹⁰Ku hia kusa hwom hato chix mohiman tüi angkya hanpakma, chixe pongle koptsuak tangle hwome töbu kox angkya tamchu chix to zangjop angkya changle. Ikhoma ija mwot a tsuak ang tom angkya changpu.

¹¹Kue ito kaile chu thüipu, owawae ija kaxtom kax ma chilaxle jangtüi, hwom hom atsakya püntsibu alailaxle, ibu otun junüi ilaxle ibu füi hwom tompobu apatle huk angkya changpu. Ilaxle hwom hombu a pangtsabu füi zaile koxüi.

¹²Zang owae chix to shwom-tö angkya hanpakma onui ang Jerusalem zünle koplax puix, chixe wüi, opange ija kaxtom kax ma chilaxle tüilaxpuix tamchu ikha angkya Zangshwom-Hom ama ang azong laxpuix, ibu wanghombu hia jat-libu to lütle naxchang kox. Ija kaxtom, Dairas, kue koxdaoa. Ija ku kaxtom komkaile apa angkya wüi changle.”

¹³Ifüima Gowarnor Tattenai, Shethar Bozenai, ilaxle hwom füikya okax-okhobue chongwangpa kaxtom lailaile mok.

¹⁴Judah nok lompabue Zangshwom-Hom zaikya mwot thopaole mok. Hwom to ajepa Hagai hia Zekariah nyie fong. Israel nok Zang-e tamchu Parsia nok wanghombu, Sairas, Dairas hia Artakses hwom bibie fakya kaxtom ningle hwome Zangshwom-Hom zaile tsuakle hüi.

¹⁵Chongwangpa Dairas-e apünkya zanglao azoklükya to Adar lyetnu ma nyix azom lükya to hwome Zangshwom-Homnu zaikya mwot tsuak.

¹⁶Ifüima Israel khünaknu: nguapabu, Liwi hwom, ilaxle zanda ang ngokya chatkyabu pangwüi: mongmüi atungle ija Zangshwom-Homnu jople atsao.

¹⁷Jople atsao angkya hanpakma hwome huzanpongbu 100, chun 200, chun hosa 400 ibibi a tö ang, ilaxle zwonpong 12 a ochax töbu hanpak ang, Israel nok homjen foto tuipong kox.

¹⁸Hwome, Jerusalem Zangshwom-Hom ma thotha angkya mwotbu hanpakma, Mosa Laipex ma adangle fakya olom tole, nguapabu hia Liwi hwom tu asüi ang tom.

¹⁹Ifüi angkya zanglao owang angkya lyetjang nyixbün ali lükya to zanda ang ngokya chatkyabue Kaitox Pangpwon sax.

²⁰Nguapabu hia Liwi hwom pangwüie ma alüile atsao koxle hwom a zanglom ma otsao ang achang. Zanda ang ngokya chatkyabu, nguapabu hia hwom pangwüi hanpak ang Kaitox Pangpwon ma lax ang Liwi hwome müibu lang.

²¹Tö ibu a, Israel khünak opang zanda ang ngokya chatpuix tamchu ija haxtok ma tüile ngokya khünakbu opange songsari baozang shwomkya olom danle toxlaxle Israel nok Zang JOWANPA to shwom ang nguipuix, hwom pangnue sax.

²²Nyix anüt hwome mongmüi-pwonlale an thulaxle twonkhax chiawon homtoxle hwome ija saxkya pangpwon nui. Asiria nok Chongwangpa hwomchi ma se ilaxle Israel nok Zang to shwom angkya Zangshwom-Hom chatle zaile alai angkya hwom to asunle hüi ang tomkya khoma hwom ang JOWANPA füi athukle mongmüi.