Read Wancho Naga Izra 7 Bible Online

Izra 7 - Wancho Naga bible

Izra 7

¹Obibi zanglao hex lekya füima, chemtue Artakses a Parsia nok ma Chongwangpa ang tüikya hex, ipongma Izra le amünle mixsün tuita tüikya. Chixe chix putong ozu a Nguakho Arun kople tole chatkya ile changle: Izra a Seraiah sasün changkya, Seraiah hopa a Azariah, chix hopa a Hilkiah,

²chix hopa a Shallum, chix hopa a Zadok, chix hopa a Ahitub,

³chix hopa a Amariah, chix hopa a Azariah, chix hopa a Meraioth,

⁴chix hopa a Zerahiah, chix hopa a Uzzi, chix hopa a Bukki,

⁵chix hopa a Abishua, chix hopa a Finehas, chix hopa a Eliazar, chix hopa a Arun.

⁶Izra a, JOWANPA, Israel nok Zang-e Mosa makhange koxkya Wanlom pangwüi hiktikle awankya mixsün tuita tsingpa changkya. Izra ang JOWANPA, chix Zang mohiman tüile ngokya khoma, chongwangpae chix ang chixe ajuju pangwüi kox. Artakses-e apünkya zanglao anüt lükya to, Izra a Israel khünaknu othom koplaxle Babilon tokya Jerusalem to chat ang achex. Ikhama nguapabu, Liwi hwom, Zangshwom-Hom tsaipabu, Zangshwom-Hom nyetmixbu, ilaxle mwotmixbu tüikya.

⁸Owang angkya lyetjang pongwang lükya nyix hwome Babilon nok danle tox, ilaxle Zang chingcha makhange hwome lyetjang aga pongwang nyixkha Jerusalem alople ngui.

¹⁰JOWANPA Wanlom zule tsing angkya, ija tole mok angkya, ilaxle ikhama tüikya wanlombu komkaile Israel khünaknu hama anwot-anole chang angkya to Izra-e chix tsün jao koxle among.

¹¹JOWANPAe Israel nok ang koxle tüikya wanlom hia kaxtombu bama tongtik-zahikle awanlaxle ngokya mixsün tuita Izra a nguapa tuita tamchu tsingpa khünak changkya ilaxle Chongwangpa Artakses-e chix ang koxkya laiza a ija changle:

¹²“Chongwangpa Artakses tokhange nguapa Izra, owa Zangkangting Zang Wanlom bama tsingpa tuita hex, chix hato.

¹³“Ku chaxwan angkya Israel khünaknu, nguapabu, Liwi hwom, opang nang füi tomle Jerusalem to chat-sele mongtsukya tüipuix, hwom chat ang danpu.

¹⁴Ku bomachu nguakax-wangkho hwom mixsün anüt kwom notom laxle, Jerusalem hia Judah to chatlaxle, Zang-e hünzom ang koxle tüikya Wanlom müile kax ma laxle tole ngolaxma hex, le hua angkya hanpakma hu ang kwome nang tsanle apaopu.

¹⁵Israel nok Zang, owa Zangshwom-Hom Jerusalem ma tüipuix, chix ang, ku üntoxle ku nguakax-wangkhobue koxsele tsukya hun hia khop töbu hünzome hünzom füi tomle laxlaxtox angkya changpu.

¹⁶Babilon haxsüt ma hünzome saile asoxkya tuina, hun hia khop pangwüi tamchu Jerusalem ma tüikya hwom Zang Zangshwom-Hom hanpak ang Israel khünaknu hia hwom nguapabue koxkya tö, ibu pangwüi hünzome hünzom füi tomle laxlaxtox angkya changpu.

¹⁷“Hünzome ngun ibu khünzaile twonüi ilaxle maihupongbu, chunlabu, chun hosabu, saxziakbu ilaxle grep-tibu, ibu pangwüi shaküi ilaxle Jerusalem angkya Zangshwom-Hom ma tüikya tö-tsap ma ibu tö koxüi.

¹⁸Ota-otua toxkya khop hia hun, ibu hünzom Zang mongtex ma, tütali mwot tochu hünzome twon ang tsuak.

¹⁹Zangshwom-Hom thothat mwot to twon angkya hanpakma koxkya tiklak-khuakhebu hünzome Jerusalem ma Zang chaktom to kox angkya changpu.

²⁰Ilaxle Zangshwom-Hom hanpakma tütali laxse-twonse jangtüi, ija jali hünzome wanghom hwom suak angkya lax ang tsuak.

²¹“Izra, owa nguapa tamchu Zangkangting tokya Zang Wanlom tsingpa tuita hex, chix ang chixe ajuju komle kox angkya hanpakma hannop-Eufrat haxsüt angkya suak twonmix okax-okhobu ang kaxtom koxle changdaoa.

²²Ikoxlechu ibibi thathüt ma hwome ibu tuina ile kox ang tsuak: khop ngunkhix 75000 kople, wonglai tsax 500 othum kople, grep-ti 550 pe kople, olip münga 550 pe kople, ilaxle hum a laxsese ma lax ang tsuak.

²³Zangkangting tokya Zang-e alomlom pangwüi koxtsuak angkya hanpakma nang khünkhi angkya oli changpu, idaile ku füi tamchu ku füima apün-awangle changkyabu füi chix ang mongmakya tüiang müntom-ole amonglax.

²⁴Ija Zangshwom-Hom füi asax-amokle tüikya owawa chichangba nguapabu, Liwi hwom, tsaingaomixbu, nyetmixbu, mwotmok mixbu, ibu owamachu süisaile chichang angkya bama nang abaxdaoa.

²⁵“Izra, Zang-e nang ang fale tüikya hwon-je twonlaxle, Zang Wanlom fang ma ngole tüikya Hannop-Eufrat angkya khünaknu thakma apün-awang angkya pünpa-chongwang hia kaxfünpabu nange zün angkya changle. Ija Wanlom chitsingkya khünak owawa jangtüi, nange chix hama ija anwot-anole kox angkya changpu.

²⁶Owawae Zang wanlombu hia chongwang wanlombu kax ma laxle chitüi thüiningle, hwom to janbama wüi sikngün fa angkya oli changpu; ibu mik max ang tomüi chichangba pan athaiüi chichangba hwom tingtok komle laxle tsangüi chichangba kun to shole thomüi.”

²⁷Izra-e thüi: “Kem putong hwom Zang, JOWANPA, chix achuak kox! Chixe chongwangpa ang ija ningle Jerusalem angkya chix Zangshwom-Hom achuak-achen ang tomdaoa.

²⁸Zang chingcha makhange kue chongwangpa, chix nguakax-wangkho hwom, tamchu tsak-zongle tüikya chix pünpa-chongwang alixachong hwom mong anom-anaile tsuakdaoa; JOWANPA ku Zang-e ku ang mongchen koxle changkya khoma kue Israel nok saxthom-saxthom lompabu huanuma ku füi tomle chat ang jikle.”