Read Wancho Naga Izra 9 Bible Online

Izra 9 - Wancho Naga bible

Izra 9

¹Ibu mwot pangwüi tsuakle hüikya füima, Israel khünak lompabu züizüi ngui ilaxle khünaknue tamchu nguapabu hia Liwi hwome tomzi nok Amon, Moab, hia Ijip nok chichangba Kanan nok, Hit nok, Peri nok, Jebu nok, Amor nok, ibu füi malualua to atsaile chingokya kax ku hama wün. Ebu khünakbue mokkya ningle hwome chuwüi nushix-dongkya mwotbu mokle ngo.

²Jehudi lükabue mixnokchabu kako ang laxle apüi, ikhoma Zang otsao khünakbu chitsaokya ang achang. Ija ma akhole thaikyabu a lompabu tamchu nguakax-wangkhobu changkya.

³Chemtue kue ija kax atatpuix, mongtsik laxle kue ku nyi akyet, ku kho hia tunmunbu file awüt, ilaxle künmax-mongshanle ku thung.

⁴Ku ikhama mongmaxle tsomfüi tö kox angkya hanpak nguikya kople thungle ngo, ilaxle khünaknu ku akhople asox ang süt. Ibu a, zanda ang ngokya chatkya Israel khünakbu hanpakma Israel nok Zang-e, hwom ochax thama bama akaxkya atatlaxle abüt-abanle tüikya khünakbu changkya.

⁵Hansong tö kox angkya tu nguile hüikya füi tomle, ku mongmaxle nguakle ngokya kha angkya ajong, ikoxlechu nyitsyen-zahom awunlaxle, ku zangjop ang chikux athong laxle JOWANPA ku Zang hato kue chak thüi.

⁶Kue thüi: “O Zang, kue nang tuntho to ku thün ahoüima azakle maxle. Kwom ochaxbu a kwom khangkho füi ngaxchu sütsuale athünle tüile; ibue zangkho jaojao to thule tüidaoa.

⁷Kwom pupa hwom tsün tokhange athax kople, kwom, nang khünaknubue huanuma ochax lyenle hüidaoa. Kwom ochaxbu khoma kwom, kwom wanghom hwom, ilaxle kwom nguapabu a mixnok wanghombu chak to dongle changdaoa, ilaxle kwom a lang-huak, tuinabu tsui pao, ilaxle zanda ang laxlaxle pao, le changdaoa. Anyix chemle ngopuix ija ningle kwom a komkaile hopu chitüikya chifün ma ngole hüile.

⁸Athax jantakya hanpakma, O JOWANPA kwom Zang, nange kwom to chingchajaja ilaxle da ang ngokya kwom azangle pao ang tom üntoxle ija otsao nui ma kwom ngo ang tompu. Nange kwom da ang ngokya azangle pao ang tom ilaxle tsünzün ma ngo ang danpu.

⁹Kwom a dabu changkya, ikoxlechu nange kwom da chifün ma danle chitox. Kwom ozün ma ngo angkya tamchu nang Zangshwom-Hom azünle zaile alai angkya ilaxle ikhato Judah hia Jerusalem ma chem chaza angkya chitüile kodong-handongle ngo ang kop angkya bama kwom to chingchale tüi angkya nange Parsia nok chongwangpa hwom mong anom-anaile fapu.

¹⁰“Ikoxlechu athax, O Zang, ile changle lekya füima kwome chem wün angkya tüi? Kwome tamchatle chuwüi

¹¹nang dapabu, aje hwom makhange nange fakya kaxtom kax ma chilaxle tüidaoa. Hwome kwom hama kwome koplax angkya haxtok a chitsaokya haxtok changle chemthüikoxle ikhama ngole tüikya khünaknue kaochi makhange atakao kople nushix dongkya hia chimüikya mokkya mwotbue amünle tüidaoa.

¹²Kwome ija haxtok ma mongzom müile ngose tamchu su-sa hwom hanpakma tuita mantswon ang bangse jangtsu, khünak ibu füi chemtuechu atu-amaile chichang angkya tamchu okop-olwot bama hwom to asun-azule chichang angkya bama hwome kwom füi akaxdaoa.

¹³Kwom ochax hia thaikyabu bama kwome sikngün komle apongle hüidaobachu, nange kwome kopsese sikngün ashukle kwom ang chifa ilaxle kwom ozün ma ngo ang tompu.

¹⁴Ija füima kwome büthüikoxle chatchatnaole nang kaxtombu wünhaile tüiüi tamchu ibu chichang-chizangle tüikya khünakbu füi chemle atu-amaile changüi? Kwome ile jangmok, nang ang mong müimamale tsik laxle kwom a komkaile amütüi ilaxle opupuchu ozün ma ngo ang chitomüi.

¹⁵JOWANPA Israel nok Zang, nang a sukya changle, ikoxlechu nange kwom ozün ma ngo ang tompu. Kwome nang zongto kwom thaidaokya ngaipu; kwom ang nang ngwotnui to ngui angkya chifün ojao müntüi.”