Read Wancho Naga Nehemia 13 Bible Online

Nehemia 13 - Wancho Naga bible

Nehemia 13

¹Chemtue Mosa Wanlom a khünak natat ma azaxle epuix, Amon nok hia Moab nok a Zang khünakbu khato tuita ang chingo angkya kax zakya kha ha alop.

²Amon nok hia Moab noke, Israel khünakbu Ijip haxtok tokya laile ngopongma, hwom ang süt hia ti chifa. Itülüi, Israel nok to thuakzomle chang angkya hanpakma hwome Balam ang ngun kox, ikoxlechu kem Zang-e ija thuakzom a mohiman ang achang.

³Chemtue Israel khünakbue ija jongkha Wanlom ekya atatle laxpuix, hwome hwom tu angkya mixnokbu komkaile alai.

⁴Nguapa Eliashib, owa Zangshwom-Hom tuina thomnui to hu-mix changkya hex, chix a Tobiah füi okuilole tumüi ma ngole hüi.

⁵Chixe Tobiah ang nui chongkya tuita ojongma saxziak tö hia ongam müikya tö ibu, Zangshwom-Hom ma laxkya tuinabu, nguapabu ang koxkya töbu, ilaxle saxziak bünfong, grepti-ju bünfong, ilaxle Liwi hwom, Zangshwom-Hom tsaipabu, ilaxle Zangshwom-Hom nyetmixbu, ibu ang koxkya olip münga, ibu thomkya nui kox.

⁶Ibu ile changle ngopongma, ku a Jerusalem ma chiasu, chemthüikoxle Artakses Babilon nok ma wanghom ang ngopongma ku a chix hato kaxwün wang ang kale asu. Kue chix angkya tsaika-kaxka kopkya füima alüile chingo homtoxle

⁷ku a Jerusalem to chat. Ikhato Eliashib-e Tobiah ang Zangshwom-Hom ma nui tuita koxle thomkya ngünlaxle ku abüt.

⁸Ku ang huanuma mongtsik ilaxle Tobiah tuina pangwüi tswonle awüt.

⁹Kue ija nui a Zangshwom-Hom tuina, saxziak tö hia ongan müikya so, ibu chatle thom angkya hanpakma zanglom ma ija atsaole chang angkya kax kox.

¹⁰Khünaknue hwom ang wokfwot müile sax angkya süt chifakya khoma Zangshwom-Hom tsaipabu hia mama Liwi hwome Jerusalem toxlaxle ma haxtoktok to chatle paokya kue atat ang kop.

¹¹Zangshwom-Hom wün ahaile changkya khoma kue okax-okhobu to sa. Ilaxle kue Liwi hwom hia tsaipabu tamchatle Zangshwom-Hom to apüi ilaxle chatle hwom mok ma süt ang tom.

¹²Ifüima Israel khünaknue tamchatle Zangshwom-Hom to hwom bünfong saxziak, grepti-ju hia olip münga, ibu apüile dan.

¹³Kue ija Zangshwom-Hom pung to hu ang ibibi khünak tom: Nguapa Shelemiah; Zadok, chix a tuita Wanlom tsingpa; ilaxle Liwi sün Pedaiah. Hanan, chix a Zakur sasün ilaxle Mattaniah susün, chix a hwom to fongmix changkya. Mama mwotmok mixbu ang chisip-chibale ahanle kox angkya bama kue khünak ibu to mongong thom.

¹⁴Nang Zangshwom-Hom hia ija zangshwom bama kue mokkyabu mong ma koplax, ku Zang.

¹⁵Ipongma Judah angkya khünaknue Sabath nyix grepti-ju fyetkya kue ngünle lax. Mamabue saxziak, grepti-ju, grep ziak, fupsa ziak, ilaxle mama mwotkatbu mantsakbu ma hünzing laxle ibu a Jerusalem to paole ngokya; Sabath nyix chemchu hang-jole chichang angkya kue hwom ang kaxkhün kox.

¹⁶Tair tingnu angkya khünak züizüi Jerusalem ma ngole tüikya, ilaxle hwom Sabath nyix kwom khünakbu ang hang ang nyax hia mama mwot-katbu tingnu to apüi.

¹⁷Kue Judah nok lompabu to sa ilaxle hwom ang thüi: “Hünzome mokle ngokya ochax to hulax! Hünzome Sabath a tuita chitsaokya ang achangdaoa.

¹⁸Ija tingnu hato thama apüilaxle kaile hünzom pupa hwom to Zang-e sikangünkya iningkya khoma jaojao changpu. Ikoxlechu Sabath nyix naklyenle changkya tokhange hünzome Israel nok hato Zang mongtsik sisi mix apüi angkya atsangpu.”

¹⁹Ikhoma hansong füi tomle chithaile Sabath owang nyix wüi ija tingnu pan ka hak üntoxle Sabath akaile machang tanto ija ka daple chichang angkya kue kax koxle thompu. Tingnu to Sabath nyix chemchu apüi-adünle chichang angkya hanpakma khile hu ang kue ku khünak angwot pu.

²⁰Othom anyi-azom ma jao tütali hangle thalex mixbu Sabath thoja tingnu katukbu tokna to apompu.

²¹Kue hwom ang kaxkhün koxle thüipu: “Ikhama hünzom ngainopkya zangngai tanle nuikya chem olüi müntüi. Hünzome anaole chuwüi ile mok ang jang-azong, kue hünzom a zong ma laxle jwonle apaoüi.” Ija makhange hwom Sabath nyix tamchatle münhüi.

²²Liwi hwom ma alüile atsao koxle, Sabath müile atsaole thom angkya kuxma panbu nye angkya kue kaxkoxle changpu. Ija bamachu ku texle atat-hüi, O Zang, ilaxle nang mongkün chongkya tüikya khoma ku panle thom hüi.

²³Ipongma kue Judah khünakbue Ashdod, Amon, hia Moab nok shekobu kako ang laxle thomkyabu huanuma lomle atak.

²⁴Süifi tukux hwom naosombue Ashdod nok kax ma chichangba mama mixnok zangwün ma wün ilaxle hwome kwom kax ma zangwün ang chitho.

²⁵Kue ibu khünak to sapu, hwom hato thuakzom hüi angkya akaxpu, hwom to fitpu, ilaxle hwom tüntongbu wüile awütpu. Ifüima kue hwom ang, hwome tamchu hwom su-sa hwome chuwüi, ibobo ma mixnok shekobu füi atu-amaile münchangpu-ole tsaotsüt ang tompu.

²⁶Kue hwom ang thüipu: “Wanghompa Solomon ang ochax lyen ang tomkya a mixnok shekobu changkya changpu. Chix tuita owawa mixnok wanghom hwom füichu süchongkya wanghom tuita changkya. Zang-e chix to mongkün ilaxle Israel pangwüi thakma apün angkya wanghom ang achangpu, ikoxlechu chix ija ochax to dütpu.

²⁷Jangchang thüiba kwome chuwüi hünzom mantole mixnok shekobu kako ang apüile lax üntoxle Zang kax ma chilaxle changüihi?”

²⁸Joiada a Nguakho Eliashib sasün changkya, ikoxle Joiada sasün hwomkha angkya tuitae, Beth Horon tinglong angkya Sanballat sacha lax, ikhoma kue Joiada a Jerusalem toxlaxle pao ang tom.

²⁹Texle atak-hüi, Zang, ibu khünakbue wanghom khualo ilaxle nguapabu hia Liwi hwom füikya nange kaxfün hwome chemle amapuix, ibu taxalak.

³⁰Mixnokbu füi asax-amokkya pangnu li tokya kue khünaknu tsao ang tompu; hwom pangnusae wüi ma mwot-mwot awanle chang angkya hanpakma kue nguapabu hia Liwi hwom hanpak ang wanlombu zingpu;

³¹Khünaknue hwom puamün kha angkya saxziak hia pünziak töbu apüile chang angkya hanpakma tamchu hwome ibu apüi pongma töbu zokle ashun angkya hanpakma tingtui nakdong le kue ha achwonle koxpu. Ibu pangwüi texle atak-hüi ilaxle ija bama ku to chingchakya tüihüi.