Read Wancho Naga Nehemia 5 Bible Online

Nehemia 5 - Wancho Naga bible

Nehemia 5

¹Alüile chingo homtoxle, sheko hia lükya pangwüie mama Jehudi khünakbu to kaxthup-ngaotünle chang ang süt.

²Züizüie thüi: “Kwom ang kako-homkha chongle tüipu, ikoxle kwom ozün ma ngo angkya hanpakma süt tüi angkya wüi changpu.”

³Mamabue thüi: “Kwome ma manzai haxtok, grep haxtok, tamchu hom-hax, ibu kwom ozün ma ngo angkya hanpakma süt hanpak ang owawa füi omua ma lax ang alüix angkya tüile.”

⁴Anaole mamabue chuwüi thüi: “Kwome ma manzai haxtok hia grep haxtokbu hanpak ang chongwang süi kox angkya hanpakma owawa ma thashe ma ngun lom angkya changle.

⁵Kwom chuwüi mama Judah khünakbu füi lita-kanta changpu. Hwom su-sabu ningle kwomsu-kwomsa hwom a münmüi le hia? Ikoxle kwome masu masabu da ang achang angkya laipu. Züizüi kwom sacha hwom a da ang hangle changdaoa. Manzai haxtok hia grep haxtok, ibu kwom chak tokya apao koplaxle kwom a chingcha ashukkya chifün ma tüile.”

⁶Chemtue ibue kaxthup-ngaotünkya kue atatpuix, ku ang huanuma mongtsik

⁷ilaxle chixe ija chifün to hulaxle mok. Kue khünaknu khama alixachongbu hia lompabu to ahe ilaxle thüi: “Hünzome mamixbu to sikangün ngole!” Ija tingtui bama zangwün azut ang kue noknu tu asox ang tom

⁸ilaxle akax: “Kwome tsuakkya kople, ma alüile mixnok chak to hangle awüt-se kem tuita-naopa Judah khünak mamabu shakle tüipu. Ikoxle athax hünzome ma tuita-naopa hwom tamchu hwomma-hwommixbu hünzom chak to hang angkya atsang ngopu!” Ipongma lompabu kaxlan angkya chitüile dangle apa.

⁹Ifüima kue akax: “Hünzome chem mokle ngopuix ija a thaihule! Hünzome Zang kax ma lax üntoxle chem supuix ija moksepa. Ile chang koxle, songsari khünak, kem zanpabu ang kem to adix-adale chang angkya opong-olom müntüise.

¹⁰Kue khünaknu ang ngun-syen hia süt ku angkya azutle koxpu, ku üitho hwome tamchu ku füi tomle mwotmokle tüikyabue chuwüi ilailaile mokpu. Athaxpi, hai, keme thashe achat-hüile jule ngokya zak-hax.

¹¹Keme hwom angkya kopse tüikya thashe: Ngun wüi changlax, saxziak wüi changlax, grep ziak wüi changlax chichangba Olip münga wüi changlax, ibu komle chitüikya ang laxhax. Ilaxle ibu ang hwom manzai haxtok, grep haxtok, olip haxtok tamchu hwom hom-hax, ibu pangwüi achatle koxhax!”

¹²Lompabue lan: “Nange chemle wünpuix, kwome ile moküi. Kwome tingtok ibu komkaile achat koxüi ilaxle kop angkya thashe saile mün-ngoüi.” Athax hwome akax kax ibu otya ma thom angkya hanpakma, hwom tunthoma atsao ang tom angkya hanpakma kue nguapabu sele anop.

¹³Ifüima kue ke ma thole ngokya nyi sik ilaxle sakle aho. Kue thüi: “Ija kaxtsao chithomkya khünak angkya tuina Zang-e ija ningle sakle awüt angkya changle. Zang-e, hünzom ma atüitüi komkaile tswonle paoüi ilaxle hünzom a chemchu chitüile chak hua ma dantoxüi.”

¹⁴Judah haxtok ma ku Gowarnor ang ngokya zanglao bün-anyi mong ma, ija a Artakses chongwangpa ang achangkya zanglao tsa nguikya makhange zanglao tsübün nguikya kople, kue tamchu ku homkha khünak opupuechu, Gowarnor tuitae saxlingle changse sütmüi-lingma ongaichu sax-lingle chichang.

¹⁵Ku thoma Gowarnor ang ngole hüikya khünakbu a khünaknu zongto hünlit ang achangle tüikya, chemthüikoxle hwome nyixfokya to hwom angkya khop ngunkhix punyi pong, süt hia ju hanpak ang jule lax. Hwom dabue ngaxchu khünaknu to sikangün. Ikoxlechu kue ile chimok, chemthüikoxle kue Zang achuakachenle tüikoxle.

¹⁶Tamchatle pan katuk zaile alai angkya hanpakma kue ku janzüi bakle kox ilaxle tuina jule laxkya chemchu chitüi. Ku hanpakma mwot mokkya khünak pangnusa ija katuk zai ma süt.

¹⁷Ku hato nguikya tomzi nok wünpabu boma kue Judah khünaknu hia hwom lompabu sün hota punyi-bün makhange nyixfokya to hom ma tux.

¹⁸Nyixfo to kue maihu tuipong, chun sümüimüi azok pong, o a othüt chitüile, ilaxle nyixbün obaba to müikya greptibu aling. Khünaknue chemtukuxkya hünlit chongkya hünle hüipuix, ija kue tikle ngo, ikhoma kue Gowarnor tuitae kopse süntom chemchu jule chingo.

¹⁹O Zang, kue nang to joppu, ibu khünaknu hanpakma kue chemtukux mokle alan fapuix, ku tsyen ibu texle atak-hüi.