Read Wancho Naga Nehemia 8 Bible Online

Nehemia 8 - Wancho Naga bible

Nehemia 8

¹Lyetjang anüt ma Israel khünaknu pangwüi ma tinglonglong ma homhax zaile ngo ang tsuakle hüi. Ija lyetjang owang nyixkha hwom Jerusalem ma, Ti Zünkai omong ma asox. Hwome, Izra owa, Mosa makhange Israel khünaknu ang koxkya JOWANPAe Wanlom nguapa tamchu tsingpa tuita ang ngole tüikya hex, chix ma, ija Wanlom Laipex apüi angkya bama atüi.

²Ikhoma Izra-e ija khünaknu: mixnu, mixpa tamchu jali awan tsuak tangkya naosombu asoxle tüikya khato apüi.

³Ikhato, ija zünkai zui angkya haxsha ma, swomsa makhange tungto kople chixe hwom hama ija Wanlom ele apua, ilaxle hwom pangwüie ija to mongkoxle apa.

⁴Ija mwot hanpakmale pünkhao füi zaile alaikya homthongsa ma Izra ajongle tüikya. Chix tsaxchi ma ibibi khünak tüikya: Mattithiah, Shema, Anaiah, Uriah, Hilkiah, hia Maseiah hwom bibi; ilaxle ibibi khünak a chix nongchi ma ajongle tüikya: Pedaiah, Mishael, Malkijah, Hashum, Hashbaddanah, Zekariah, ilaxle Meshullam.

⁵Khünaknu to kaile tsuakya homthongsa ma Izra ajongle ngopongma, hwom pangwüi-e chix chito tangthole hu. Chixe ija laipex shakya füi tomle, hwom pangwüi ajong.

⁶Izra-e thüi: “JOWANPA, Zang chongkya achuak kox!” Khünaknue pangwüi-e hwom chak ajong laxle lan: “Amen! Amen!” Hwome thün haxchi to akhuxle zangshwom.

⁷Ifüima hwom zo ilaxle manuinui ma ajongle ngo, ilaxle Liwi sün khünak ibibie hwom hama ija Wanlom akhixle wünle kox: Jeshua, Bani, Sherebiah, Jamin, Akub, Shabbethai, Hodiah, Maseiah, Kelita, Azariah, Jozabad, Hanan, hia Pelaiah hwom bibie.

⁸Hwome kax-kax ma ija Wanlom taile kox ilaxle khünaknue ija tsingle naxlaxkox ang akhixle apuale kox.

⁹Wanlome lomkya hwome atatle laxkya zuma, khünaknu mongto po ilaxle hwom a sop ang süt. Ikhoma Gowarnor Nehemia, nguapa hia Wanlom tsingpa ang ngokya Izra, ilaxle khünaknu hama Wanlom akhixle wünle fangtokya Liwi khünakbu, hwome khünaknu ang thüi: “Anyix a JOWANPA, hünzom Zang hanpakma otsao nyix changle, ikhoma hünzom a sop angkya oli münchang.

¹⁰Athax hom to chatlax ilaxle fongkhale pualax. Hünzome masüt-maling chitüi-chinang khünakbu füi tom-hanle changlax. Anyix a kem JOWANPA hanpakma otsao nyix changle, idaile hünzom ang mong taxma. Hünzom ang koxle tüikya JOWANPA mongmüi-e hünzom chatsak-muazongle changüi.”

¹¹Liwi hwom a khünaknu ang mongsom koxle, iningkya otsao nyix mongmakya chitüi angkya zangwünle pangnu khato aham.

¹²Ikhoma khünaknu mahom-hom to chat ilaxle mongmüi atungle saxlingle chang. Hwome ma ma tüikya jali chitüi-chinangkya khünakbu füi tom-hanle lax, chemthüikoxle hwome hwom hama e-le ahokya kax tsingle lax.

¹³Ofüi nyix saxthombu lompa hwom, Liwi hwom hia nguapabu füi tomlaxle, Wanlom ma anwot-anokya otong tikle awan angkya hanpakma otua lom ang Izra hato ngui.

¹⁴Oja Wanlom JOWANPAe Mosa makhange hwom ang koxle tüipuix, ija ma Israel khünaknu ang, Pomsa Pangpwon tukma, onox ma pom zailaxle ngo ang akaxle tüikya lomle atak.

¹⁵Ikhoma hwome ibu adangle fa ilaxle ibu Jerusalem hia mama tingnubu pangkha towüi kaxhole apao : “Haxhuabu to donglax ilaxle Wanlom ma adangle fale tüikya ningle pain, olip, martul, pam, ilaxle mama pün, ibu angkya pünkangbu apüihüi.”

¹⁶Ikhoma khünakbue ibu pünkangbu apaüi ilaxle hwom homkho ashakyabu ma, homtho ma, Zangshwom-Hom shat mongma ilaxle noknu ngwotnui Ti Zünkai hia Efraim Zünkai, ibu ma hwome noxta lax ang pomsabu zaile alai.

¹⁷Zanda ang ngokya chatkya khünakbu pangnusae wüi pomsa ibu zailaxle ikhato ngo. Nun sasün Jihusua tokfüi ma ile zingkya ija tix owang. Khünaknu pangwüi ang huanuma pwonla dongle mongmüi.

¹⁸Ija Pangpwon pongwang nyix makhange oshuk nyix kople hwome nyixfole Zang Wanlom jongpong-jongpong e-le hüi. Hwome ija pangpwon nyix anüt kople nui, ilaxle nyix achyet lükya to, Wanlom ma tüikya ningle, wanpao hanpak lax.