Read Wancho Naga Nehemia 9 Bible Online

Nehemia 9 - Wancho Naga bible

Nehemia 9

¹Ija lyetjangjang ma wüi nyixtsa ali nyixkha Israel khünaknu a hwom ochaxbu khoma mongmax ahole chisax-chilingle atsao angkya hanpakma asox. Hwome hwom lailai to mixnokbu füi atsaile changdaoa. Hwom mongma aho ang hwome nyi-za otsyenbu lax üntoxle khangpongbu ma haxbu füi lyet. Ifüima hwom ajong ilaxle hwome tamchu hwom pupa hwome lyenkya ochax pangwüi ngai.

³Khonta azom tukux jao laxle JOWANPA, hwom Zang Wanlom hwom hama ele kox, ilaxle ifüi angkya khonta azom hwome ma ochaxbu ngai ilaxle JOWANPA hwom Zang to shwom.

⁴Liwi hwom hanpakma tanlya tuita tüikya, ilaxle ikhama Jeshua, Bani, Kadmiel, Shebaniah, Bunni, Sherebiah, Bani, ilaxle Kenani, hwom bibi ajong. Hwome JOWANPA hwom Zang to akhongle zangjop.

⁵Ibibi Liwi hwome zangshwom ang khünaknu ahyen: Jeshua, Kadmiel, Bani, Hashabneiah, Sherebiah, Hodiah, Shebaniah, ilaxle Pethahiah. Hwome thüi: “Ajongkox üntoxle JOWANPA hünzom Zang achuak kox; chix othuithuima achuak-achen kox! Noknusae wüi fuazangkya chix mün achuakle changkox, khünak owae achuakkya chu okhonguikya chichang koxlechu.”

⁶Ifüima Israel khünaknue ija zangjop jop: “nang a JOWANPA changpu, JOWANPA a nang tata wüi; zangdingkho hia ibu ma tüikya lyettsi-lyetsa pangnu nange zingpu. Nange chaxwan zangfang zing ilaxle ikhama atüitüi pangwüi nange zingpu; ibu pangnusa ang khüzün-zakdün nange fapu. Zangkho tokya tsak-zongbue nang tong to akhuxle shwomle.

⁷JOWANPA, Abram zünle kopkya Zang nang changpu, ilaxle Babilon nok ma tüikya Ur tingnu angkya chix nange zunle paopu; nange chix mün Abraham le alüix fapu.

⁸Nange chix a nang to mongong tüikya mix tuita changpule atakpu, ilaxle nange chix füi tsaotsüt laxle kaxfün tuita zingpu. Nange chix ang Kanan Chaxwan koxüihex-ole tsaopu, Hit nok hia Amor nok haxtok, Peri nok, Jebu nok, ilaxle Girga nok, ibu haxtok, chixsu chixsa hwom ngo angkya haxtok ang changüile koxpu. Nange nang kaxtsao otya ma thompu, nang mongong ma loplüikya chitüi.

⁹“Kwom pupa hwom Ijip nok to chemle sikngünle ngopuix, ija nange ngünlelax; Tütsak Tinu kax ma hwome fonghüile nyakle akhongkya nange atatlelax.

¹⁰Nange wanghompa zongto khomtsikya mwotbu mokle ahopu, chix nguakax-wangkhobu hia chix chaxwan ma ngokya khünaknu zongto a, chemthüikoxle nang khünaknu to ibue chemle sikangün thompuix ija nange awan koxle. Ifüima nange anyix kople tüikya nang münfua kop.

¹¹Molo Tinu akaile nang khünaknu le nange lom daple koxpu imakhange hwom haxza to tale le ang tompu. Hwom achuale zikkya khünakbu tinu mongto single zi ang tompu, tinu tichap mongto longsa dütkya ningle dütle sam.

¹²Anyix ning ma nange hwom zangfwom füi azüi, ilaxle zangnak ma nange wünchua füi hwom lomtang angaile kox.

¹³Sinai Haxnu ma nang zangkangting tokya ju; nange nang khünaknu füi zangwün ilaxle nange hwom ang müikya wanlombu hia sukya hwon-nwotbu kox.

¹⁴Nange hwom hama nang Sabathbu otsao ma thom angkya akax, ilaxle nang dapa Mosa makhange nange hwom ang nang wanlombu kox.

¹⁵“Chemtue hwom ang wok anole changpuix, nange hwom ang zangkangting tokhange süt fa, ilaxle ti alan pongma longnu tuita makhange ti alaile koxpu. Nange hwom ang ija haxtok akox-akomle chang angkya akaxpu nange hwom ang koxüihex-ole tsaokya haxtok a.

¹⁶Ikoxle kwom pupa hwom a mongngam hia kax ma chilaxle tüi ilaxle nang kaxtombu mün-apapu le angam.

¹⁷Hwome kax ma münlaxpule angam; nange hwom hanpak ang mokdaokya mwot pangwüi hwome alakle asam; nange ohünotün mwot mokle ahokyabu pangwüi hwome alakle asam. Hwom mongngam füi hwome lompa tuita kam Ijip chaxwan to hwom tamchatle da ang achangkya angkya hanpakma a. Ikoxlechu nang a thaikya pangwüi alak tsuakkya Zang; nang a chingcha hia mongkün füikya Zang, zaxhunle tix mongtsikya Zang a. Nang chingcha a huanu changle; nange hwom awütle chitox.

¹⁸Hwome maihupongsa lailaikya chapa tuita zingle alai üntoxle Ijip chaxwan tokya hwom alaile apüikya baozang a ija changpule akax! JOWANPA, Hwome nang tha chemtukux ajaopuix!

¹⁹Ikoxlechu nange ija sak-hax to hwom danle chitox, chemthüikoxle nang chingcha a huanu chang koxle. Nange ija zangfwom hia wün hwom füi atsai ang chitom ikoxle ijae zangnak zangngai hwom lom azüi ang tom.

²⁰Nang künmüi-mongmakya füi nange hwom ang, hwome chem mok angkya olom hex ija apuale kox; nange hwom manna füi tux ilaxle ling angkya ti alaile kox.

²¹Sak-hax to zanglao punyi akaile hwom ang laxli chem tüipuix pangwüi nange kox; hwom nyizabu büile pao ang chitom, hwom chabu kakle hia fingle chang ang chitom.

²²“Nange hwom ang mixjat-mixlibu hia wangtingbu to lütle chaxwan kop ang tom, hwom füi long azile tüikya haxtokbu a. Sihon-e apünle ngokya Heshbon haxtok, wanghom ang Og ngole tüikya Bashan haxtok, ibu to hwome wüi lüt ang tho.

²³Nange hwom ang ding angkya lyettsi büta su-sabu kox, ilaxle zan nok to anaolaxle ija haxtok ma ngo ang tom nange hwom pupa hwom ang tsaole thomkya haxtok ma a.

²⁴Hwome Kanan chaxwan tingtakle tsuak; ikhato ngole tüikya khünakbu to nange anao. Nange nang khünaknu a hwom mongtex ma mok angkya janzüi kox Kanan haxtok angkya khünaknu hia wanghombu to a.

²⁵Nang khünakbue pan zaile ziakop thomkya tingnubu tingtakle lax, haxzao füikya haxtok, tuinabue awangle tüikya homhaxbu, thole achwon daokya tüküibu, olip pünbu, oziak füikya pünbu, ilaxle grep haxtokbu. Hwome saxse tsukya oli pangwüi hwom sax ilaxle tsaktsa dongle nut; nange hwom ang koxkya müikya oli pangwüi füi hwom mongmüile ngo.

²⁶“Ikoxlechu nang khünaknue nang füi alünle ajong ilaxle nang kax ma chilaxle tüi; hwome nang Wanlom hato hwom tok aho. Hwom ang kaxkhün koxkya ajebu hwome langle awüt, nang hato mong chatle hüi angkya hwom füi akaxkyabu a. Janpong bato hwome nang tha ajao,

²⁷ikhoma nange zan-nokbu ang hwom tingsum laxle hwom thakma apün ang tom. Hwom sikngün chifün tokhange hwome asunhüile nang nyakle akhong, ilaxle zangkangting tokhange hwom kax to lan. Nang chingcha chongkya füi nange hwom hato lompabu ahüi zanpabu chak tokya hwom khosünle fakya lompabu a.

²⁸Chemtue tumüi lomkhao chatle hüipuix, anaole chuwüi hwome ochax lyen, ikhoma anaole chuwüi nange hwom to zan nokbu ang lüt ang tom. Ikoxlechu chemtue hwome monglüile chatkya füi hwom to asun angkya nang ahyenpuix, zangkangting tokhange nange atatle lax, ilaxle jantakya bama nang chingcha chongkya füi nange hwom khosünle kop.

²⁹Nange hwom ang nang hwon-nwotbu kax ma laxle tüi angkya kaxkhün kox, ikoxlechu mongngam makhange hwome nang hwon-nwot pongle chikop, nang Wanlombu thom angkya a hwom zongto khüzün lomtang changkya. Ngom awyale tamchu künkhüi-mongdüi füi, hwome kax ma münlaxpule angam.

³⁰Zanglao fo to adukya füi nange hwom ang kaxkhün kox. Nange nang ajebu ang akax angkya kax kox, ikoxlechu nang khünaknu ang natüt, ikhoma nange hwom to mixnok wangtingbu lüt ang tom.

³¹Ile chang koxlechu, nang chingcha chongle tüikya khoma, nange hwom awütle chitox chichangba olithule chiama. Nang a mongkün hia chingchajaja füikya Zang changle!

³²“O Zang, nang kwom Zang, nang a chemtukux chongpuix! Chemtukux za-adünle, chemtukux tsak-zongle tüipuix! Nange chialekya mogong füi nange tsaokyabu kaxfün otya ma thom. Asiria nok wanghombue kwom to zothuple changkya tokhange, athax kople, kwom chemtukuxle sikngünle hüidaopuix! Kwom wanghombu, kwom lompabu, kwom nguapabu hia ajebu, kwom putong hwom, ilaxle kwom khünaknu pangwüi sikngünle hüidaoa. Kwome chemtukuxle sikngün apongle hüidaopuix texle atak-hu!

³³Kwom to sikangünkya bama nange sukya mwot mokpu; Kwome ochax lyenle changkox ngaxchu, nang mongong ma chiale.

³⁴Kwom putong hwom, kwom wanghom hwom, lompa hwom, ilaxle nguapabu, ibue nang Wanlom chithom. Hwome nang kaxtom hia kaxkhün koxkyabu to chiapa.

³⁵Nang mohiman füi tix, wanghom hwome nang khünaknu to apünpu, nange hwom ang koxkya, mixnok chaxwan haxzao füikya haxtok to ngopongma; ikoxlechu hwom ochaxbu tokya mong aloplaxle nang thotha ang hwom chichat.

³⁶Ikoxle nange kwom ang koxkya haxtok ma athax kwom da ang ngole hüipu, nange kwom ang süt fakya ija haxzao füikya haxtok ma.

³⁷Haxtok ma alaikya puamün chemtüipuix wanghombu hato nguipu, kwom ochax khoma nange kwom thak ma apün ang koxkyabu hato a. Hwome kwom füi tamchu kwom tsom-pom füi hwom mongtextex ma hwon, ilaxle kwom a müimamale mongmaxle ngole hüi!”

³⁸Chempangle changle hüipuix, ibu pangnu khoma kwom, Israel khünakbue, chakza makhange jaojao kaxfün zang tuita wün, ilaxle kwom lompabu, kwom Liwi hwom, ilaxle kwom nguapabue ija to hwom sohi shing.