Read Wancho Naga Estar 1 Bible Online

Estar 1 - Wancho Naga bible

Estar 1

¹Parsia chaxwan angkya pongwün-tingnu Susa ma tüikya chix tüntong makhange Wanghompa Sarkses-e haxtok 127 apün. Chix wangting a India makhange Sudan alople tüikya.

³Chixe apünkya zanglao azom lükya to chixe ma okax-okhobu hia pünpa-chongwangbu ang fongkhale püntux. Parsia hia Medi nok angkya süpahibu, tamchu haxtok-haxtok tokya gowarnorbu hia alixachong pangwüi ikhama tüikya.

⁴Chixe lyet azok jao laxle, chix chongwanghom khwa hia ima tüikya tuiza-nakom hia chuak-chongkya füi ahak-aluale tüikya pangwüi aho.

⁵Ifüima wanghompa-e, Susa tingnu ma tüikya khünaknu, hakpa-luapa hia mixshix-zasa pangnu ang püntuxle fong asüt. Ija püntux ang hatdang tuita jao hom. Ija pangpwon a wanghompa homtho ma sax.

⁶Ikha angkya lopsha a nakle hingkya hia tsekya pai tuknyie aza-apua laxle tüikya. Ija tuknyi a fixfax-long thongnu ma bünkya khop-jan janka ma lumle khikya jakzi füi khakle tüikya. Toktyet füikya tüntongbu, hun hia khop-jan, fixfax-longkhik, tsekya, nankya hia nakkya, ibu pyale dankya dingma tüikya.

⁷Jubu a hun wansabu ma thokle kox. Wansa ibu anyi ngaxchu talailaile chitüi. Wanghom homkha angkya saxnu-jusa ojao chiakhüixle kox.

⁸Juling ma chem othüt chitüile ling. Noknusa ang wüi mae tsuakkyapong le aling angkya wangdabu ang wanghompa-e kaxkox.

⁹Ipongma, wanghom homkha to wangchanu Wasti-e chuwüi shekobu püntuxle tüikya.

¹⁰Ija püntuxkya pangpwon nyix anüt lükya to wanghompa chuwüi saxsax-julinglaxle tüle mongmüi atungle tüikya. Chixe wangchanu to hu ang otui zinglaxle thomkya wangda: Mehuman, Biztha, Harbona, Bigtha, Abagtha, Zethar üntoxle Karkas hwom mixsün anüt se.

¹¹Wangchanu Wasti, wangcha khüsün sünlaxle ikhato apüi angkya chixe hwom ang kaxkoxle apao. Wangchanu a osün tüle müikya wangcha tuita changkya. Ikhoma wanghompa-e she sünmüikya, chix okax-okhobu hia mixwünbu pangwüi hato ahosele tsu.

¹²Ikoxle chemtue da ibue wangchanu hama wanghompa kaxtom ngaile changpuix, she-e ikhato mün-nguile angam. Ijae wanghompa ang huanuma mongtsik ahüi.

¹³Iningle wangtsai-wangkax ma chilaxle wanlom ahaikya hanpakma chemle hwonkoxle müiüile atsing-awankyabu ma atüi angkya a wanghompa wanlom changkya.

¹⁴Chixe iningkyabu je-hwon lax angkya khünak ibu ma atüi zaikya: Karshena, Shethar, Admatha, Tarshish, Meres, Marsena, üntoxle Menukan; ibu alixachong hwom mixsün anüt a Parsia hia Medi wangting ma akhokya okax-okhobu hwom chak ma tüikya.

¹⁵Chixe hwom füi akax: “Ku, wanghompa Sarkses-e kaxtom füi wangchanu Wasti se ang apaopu, ikoxle she-e ija kaxtom kax ma münlax! She a chemle chang angkya oli? Wanlom ma chemle tüipuix?”

¹⁶Ifüima Menukan-e wanghompa hia chix okax-okhobu hama angaile akax: “Wangchanu Wasti-e wanghompa tata tha ajaokya münchang, ikoxle chix okax-okhobu tamchu, wangting ma tüikya noknusa wünhaikya changpu!

¹⁷Wangchanu Wasti-e wanghompa to ile hwonkya atatkya füi tomle ija wangting angkya shekobue ma kakopabu to wünhaile changüi. ‘Wanghompa Sarkses-e se-koxle wangchanu Wasti münhüile angampu ta’, le hwome thüiüi.

¹⁸Parsia hia Medi nok angkya okax-okhobu kakonubue ija wangchanu zanglom chimüikya bama atat ang kopkya nyix hanhomle changüi thoto wüi hwome ija zangwün ma kakopabu na to atat ang tomüi. Pangnu khato wüi shekobue ma kakopapa to wünhaile changüi, ikoxle kakopabu a ma kakonubu füi mongtsikkya tüiüi.

¹⁹Wanghompa, nang mong jangtsuba, wangchanu Wasti-e wanghompa hato tamchatle thün aho angkya müntüiüile khuapu angkya kaxtom laxkox. Ija wanlom a ongaichu chialex angkya hanpakma Parsia hia Medi nok chaxwan angkya wanlombu khato zale chang angkya kaxtom laxkox. Ilaxle she man ma wangcha nui a she füi sümüikya mixcha owawa ang koxdao.

²⁰Ipong chongkya wangting pangnu khato wüi chemtue ija khuapukya kax atat ang kopüihex, saxpu-luawang hia tuimix-nuakmix chemchu chisüile, kakonubue ma kakopabu to tüle achuak-achenle changüi.”

²¹Wanghom hia chix okax-okhobu pangwüi zongto ija zangwün a tüle müile atat. Menukan-e ile chang koxle müikox laxle thüikya ningle wanghompa-e mok.

²²Wangting ma womkya haxtok pangnu khato wüi, hwom onok-onok zangwün hia laiza olom tole zalaxle, pangnu kako to lüka mixpabu a kakopa changle idaile chixe tsaitsuak-kaxtsuakle zangwün angkya changle, le kaxho apuk.