Read Wancho Naga Estar 3 Bible Online

Estar 3 - Wancho Naga bible

Estar 3

¹Ifüima alüile chingo homtoxle wanghompa-e Haman le amünkya mixsün wanghom chakta alixachong ang achang. Haman a Hammedatha sasün, Agag sixli tuita changkya.

²Chikux athong laxle akhuxle shwomle Haman ang chathua zakya aho angkya bama wanghompa-e chix okax-okhobu pangwüi ang kaxkox. Mordekai owae ile münchangpu le angampuix, chix tata toxlaxle hozui hwom pangnusae kaxtom kopkya ningle mok.

³Chixe büthüikoxle wanghompa kaxtom ma laxle chitüipu le chongwang thotha ang ngokya mama okax-okhobu bue chix ma atüi.

⁴Nyixfokya to hwom lailaile shwom angkya hanpakma hwome chix tsya, ikoxlechu chixe hwom kax to chiapa. Chixe thüi: “Ku a Judah khünak changle idaile kue Haman tuntho to akhux ang müntsuak.” Ikhoma hwome ija bama Haman hama wünle kox. Ija Mordekai kax Haman-e adu ang tholax angcha le hwom khosam.

⁵Mordekai-e chix tuntho to akhuxle münchangüile awan ang kopkya zuma Haman ang tüle mongtsik.

⁶Chemtue chixe Mordekai a Judah khünak changle le awan ang koppuix, chixe Mordekai to sikangünkya to oziakaile Parsia haxtok angkya Judah khünak pangwüi mik amüt ang tung.

⁷Wanghompa Sarkses-e apünkya zanglao bün-anyi lükya to, pongwang lükya lyetnu, Nisan lyet ma, ija tungdaokya mwot mok angkya hanpakma asukya hanpak hia lyetkua lomle atak angkya hanpakma, hwome nyakkya “Purim” lomle nantak angkya kax kox. Lyetbün anyi lükya, Adar lyet ma, nyixbün azom lükya nyix kamle kop.

⁸Ikhoma Haman-e wanghompa füi akax: “Nang chaxwan zangfang angkya wangtsak ting pangnu khato chiakle tuita jat-li tüile. Hwome mix füi ajüikya wanlombu twonle. Tamtai lechu hwome kem chaxwan angkya wanlombu kax ma münlax, ikhoma ibu ngo ang tomkya ma nang ang olüi chemchu müntüi.

⁹Chongwangpa, nang mong jangtsu thüiningle, hwom a mik-amüt ang tom angkya kaxtom koxhüi. Nange ile chang ang jangtom thüiningle, nang wangting apün-awang angkya hanpak ang kue wanghom hwom tuina khama 375 khop-jan ngun dan ang thoüi.”

¹⁰Chix khuapu laiza pangnu to pünpa-chongwang ang achang angkya hanpakma shintop ang laxkya chix khoptüt wanghompa-e suk ilaxle Judah khünakbu zanpa, Hammedatha sasün tamchu Agag sixli Haman chak to kox.

¹¹Wanghompa-e chix ang thüi: “Khünaknu üntoxle hwom ngun-syen a nangkux changle; hwom to nange chemle hwonse tsupuix ile hwonlax.”

¹²Ilailaile pongwang lükya lyetnu nyixbün azom nyixkha Haman-e wanghompa chakzamixbu nyak üntoxle wangting angkya pangnu jat-li zangwün ma, hwom laiza olom tole zalaxle pünpa-chongwangbu, gowarnorbu hia okax-okhobu pangwüi hato apuk angkya laiza, chixe tun ma akaxkya hwome zale kop ang tom. Ija laiza a wanghompa mün ma, chix khoptüt füi shintop laxle afan.

¹³Zikkyabue ija khuapu laiza wangting angkya tingnu-noksa pangnu khato afan. Ija laiza ma zangwün otong ang: Nyixta ma wüi, ija a Adar lyetnu nyixbün azom lükya to, mixnu-naosa zunu-zupa chisüile: Pangwüi mik max ang tom angkya changle. Hwom a ojao chingchajaja chitüile lang angkya üntoxle hwom mwot-kat a pangwüi tsui angkya changle.

¹⁴Ija khuapu zangwün a angkya wangtsak ting pangkha towüi noknusae atat ang tom angkya oli changle. Ile chang koxle hanpak nguikya zuma pangnusa wüi achwonle nui ang tsuaküi.

¹⁵Wanghompa kaxtom ma ija khuapu a pongwün tingnu Susa machu noknusa na to atat ang tom. Zikkyabue ija kaxho angkya wangtsak ting pangnu khato wüi apuk. Susa tingnu a tüle khosam to adütlaxle wanghompa hia Haman hokhi a juling ang thung.