Read Wancho Naga Estar 4 Bible Online

Estar 4 - Wancho Naga bible

Estar 4

¹Chemtue ile changkyabu Mordekai-e awanle laxpuix, mongtsik üntoxle chixe chix nyi akyetle awüt. Ifüima chixe nyikhwon nyi lax, chix khang to labu füi fu, üntoxle tingjang lomnu to aham. Chix tüle akhongle sople ahamkyae

²wanghom homtho alople shu. Nyikhwon nyi apongle tüikya khünak owachu nop ang chikox angkya wanlom tüikya khoma chix a hommong to chidong.

³Wanghompa kaxhua apukle changkya haxtok pangnu khato wüi, Judah khünakbu a mangsopkyae awangle tüikya. Hwome chisax-chilingle atsao, sop, mongmaxle sop, üntoxle hwom sülui tukuxe nyikhwon nyi awun ilaxle labu khato jip.

⁴Chemtue Estar hama she dacha hia famaxbue, Mordekai-e chempangle mokle ngopuix, ibu wünle koxkya zuma she mongto huanuma kak ilaxle mongna chizak. Nyikhwon lüima apong ang she-e Mordekai hato nyizabu koxle apao, ikoxlechu chixe ibu pongle chikop.

⁵Ikhoma she-e, wanghompa-e she da hanpak ang kamle thomkya wanghom hom angkya zwom züidaokya tuita, Hathak le amünkya mixsün sele apüi. Mordekai hato nguilaxle chempangle chemkhoma changpuix ibu paktik angkya hanpakma she-e chix tsanle apao.

⁶Tingnu tingtan mong ma, wanghom hom fülom ma ngole tüikya Mordekai hato Hathak ngui.

⁷Mordekai-e chix to chempangle changpuix ibu pangwüi wünle kox. Judah khünak pangwüi mik-amütle jangchang thüiningle Haman-e wanghom suak ma ngun chemtukux koxüile tsaosaxpuix, ija chuwüi wünle kox.

⁸Susa angkya Judah khünakbu mik-amüt angkya hanpakma wanghompa-e khuapukya laiza ofa tuita chuwüi chixe Hathak chak ma koxle apao. Estar-e she khünakbu hanpakma chingcha ju angkya hanpakma wanhompa hato nguile naxchang ang, hwom chaxwan zanghan apuale fa angkya üntoxle ija laiza Estar hato apüile fa angkya bama Hathak füi shingmongle akax.

⁹Hathak-e ile wüi mok.

¹⁰Estar-e chuwüi ija kaxnong Mordekai hato achatle kox angkya hanpakma Hathak chak to laiza kox:

¹¹She-e thüi: “Owawa, sheko wüi changlax lüka wüi changlax, chixe chisekya khato, wanghom khwa nuithong to nguilaxle chix sün ngünle jangchang thüikoxle, ija khünak a mik-amüt angkya changle. Ija a, wanghompa adangpabu makhange angkya wangtsak ting ma tüikya khünak noknusae awanle ngokya wanlom changle. Ija wanlom ziakai tsuak angkya olom tuita wüi: chemtue wanghompa-e chix hun khoptüt suklaxle owawa ang koxle jangchang thüiningle, ija khünak khüzün a sünle kopüi. Ikoxle wanghompa-e ku sekya füima lyetjang jao nguidaoa.”

¹²Chemtue Mordekai-e Estar kaxho koplax puix,

¹³chixe she hato kaxkhün ija achat: “Wanghom hom ma ngoündaile haxtok angkya Judah khünakbu füi nang wüi chem abüt-aban angkya müntüile texlaxma.

¹⁴Iningkya tukma nang dangjale jangngo thüiningle, Judah khünakbu hato ofong a zangkangting tokya nguiüi. Hwom a azangüi ikoxle nang a mik max angkya ataküi, ilaxle hünpa homkha a okothomkya ang achangpu. Ikoxlechu owa tsing, iningkya tuwan zanghan hanpak ang Zang-e nang wangcha ang achangle thomkya chuwüi changtüilax!”

¹⁵Estar-e Mordekai hato ija kaxnong achat:

¹⁶“Paokox, ilaxle Susa angkya Judah khünaknu pangwüi sele asox kox; ilaxle ku hanpakma chisax-chilingle atsaole zangjop kox. Nyixzom wünzom hanpakma chemchu taxsax taxling. Ku dacha kwome chuwüi ile changüi. Ile chang füima, wanlom ma chitüi koxlechu ku wanghom hato nguiüi. Ile changkya khoma mik max angkya laikoxchu ku mik naxmax kox.”

¹⁷Ifüima Mordekai-e ikha dantoxlaxle Estar-e chix ang chemle moklax thüipuix ija mok.