Read Wancho Naga Estar 6 Bible Online

Estar 6 - Wancho Naga bible

Estar 6

¹Ija ja wanghompa jip ang chitho, ikhoma chixe wangting angkya pünpa-chongwang bama zakya laizabu pangwüi apüilaxle chix hama ele atat ang tom.

²Ipongma, Bigthana hia Teresh nyie wanghompa lang ang tungkya Mordekai-e loplaxle ngaile wünkya tokhange wanghompa azünkya bama laiza ma thomkya ele lax. Ija mixsün anyi a wanghom nuibu nye ang thomkya famax nyi changkya.

³Wanghompa-e atüi: “Ija khoma keme Mordekai ang hingho hia münchong chemle fadaopu?” Chix dapabue lan: “Chix hanpakma chemchu mamok.”

⁴Wanghompa-e atüi: “Ku nguakax-wangkho owawa ipongkhae pa ma tüicha?” Ipongkhae Haman a khwa hommong to ile nople asu; chix a achwonle thomdaokya dangzembu ma Mordekai lang angkya hanpakma wanghom ma tsaiju-kaxju ang nguikya changkya.

⁵Ikhoma dapabue lan: “Ikhama nang tanle Haman tüile.” Wanghompa-e thüi: “Chix ito ngui ang tomkox.”

⁶Ikhoma Haman wanghom nui to dongle hüi. Wanghompa-e chix ang thüi: “Kue huanuma achuak-achense le tsukya khünak tuita tüile. Kue ija khünak achuak-achenle chemle hwonsedai?” Haman-e ija a chix ang thüikya changpule thütlaxle chix mongto zangwün: “Wanghompa-e achuak-achense le tsukya khünak a ku boma owa namchangüi? Ija a ku ang thüikya wüi changpu.”

⁷Ikhoma chixe wanghompa kax to lan: “Ija mixsün hanpakma chongwang zapua apüile laxkox: ija mixsün ang nang zapua lailaile aza-apuale laxkox. Wanghom tuiza-nakom laxkox ilaxle nang mankho ma angatkox.

⁹Ilaxle ija mixsün a nang nguakax-wangkhobu kha angkya akhokya tuitae ibu füi chix aza-apuale chang ang tomkox ilaxle mankho ma angat laxle tingjang lomnu to chix syetle aham ang tomkox. Ija mixsün syet laxle ahamle ngopongma: ‘Hulax, chixe achuak-achenle changse tsukya khünak to wanghompa-e chemle hwonpuix, hukoplax!’”

¹⁰Wanghompa-e Haman ang thüi: “Momlax, ibu chongwang zapuabu hia man apüikox. Judah nok Mordekai ang ija achuak-achenkya laxkox. Nange ile chang koxle müiüile thüikya pangwüi chix ang mokle laxkox. Nang thoma chix a wanghom homtho ma thungle bangüihex.”

¹¹Ikhoma Haman-e ibu zapua hia man apüi. Chixe ibu zapua Mordekai ang aza-apuale kox. Mordekai a mankho ma angat üntoxle Haman-e chix a tingjang lomnu to syetle aham. Hokhi le le ngopongma Haman-e: “Wanghompa-e chixe achuak-achense le tsukya khünak to chemle achuak-achenle changpuix hukoplax!”, le khuapule le.

¹²Ifüima Mordekai a wanghom homtho to chat ikoxle Haman a mongma laxle thünzim üntoxle nonokhaile hom to chat.

¹³Chix to chemle changpuix ibu pangwüi chixe ma kakonu hia hozui hwom pangwüi hama wünle kox. Chix kakonu hia ibu je füikya chix zuikhuibue thüi: “Nange nang tsak-zong Mordekai chak to adün angkya owang wangpu. Chix a Judah khünak changle. Nange chix to lüt ang münthoüi. Tütale wüi changkoxchu chixe nang to lüt angkya changle.”

¹⁴Hwome ile kaxkaxle ngoponge, wanghomkha angkya zwom züidaokya, Estar hom to fongsüt ma wom angkya hanpakma Haman nyak ang nonokhaile ngui.