Read Wancho Naga Estar 7 Bible Online

Estar 7 - Wancho Naga bible

Estar 7

¹Idaile wanghompa hia Haman nyi Estar hom to fongsax ang pao.

²Ija a othom anyi lükya fongsüt changkya. Jutok laxle wanghompa-e she ang tamchatle chuwüi akax: “Wangcha Estar, athax nange chem laxse tsupu? Nange ku hama akaxhüi, kue ija nang ang koxüi. Kue nang ang ku wangting süifi changkox-ngaxchu koxüi.”

³Wangchanu Estar-e thüi: “Wanghompa, nang mong jangtsu thüiningle ku chuwüi üntoxle ku khünakbu chuwüi ozün ma ngo ang tomhüi.

⁴Ku üntoxle ku khünakbu a lang angkya hanpakma hangle tsuakdaoa. Da ang hangle apaokya to kaikya ziama chichang thüikoxba kue nang ting chiatuingo homtoxle ku dangle ngose; ikoxle kwom a langle amütüi khakha!”

⁵Ifüima wanghompa Sarkses-e Estar ma atüi: “Ija ningkya mwot mok ang owa mongchongpu? Ija mixsün ojongto tüi?”

⁶Estar-e lan: “Kwom zanpa, kwom zothuppa a ija bao Haman changle!” Haman-e wangcha hia wanghompa nyi to tüle abüt-abanle hu.

⁷Mongtsik ashukle wanghompa ngwotnui angkya ajong, homkha angkya lailaxle homtho angkya wanghom tsawat khato pao. Ija khoma chix ang sikngün fa angkya wüi changle le wanghompa mongtsik ngünlaxle, chix khüzün chiamüt angkya hanpakma Estar ma chingcha ju ang tokfüi chito ngo.

⁸Chixe Estar ma chingcha ju ang she tüntong ma akhuxle ngopongkhae tsawatkha tokya wanghompa homkha to dongle asu. Ija ngünle laxkya zuma wanghompa akhongle thüi: “Ija mixsüne, ku homkha ma, ku tunthoma wangcha to chak jaoe twon ang thüipia?” Wanghompa-e ile akaxkya füi tomle zwom züidaokya-e Haman khang to chwop.

⁹Hwom kha angkya, Harbonah le amünkya mixsün tuitae thüi: “Wanghompa, nang khosünle koxkya Mordekai lang angkya hanpakma Haman-e chix hom to dangzembu ngaxchu wüi zingle achwon thomle. Ija a 75 fit chuakle tüile!” Wanghompa-e kaxtom koxle thüi: “Haman a ija ma fünle lang kox!”

¹⁰Ikhoma Haman a chixe Mordekai lang angkya hanpakma zingkya dangzembu ma afünle lang. Ile tix wanghompa ang mongtsik dang.