Read Wancho Naga Estar 9 Bible Online

Estar 9 - Wancho Naga bible

Estar 9

¹Adar lyetnu tsübünlükya nyix nguile hüi. Ija nyix a Judah nok zanpabue hwom mik amüt angkya hex-o lükya din changkya. Ikoxlemix Judah khünakbue hwom towüi anao.

²Wangting angkya tingnu pangnu tokya Judah nok kako-kako to owawae hwom aza-anale changkya pangwüi to jannong-alüi ang azong. Pangnu khato wüi khünakbu a hwom thua wüi za, üntoxle owaechu hwom füi alünle ajong ang chitho.

³Wünhax thüikoxle, haxsüt angkya okax-okhobu: gowarnorbu, pünpa-chongwangbu üntoxle wanghom hwom mün ma: hwome Judah khünakbu to fong chemthüikoxle hwom a Mordekai thuaza.

⁴Wanghompa khwa ma Mordekai a alixachong khünak tuita üntoxle chix tsak-zong ma janzüi süchongchongle tüi.

⁵Ikhoma Judah khünakbue hwom zanpabu füi chemle mokse hex ija mok ang tsuak. Hwome chang-paxbu füi hwom to chakmokle lang.

⁶Pongwün tingnu Susa jaojao ma Judah khünakbue ho-aga khünak lang.

⁷Hwom bibi khama mixhuak bün a, Judah nok zanpa, Hammedatha sasün Haman sasün hwom: Parshandatha, Dalfon, Aspatha, Poratha, Adalia, Aridatha, Parmashta, Arisai, Aridai, üntoxle Waizatha hwom bibi changkya. Ikoxlechu hwome hwom bwot-ba chemchu chilax.

¹¹Ija nyix Susa tingnu ma khünaknu langkya kaxho wanghom hato apüi.

¹²Ipongma chixe wangchanu Estar ang thüi: “Haman sasün hwom bün chuwüi womle Susan tingnu tata ma ngaxchu khünaknu ho-aga lang. Onok mamabu to hwome chemtukux wüi mokdaotüi! Nange athax chem laxse tsupu? Nange ija kopüi. Nange chem laxse tsupuix, ija kua hama wünhüi, kue ija nang ang faüi.”

¹³Estar-e lan: “Wanghompa, nang mong jangtsuba, anyix chemle mokdaopuix ija ningle Judah khünakbue Susan Tingnu ma ngainyix chuwüi mok ang tomkox. Ilaxle Haman sasün hwom mangbu a pünkhao ma asha ang tomkox.”

¹⁴Wanghompa-e ijachu mok ang tom, ilaxle ija bama kaxho Susa ma apuk. Haman sasün hwom mang a noknue ngün ang alai.

¹⁵Adar lyetnu nyixbün ali lükya to Susa angkya Judah khünakbue tingnu angkya khünak chatle chu ho-azom onüi mik-amüt. Ikoxlechu hwome ibu ang tuina chilax.

¹⁶Mama angkya wangtsak ting tokya Judah khünakbue chuwüi asoxlaxle alüile ma khose. Hwom to tsak-khule ngokya hwom zanpabu hajat puzombün aga khünak langle awüt laxle zanthua zale ngokya zak ang tom. Ikoxlechu hwome ibu angkya tuina chemchu chilax.

¹⁷Ija a Adar lyetnu ma nyixbün azom nyixkha chang. Ofüinyix, nyixbün ali lükya to lang-huakkya chitüi, ilaxle ija nyix hwome mongmüi to fongkhale sax.

¹⁸Ikoxlechu Susan angkya Judah khünakbue nyixbün aga tix nazakle nuikya nyix ang lax, chemthüikoxle hwome zanpabu bünazom hia bün ali nyix langlaxle nyixbün aga lükya totix nazak.

¹⁹Ija khoma tingsa noksa to ngokya Judah khünakbue Adar lyetnu nyixbün ali nyixkha a mongmüi-pwonla atungkya nyix tuita ang laxle, tata füi hingho chaktwon ma alüixle fongkhale nui.

²⁰Mordekai-e ija apongle hüidaokya a lai ma zale kop ilaxle ija laiza, Parsia wangting, tsailo hia nuisox pangnu khato, Judah khünak pangnusa hato afan.

²¹Ija laiza ma Adar lyetnu ma nyixbün ali hia aga nyix a zangpua foto atsaole nui angkya kaxkox.

²²Hanpak ibibi a Judah khünakbu ma zanpabu chak tokya azangkya nyixbu changle; ija lyetkua a künmax-mongshanle ngokya mongmüi-pwonla füi alüixle laxkya lyet changle. Ija nyix fongkhale sax üntoxle tata füi fong ma alüixle tamchu mixshix-zasabu ang hingho tuita ningle osüt-oling koxle chang angkya hwom füi akax.

²³Ikhoma Judah khünakbue Mordekai kax ma laxle ija puakya a zanglao to wanlom tuita ang laxle nui.

²⁴Haman, owa Hammedatha sasün: Agag sixli tamchu Judah khünakbu zanpa changkya hex: chixe Judah khünakbu mik-amüt angkya hanpak chizing to nan tak (hwome ija ang “Purim”, le nyak); chixe hwom pangwüi olithule amüt ang tung.

²⁵Ikoxlechu Estar wanghompa hato ngui, ilaxle wanghompa-e kaxtom koxle laiza afan. Ija laiza makhange, chixe Judah nok mik-amüt ang tungkya khoma Haman-e mik max angkya atak ilaxle sasün hwom a dangzembu ma afünle lang.

²⁶Ikhoma ija atsaole nuikya ang Purim le nyak. Mordekai laiza khoma tamchu hwom to chempangle changpuix ibu khoma,

²⁷Judah khünakbu hwom hanpakma tamchu hwom su-sabu hanpakma üntoxle chu opang Judah khünak ang achangle hüiüihex, hwom hanpakma, Mordekai-e adangle fakya hanpak nyix anyi ija a chizakle hu angkya changle.

²⁸Judah nok pangnu kako-homkha towüi, füichi naolie tsün-tsün to, pangnu angkya wangtsak ting to tamchu tingnu pangkha towüi ija Purim nyix a texle atak angkya wüi changle.

²⁹Ifüima Abihail sacha, wangcha Estar-e Mordekai füi tomle laiza chuwüi tuita za. Ija Mordekai-e zakya laiza ma, Purim bama she chitokhange bak-khlik le apün-ada angkya zong kox.

³⁰Ija laiza a Judah khünak nok mün ma za. Laifabu a Parsia haxtok angkya wangtsak ting pangnu khato wüi afan. Ija laiza makhange Judah khünaknu ang tumüi-lomkhaole tamchu chaza angkya chemchu chitüile ngo angkya akax.

³¹Chemle hwome chisax-chilingle atsao pongma wanlom taxthai-ole twonpuix, ilailaile Purim nyix-hi-hanpak tamchu ija füikya sütlom-mwotlom ojao thaikya chitüile, hwome tamchu hwom su-sabue olom tole mok angkya bama adangle fa. Ija kaxtom a Estar hia Mordekai hokhi pangnyie fa.

³²Purim ma sax-mok angkya olombu chempang Estar-e kaxtom ningle koxpuix, ibu a laitün ma zale dan.