Read Wancho Naga Laipao 10 Bible Online

Laipao 10 - Wancho Naga bible

Laipao 10

¹Ifüima JOWANPAe Mosa ang thüi: “Paolax üntoxle wanghompa to hulax. Kue chix tamchu chix wangshembu ang mongtsak ang tomdaoa. Ile changkox tix kue hwom hama ibu ohünotün mwot mok ang tho angkya changle.

²Anaole chu ohünotün mwot makhange kue Ijip nok wanghompa ongat ang achangpuix, ija bama nange hünsu-hünsa hwom hama wün angkya hanpakma ile changpu. Ile changkox tix hünzom pangnusae wüi ku a JOWANPA changpule awanüi.”

³Ikhoma Mosa hia Arun nyi pao üntoxle wanghompa ang thüi: “JOWANPA Ibri hwom Zang-e, nang a chix tong to münpuipule chemtukux ngotho angkya lüta? Chix khünakbu chix shwom ang pao ang dankox lüta.

⁴Nange ile abaxle wüi jangngo thüiningle, chixe ngainyix wüi nang chaxwan to zazwop-kuknu ajoüi lüta.

⁵Ibu a haxtsa awangle laiüi ilaxle june chiamale toxkya sax komkaile ibue saxle awütüi; opünbu ngaxchu saxle awüt ang tomüi lüta.

⁶Ibue nang homkha awangüi, nang wangshembu hia nang khünakbu homkha bakle awangle changüi. Hünpu hünpa hwome ngünle hüidaokya khama ija amakya changüi lüta.” Ifüima Mosa a tok anongle pao.

⁷Wangshembue wanghompa ang thüi: “Ija mixsüne chemtukuxle kem ang tingtui adünle ngoüihex? Israel khünakbu a hwom Zang to naxshwomlax ang pao ang dankox. Ijip chaxwan tha huanuma amadaoale nang müntik hia?”

⁸Ikhoma Mosa hia Arun nyi wanghompa hato tamchatle sele chat, ilaxle wanghompa-e hokhi ang thüi: “JOWANPA hünzom Zang to shwom ang hünzom pao ang tsuaküi. Ikoxlechu otsingtomtata ma opang paoüi?”

⁹Mosa-e lan: “Kwom pangwüi paoüi; süshix-naosa, zunu-zupa pangwüi. Kwome kwom naosombu pangwüi, kwom chun hia zwonbu ilaxle maihubu pangwüi koplaxle achex angkya changle. Ile kwome JOWANPA achuakle pangpwon angkya chang koxle.”

¹⁰Wanghompa-e thüi: “Kue JOWANPA mün ma tsaopu, kue hünzom ang naosombu hia shekobu pangwüi pao ang müntomüi! Hünzom a kwom zan to ka angle atsingkya kwome awandaoa.

¹¹Hünzom paose tomta jangtsu, lükaka paolax ilaxle JOWANPA to shwomlax.” Ibibi kax füi sa ilaxle Mosa hia Arun nyi wanghompa tuntho angkya jwonle apao.

¹²Ifüima JOWANPAe Mosa ang thüi: “Ijip haxtok hato zazwop-kuknu alai ang nange nang chak ding to nwonkox. Ibu nguilaxle nyemle ngokyabu tamchu june chiamale toxkyabu pangwüi saxle awütüi.”

¹³Ikhoma Mosa-e chix kiathox ajong ilaxle ija nyix JOWANPAe nyixtungtale ilaxle ija wün wüntungtale Ijip nok haxtok ma handünchi zangwine jep ang tom. Ngainop ningle ija zangwine jeple zazwop kuknubu apüile bang.

¹⁴Ibu othom-othom ma nguilaxle Ijip haxtok pangnu khato ngo ang süt. Ngündaokya khakha ma zazwop kuknu chaoxkya ija ma akhokya changle ilaxle iningle huanuma chaoxkya chatle tamngün toxüi münchang.

¹⁵Chaxwan thün to naktukle hwom-hwome wüi chwop; june chiamale toxkyakya komle hwome sax; pünziak-laimo to lünle sax. Ijip haxtok pangkha towüi pün hia fum ma hingkya oli chemchu chitox.

¹⁶Ifüima wanghompa-e Mosa hia Arun nyi nonokhaile sele apüi ilaxle hokhi ang thüi: “Kue JOWANPA hünzom Zang zongto tamchu hünzom zongtochu achaxle changdaoa.

¹⁷Athaxpi ija ku ochax thailak tüihüi ilaxle JOWANPA hünzom Zang to iningkya ozik-omüt sikngün ku angkya shong-paofale jopkox.”

¹⁸Wanghompa ha angkya paolaxle Mosa-e JOWANPA to jop.

¹⁹Ilaxle JOWANPAe handünchi zangwin chongkya hannopchi zangwin ang alüix; ijae zazwop kuknubu tsuile Tütsak-tinu zongto jeple awüt. Ijip haxtok ma kuknu tuita chitox.

²⁰Ikoxlechu JOWANPAe wanghompa mongtsak ang tom, ilaxle chixe Israel khünakbu pao ang chidan.

²¹JOWANPAe Mosa ang thüi: “Nang chak zangkho chito nwonkox ija füi tomle Ijip haxtok ma zimle haxshix-zangnakkya tüiüi.”

²²Mosa-e chix chak zangkho chito ajong ifüi tomle Ijip nok haxtok ma nyix azom tüle haxshix-zangnak.

²³Ijip noke tata ngün ang chitho, ilaxle owaechu ipongma mahom toxlaxle chipao. Ikoxle Israel nok ngwotnui to a zangngai tüikya.

²⁴Wanghompa-e Mosa selaxle thüi: “Hünzom paolax ilaxle JOWANPA to shwomlax; hünzome naosombu hia shekobu chuwüi paolax. Ikoxlechu hünzom chun, zwon hia maihubu ito wüi naxngokox.”

²⁵Mosa-e lan: “Ile jangchangba nange kwom ang JOWANPA to shwomle changpongma tö koxkya ma lax ang kwom ang müi okhonguile kox angkya changle.

²⁶Ile chichang thüiningle kwome kwom müibu komle laxlaxtox angkya wüi changle, tomtuita ngaxchu danle müntox. Chemningkya füi JOWANPA kwom Zang ang tö koxle shwom angkya hex, ija hanpakma müi a kwom jaoe zün angkya oli changpu. Ikhoma onui alople machang tanto chemningkya müi füi chix to shwom-tole chang angkya hex kwome münawantsuak.”

²⁷JOWANPAe wanghompa ang mongtsak ang tom, ikhoma chixe hwom pao ang chidan.

²⁸Chixe Mosa ang thüi: “Ku miksho angkya nang paoün! Tamchatle ku hato nangsün taxaho! Chatle kue nang ngün ang jangkop, ija nyix nang mik maxpu!”

²⁹Mosa-e lan: “Nang kax changle; nange ku tamchatle münngüntoxüi.”