Read Wancho Naga Laipao 11 Bible Online

Laipao 11 - Wancho Naga bible

Laipao 11

¹Ifüima JOWANPAe Mosa ang thüi: “Athax kue Ijip nok wanghom hia chix khünakbu hato thama oli tuita wüi ahüiüi. Ifüima chixe hünzom pao ang danüi. Otsingtomtata ma chixe ikha angkya hünzom jwonle jao apaoüi.

²Athaxpi ma tomzizi hato nguilaxle hun hia khop likwünbu ju angkya Israel khünaknu hama kax koxlax.”

³JOWANPAe Ijip nok ang Israel nok to chingcha ang tom. Otsingtsingma wangshembu hia khünaknu pangnusae wüi Mosa a tuita chongkya mix changle le-e.

⁴Mosa-e wanghompa ang thüi: “JOWANPAe thüile, ‘Aja zangnak tsüdang khae Ijip nok haxtok pangwüi to ahamüi.

⁵Ijip nok pangnu homkha towüi pongwang ma puxkya naosom pangwüi zi ang tomüi. Wanghom sasün, owae hopa mantswonle changsehex, chix makhange owang wanglaxle saxthu ngokya danucha sasün to lünle zi ang tomüi. Ijaningle pongwang ma apuxpux tsom-pom chuwüi bakle zi ang tomüi.

⁶Ipongma Ijip haxtok pangkha towüi mang sople akhongkya tüiüi. Ininglükya otuechu mangünkya tamchu chatle ngün ang kopüile chu münchang.

⁷Ikoxle Israel nok hia hwom tsom-pom to hie ngaxchu müntwomüi. Izuma JOWANPA kue Ijip nok hia Israel nok a mali-mali changle le ahokya hünzome awan ang kopüi.’”

⁸Mosa-e ile akaxle ashuk: “Nang nguakhobu pangwüi ku hato nguile ku tong shwomle, ku ang Israel khünakbu laxlax süpaofale akaxüi. Ifüimatix ku pao ang laiüi.” Ilaxle mongtsik ahole Mosa wanghompa tuntho angkya laile pao.

⁹JOWANPAe Mosa ang thüi: “Kue Ijip haxtok ma chatle chu ohünotün mwot mok ang kopkya kuxmale wanghompa-e nang kax to ojao na münthaüi.”

¹⁰Mosa hia Arun nyie ibibi ohünotün mwot wanghompa tunthoma mokle aho; ikoxlechu JOWANPAe chix ang mongtsak ang tom ilaxle chixe Israel nokbu Ijip chaxwan angkya laile pao ang chidan.