Read Wancho Naga Laipao 12 Bible Online

Laipao 12 - Wancho Naga bible

Laipao 12

¹Ijip chaxwan ma JOWANPAe Mosa hia Arun nyi füi zangwünle thüi:

²“Ija lyet a hünzom hanpak ma zanglao ma pongwang lükya lyetnu changüi.

³Israel khünaknu ang ija zangwün adang fakox: Ija lyetnu nyixbün lükya to khünak pangnusae wüi ma kakoko to chun hosa chichangba zwon hosa tuipong zünle kop angkya changle.

⁴Owawa kako to khünak muale wüi changkyabue ija müi tomzi füi azule langlax ilaxle khünak huak to müithom daole ahan saxlax.

⁵Hünzome chun hia zwon nyi tütapu lang ang tsuak, ikoxlechu ija a zanglao tuita nguilankya tamchu ofwot chemchu chitüikya chang angkya oli.

⁶Ifüima ija lyetnu nyixbün ali lükya hansong ma Israel khünak noknusae müi langüi.

⁷Ikha angkya aji hidaopong lax üntoxle khünakbue ma kapoxpox to tamchu owa homkha ma ija müi langle saxpuix, hwom homkha kahak kho ma ija aji füi lyetkox.

⁸Eja ja hwome müi songle atsan ilaxle khaxkhaxkya suihing-laihing hia twonkhax chiawonkya an füi ija müi sax angkya changle.

⁹Ija müi a azang ma tamchu lumlaxle chisaxüi. Okhang, ocha hia ochak, oche hia okhax, ibu pangwüi songle atsanlaxle saxüi.

¹⁰Hünzome ngainop ningkya thoma ota chemchu chitoxüi. Chisax tsuakkya ota jangtüi thüiningle ija a zokle ashunüi.

¹¹Hünzome ija müi nonokhaile sax angkya changpu, chemthüikoxle hünzome achexüima zapua lax angkya changle. Nange cha ma chisox sox angkya ilaxle chak ma kiathox twon angkya changle. Ija a JOWAN, ku achuak-achenkya Kaitox Pangpwon changle.

¹²“Ija ja ku Ijip haxtok pangnu khato ahamüi; ilaxle müikha angkyachu üntoxle khünakchu, tüichongsasa komle langle toxüi. Ile JOWANPA kue Ijip nok zanpabu ang sikngün koxle leüi.

¹³Kapox ma ajie lyetle tüikya a hünzom ngokya homkha changpu lükya münwan ang changüi. Kue aji ngünkya zuma ijakha kaile leüi. Ile kue Ijip nok to sikngün ang tomkoxle chu hünzom to chemchu münthüi.

¹⁴Hünzome ija nyix a zanglom pangpwon tuita hanpak ang laxle, JOWANPA kue hünzom to chemle chingcha daopuix, ija texle atak angkya hanpakma zangpua to puashole nuilax. Athax füichi machu ija hanpak chiamütle twonle ngolax.”

¹⁵JOWANPAe thüi: “Nyix anüt mong ma hünzome twonkhax awonkya an chisax angkya changle ikoxle twonkhax chiawonkya an tata saxüi. Owang nyix tokhange wüi hünzom ma homkha ma tüikya twonkhax füi atsai angkya changle; chemthüikoxle nyix anüt mong ma owawae twonkhax awonkya an saxle jangchang, kue chix a ku khünak tuita ang münlaxüi.

¹⁶Pangpwon asüi nyix hia wünzua nyix hünzom a zangshwom ang asox angkya changle. Ija nyix anyi mong ma hünzome sax angkya süt mokkya boma mama mwot-kat chemchu münmok angkya changle.

¹⁷Ija pangpwon thomlax, chemthüikoxle ija nyixkha kue hünzom Ijip nok chak tokya alaikya changpu, ikhoma athax füichima ija nyix a pangpwon hanpak tuita changpule mokle nuilax.

¹⁸Pongwang angkya lyetnu ma nyixbün ali lükya hansong makhange nyixtsa-büta lükya hansong alople, hünzome twonkhax awonle zingkya an chemchu münsax angkya changpu.

¹⁹Nyix anüt mong ma hünzom opupu homkha tochu twonkhax chibang angkya oli changle; chemthüikoxle owawae, ikhato puxkya mixwüi changlax chichangba mixnok chaxwan to puxkya mixwüi changlax, twonkhax awonkya an saxle jangchang thüiningle, chix a ku khünak kha angkya kiakle awütüi.”

²⁰

²¹Mosa-e Israel nok tüichong mixmüibu pangnusa se ilaxle akax: “Hünzom pangnusae wüi chun hosa chichangba zwonsa tuipong zünlaxle ija lang angkya changle; ija a hünzom homkhae Kaitox Pangpwon puasho angkya hanpakma.

²²Haisop fummua tuita laxlax, ija a müi aji tüikya tik ma somlax, ilaxle ija füi aji a kapox ma chichangba kahak-kho ma lyetlax. Zang mangai tanto hünzom owachu homtho to taxlai.

²³Chemtue JOWANPA Ijip haxtok akaile, Ijip khünakbu langle leüihex, chixe aji füikya kahak hia kapox ngünle laxüi; ijama chixe mix langle lekya kaxtaimix hünzom hom to nople hünzom lang ang müntomüi.

²⁴Hünzome tamchu hünzom naosombue ija wanlom a jento thom angkya oli changüi.

²⁵Chemtue hünzome JOWANPAe hünzom ang koxüile tsaokya chaxwan to nguile changüihex, ipongma hünzome ija otsao zom ang zing angkya wüi changle.

²⁶Chemtue hünzom su-sa hwome ‘Ija zomzing a chem hanpak?’, le atüikya zuma,

²⁷hünzome lanüi: ‘Ija a JOWANPA achuakle Kaitox Pangpwon tö koxkya changpu; chemthüikoxle Ijip haxtok to chixe Israel khünakbu homkho akaile lelaxle Ijip khünakbu lang ikoxle Israel khünakbu a panle toxpu.’” Israel khünakbu akhuxlaxle chix to shwom.

²⁸Ifüima Mosa hia Arun nyi füi JOWANPAe akaxkya ningle hwome mok.

²⁹Zangnak tsüdangkha-e JOWANPAe Ijip nok tüichongsasa komle lang; chongwang mantswon angkya wanghom sasün makhange kun to shole thomkyabu sasün hwom to lünle langle awüt. Tsom-pombu ngaxchu wüi owang ma puxkyakya komle lang.

³⁰Ija ja kha wanghompa, chix wangshembu tamchu Ijip nok pangwüi jip ate. Ijip nok pangnu homkha towüi sopkya ozinge awangle chang; chemthüikoxle naosom chilangkya homkha tuita ngaxchu danle chitox.

³¹Ija zangnaknak ma wüi wanghompa-e Mosa hia Arun nyi nyakle apüi ilaxle thüi: “Hünzom Israel nok pangwüi paoün! Hünzome ku chaxwan dantox dao. Hünzome lomkya ningle JOWANPA hünzom Zang to shwom ang paolax.

³²Hünzom chun, zwon tamchu maihubu pangwüi koplaxle achexün. Ilaxle ku to chingchakya tüikox-ole zangjop kox.”

³³Ijip nokbue Israel nokbu ang nonokhaile hwom chaxwan dantoxlaxle pao angkya atsang. Hwome thüi: “Hünzom chipao thüikoxle kwom pangwüi ziüi changa.”

³⁴Ikhoma Israel khünakbue twonkhax chiawonkya an ohing nyi ma aküt ilaxle hwom tik-lak ma sholaxle suakto ma paile pao.

³⁵Mosa-e apuakya ningle Israel khünakbue, Ijip nok tomzibu hato paolaxle hun hia khop, ibu füi zingkya likwün hia nyizabu jule lax.

³⁶JOWANPAe Ijip nokbu ang Israel nok to achuak-achenle chang ang tom ilaxle hwome jukyakya pangwüi koxle apao. Ija ningle Israel khünakbue Ijip nok angkya tuiza-nakom pangwüi tsuile pao.

³⁷Rameses makhange Sukkoth kople Israel nokbu cha ma pao. Naosombu hia sheko-mixnubu chixe homtoxle ikhama tüikya khünak huak hajat ho-azok tukux jao tüikya.

³⁸Hwom füi tomle mixnok khünakbu, hwom tsom-pom, chun, zwon hia maihubu komkaile hwome pao.

³⁹Ijip nok tokya hwome kopkya an hinghobu akhaole atsan. Hwom Ijip nok tokya allele jwonle apaokya chang koxle sütling hia anbu zingle achwon angkya chakba chikop.

⁴⁰Israel khünaknu Ijip nok to zanglao 430 ngole hüi.

⁴¹Zanglao 430 ashukkya nyixkha JOWANPA likan khünak pangnu wüi Ijip nok dantoxlaxle achexle pao.

⁴²Ija ja a JOWANPAe hwom Ijip nok tokya alaile apüi ang hule ngokya ja changkya. Ija nyix-hi-hanpak a Jento JOWANPA hanpak ang atsaole dan ilaxle Israel khünakbue zangpua to ija nyix hüi angkya to hule tan.

⁴³JOWANPAe Mosa hia Arun nyi ang thüi: “Ijabu a Kaitox Pangpwon hanpak ang wanlom tankyabu changle: Mixnok owaechu ija Kaitox Pangpwon fong chisaxüi,

⁴⁴ikoxle hünzome shakle kopkya da owawae pongwang ma Khwonzüt-Zom zingle jangchang, chixe ija sax ang tsuak.

⁴⁵Onox ma ngokya hia hingchak mokle ngokyabu owaechu ija süt sax ang müntsuak.

⁴⁶Ija fong a owa hom ma moktakle achwon-athapuix, ija homkha ma komkaile saxüi. Ija a loxkaxza alaile chipaoüi ilaxle müiza tuita chu texle akhixle chichangüi.

⁴⁷Israel pangnusae wüi ija pangpwon a puashole nui angkya oli.

⁴⁸Ikoxlechu Khwonzüt-Zom makaikya owaechu chisaxüi. Mixnok wünpa owawa hünzom khato ngo üntoxle JOWANPA achuakle ija Kaitox Pangpwon fongsaxse jangtsu, pongwang ma nange hwom homkha angkya lükaka ang bakle Khwonzüt-Zom zingle koxkop angkya oli changle. Ile jangchangdaoba chix a tuita Israel nok nokpu ang laxtsuaküi. Ija khünak a fongsüt ma wom ang tsuak.

⁴⁹Israel khünakbu hia hünzom khato ngole tüikya mixnokbu pangnu hanpakma wanlom ija a tuitata wüi changüi.”

⁵⁰Israel khünak pangnu ija kax ma lax. JOWANPAe Mosa hia Arun nyi ang kaxtom koxkya lailaile hwom mok.

⁵¹Ija nyixkha JOWANPAe Israel khünaknu Ijip nok tokya alaile pao.