Read Wancho Naga Laipao 14 Bible Online

Laipao 14 - Wancho Naga bible

Laipao 14

¹Ifüima JOWANPAe Mosa ang thüi:

²“Israel khünakbu füi, tamchatlaxle Pi Hahiroth tunthoma, Migdol hia Tütsak-tinu nyi zo ma, Bal Zefon zui ma pom zaile athong angkya akaxkox.

³Israel khünakbu a faolom to samle aham ngolaxle sak-hax alop-hax khakha ma tüiangpu, le wanghompa mongto ajangle laxüi.

⁴Kue chix ang mongtsak ang tomüi ilaxle chixe hünzom to achuaüi, ilaxle kue wanghompa hia chix süpahibu to anaole changkya zuma ku achuaküi. Ijama Ijip nokbue ku a JOWANPA changpule awan ang kopüi.” Israel khünaknue hwom füi akaxkya ningle mok.

⁵Chemtue Ijip nok wanghompa hama Israel khünaknu paole azangkya kax koxpuix, chix tamchu chix wangshembue hwom mong alüix ilaxle thüi: “Keme chem hwonpu? Keme Israel khünakbu paole azang ang tomlaxle kemepi kem dabu asamdaoa!”

⁶Wanghompa-e chix zankat man-kanlin hia chix süpahibu achwon.

⁷Chixe zünlaxle man-kanlin 600 ilaxle Ijip nok man-kanlin pangwüi, ibu zop angkya khünakbu laxlaxle pao.

⁸JOWANPAe Ijip nok wanghompa Farao mong tsak ang tom, ilaxle sungdün-ngadong Israel khünakbu achuale zik.

⁹Ijip nok süpahibu man füi, man-kanlin hia ibu zopmixbu füi, Israel khünaknu achuale zikkya, ibue Tütsak-tinu kax ma Bal Zefon zui angkya Pi Hahiroth ma pomzaile athong ngoponge alop.

¹⁰Ijip nok wanghompa hia chix süpahibue hwom achuale hüingokya chemtue Israel khünaknue ngünle laxpuix, hwom tüle za ilaxle hwom khosün angkya hanpakma JOWANPA nyakle akhong.

¹¹Hwome Mosa ang thüi: “Ijip nok to kwom ang zukting müntüi dai hia? Nange kwom ija sak-hax to azik ang alaile paokya hia? Hulax, nange kwom Ijip nok chak tokya alaile paolaxle chem hwonkya hex?

¹²Kwome nang füi: kwom mo taxwün-ngo, kwompi ikhato Ijip nok da ang wüi ngoüihexle münthüidaimi? Ija sak-hax to zikya füi ikhato da ang ngonuikya wüi kwom zongto müikya ang changse!”

¹³Mosa-e lan: “Hünzom ojao taxza! Hünzom mongchongle ajonglax ilaxle hünzom khosün ang JOWANPAe chemle mokpuix ngün ang kopüi. Hünzome Ijip nok ibu tamchatle ngün ang kopüi münchang.

¹⁴Hünzom hanpakma JOWANPA, chix azan lax angpu. Hünzome mok angkya oli chemchu müntüi.”

¹⁵JOWANPAe Mosa ang thüi: “Nange fonghüile chemthüikoxle akhongpu? Khünaknu ang zakle chingole achex angkya kax laxkox.

¹⁶Nang kiathox dingchi to ahakox ilaxle nang chak tinu ding to thüikox. Tinu anyi ang ahanüi ilaxle Israel khünaknu a haxzan to tinu mong akaile le ang thoüi.

¹⁷Kue Ijip nok mong tsakle chang ang tomüi ilaxle hwome ibu mantole azuiüi. Wanghompa hia chix süpahibu, chix man-kanlin hia ibu zopkya khünakbu, ibu pangnu to anaokya tokhange kue achuak-achenkya kopüi.

¹⁸Chemtue kue hwom to lütüihex, Ijip noke ku a JOWANPA changle le awan ang kopüi.”

¹⁹JOWANPA kaxtaimix, owa Israel süpahibu tunthoma tüikya hex, ikha angkya achexle hwom tokfüi chito chat.

²⁰Thong lailaikya zangfwom chuwüi Israel nok hia Ijip nok nyi tantiwa ma atsyenle machang machangle füichi to chat. Ija zangfwome tukle Ijip nok hato zangnak ang tom, ikoxle Israel hato wünzung kox. Ikhoma süpahibu wünta tungle tata füi asao ang chikop.

²¹Mosa-e tinu ding to chix chak thüi. Ifüima JOWANPAe handünchi winjep ang tinu jeple achat ang tom. Ija winjepe wüntungtale tüle zongle jep ilaxle tinu mongto haxkozan alai, ile tinu anyi ang achangle ahan.

²²Israel khünakbu tinu atatle ija haxkozan makhange le. Hwom tale lepongma tinu a pangnyi chima katuk lailaile tüikya.

²³Ijip nokbu chuwüi hwom achuale, man-kanlin hia ibu zopmixbu füi tinu mongto ju.

²⁴Anopningle swomsa ma JOWANPAe thong lailaikya zangfwom hia wün makhange hwom to hu. Ija a abütle Ijip nok süpahibu ang chabüt-lasün ang tom.

²⁵Chixe hwom man-kanlin ochabu man ang tom. Ile hwom a sikngün ashukle mik max ang tom. Ijip noke thüi: “JOWANPA a Israel nok chikao ma selaxle kem füi azankya changa. Kem ikha angkya paohax!”

²⁶JOWANPAe Mosa ang thüi: “Tinu ding to nang chak thüikox. Nange chak thuikya füi tomle Ijip nok hia hwom man-kanlin zopmixbu hato ti chatüi.”

²⁷Ikhoma Mosa-e tinu ding to chix chak thüi: ilaxle zangngai füi tomle tinu amipongkya ningle tuita ang achangle ajit. Ikha angkya manbu tinu chak tokya paole azang ang azong ikoxlechu JOWANPAe hwom a tinu khato wüi tswonle awüt.

²⁸Tinu tamchatle apongle jenkyae man-kanlinbu tamchu ibu zopmixbu hia Ijip nok süpahibu, tinu mongto Israel nok achuale zikkya pangnusa to tie ule hüikyae hwom tuita ngaxchu azang ang chikop.

²⁹Ikoxlechu Israel khünakbu a tinu tale haxzan to ahamle le. Hwom ta pongma tinu a pangnyi chima katuk lailaile tüikya.

³⁰Ija nyix JOWANPAe Israel khünakbu Ijip nok chak tokya azün. Ofüima Israel khünakbue ibu mang tinukax to ngünle lax.

³¹Chemtue JOWANPAe Ijip nok to lüt ang chix tsak-zong chongkya ahokya Israel noke ngünle laxpuix, hwom a JOWANPA thuaza. Hwome JOWANPA hia chix dapa Mosa hokhi to mongong.