Read Wancho Naga Laipao 15 Bible Online

Laipao 15 - Wancho Naga bible

Laipao 15

¹Ijama Mosa hia Israel khünakbue ija tsai ngaole JOWANPA achuak: “Kue JOWANPA achuak-achenpu, chixe fuazangle lütkya khoma; Chixe man hia ibu ahamkyabu pangwüi tinu mongto awüt.

²JOWANPA a kutsak-kuzong tamchu ku kho-awapa; Ku khosünle kopkya a chix changpu. Chix a ku Zang, kue chix achuaküi, ku apa Zang, kue chix chongkya achuakle tsai ngaoüi.

³JOWANPA, chix a naomüi changpu; JOWANPA a chix mün changpu.

⁴“Ijip nok süpahibu tamchu man-kanlinbu chixe tinu khato tswonle awüt; hwom wangshem sümüikyabu Tütsak-tinu ma amütdaoa.

⁵Tüle zukya tinue hwom to chwop; long dütpupule hwom a jithong to düt.

⁶“JOWANPA tsaxchi chak angkya tsak-zong huanu; ijae zanpabu akhixle awüt.

⁷Chongwangpa tsak-zong füi nang zanpabu to lüt; wünle ningle laikya nang mongtsike tsaxsa ningle ibu zokle ashun.

⁸Nange tinu tok to zak füi müt ilaxle tinu tüle tsuale athünle dong ang tom; ija a katuk lailaile tsuathale ajong; ilaxle tinu azukya kha a haxkozan ang achang.

⁹Zanpabue thüi: ‘Kue hwom to achuaüi ilaxle kopüi; kue hwom tuina ahanüi ilaxle ku mong ma atsutsu laxüi; Kue ku changlo danüi ilaxle hwom ma atüitüi komle laxüi.’

¹⁰Ikoxlechu nang zakmüt tamfang ma, JOWANPA, Ijip nokbu a ti to max; za-adünkya tinu mongto hwom jandwon lailaile ti thong to düt.

¹¹“JOWANPA, baozangbu khama nang lailaikya owa tüi? Otsao ma ohünotün nang lailaikya owa tüi? Nange mokkya ningle ohünotün hia khomtsikya mwotbu a owae moktho?

¹²Nange nang tsaxchi chak thui, ilaxle chaxwannue nang zanpabu jok.

¹³Nang tsaotsüt lailaile, nange paole azünkya khünaknu lom azüi; nangtsak-nangzong makhange nang otsao chaxwan to hwom lomzun.

¹⁴Jat-libue atat ilaxle khünaknu nang thua zale abün; Filistia nokbu a khom-atsikle singlaxle kop.

¹⁵Edom nok lompabu abüt ang tom; Moab mixtsak naomüibu abün; ilaxle Kanan nok ang mong chichongtsuak.

¹⁶Zakya hia khomtsikya hwom hato hüi. Hwome nang tsak-zong ngünle, O JOWANPA, da ang ngokyabu nange danle khangkho angaikya, nang khünaknue toknople machang-machangle, hwom tüle zangale ajong.

¹⁷Nange hwom apüi ilaxle nang haxnu ma küi; JOWANPA, nange nang hom ang zünle kopkya haxmik ma, nang jaoe zingkya Zangshwom-Hom tüikya khama.

¹⁸JOWANPA, nang a othuithuima wanghompa ang ngoüi.”

¹⁹Israel nok a haxza tok to ahamle tinu ata. Ikoxlechu chemtue Ijip nok manbu hia man-kanlinbu ija tinu mongto nguipuix, JOWANPAe tinu chat ang tom ilaxle ijae hwom to alum.

²⁰Ajenu Miriam, Arun nanao; she-e khopsya koplaxle azüi ilaxle shekobu pangnue she mantole khopsyabu akhaole azüi.

²¹Miriam-e hwom hanpakma tsai ngao: “JOWANPA achuakle tsai ngaokox, chemthüikoxle chixe fuazangle lütdaoa; chixe manbu hia ima ngakyabu tinu mongto tswonle awütdaoa.”

²²Ifüima Mosa-e Israel khünaknu Tütsak-tinu angkya sak-hax Shur alople zunle pao. Nyix-azom hwom sak-hax akaile aham, ikoxlechu ti chiatak.

²³Ifüima hwom Marah le nyakkya khato ngui, ikoxlechu ikhatokya ti tüle khaxkya khoma hwome chiling tsuak. Ile changkya khoma ikha ang Marah le nyak.

²⁴Khünaknue Mosa ang kaxthup-ngaotünle atüi: “Kwome ti ang chem linglaxüi?”

²⁵Mosa-e chingcha jule JOWANPA to zangjop. Ifüima JOWANPAe chix hato pün tuita aho. Ija pün chixe ti to awüt, ifüima ti a ling ang müile achang. Ikhato JOWANPAe hwom ang hwom ngo angkya wanlombu kox. Ibu wanlombu makhange JOWANPAe hwom to thwontsingle ano.

²⁶Chixe thüi: “Hünzome kue sule le athüithüi mok tamchu ku kaxtombu thomle kax ma laxle tüiüi jangthüi: kue Ijip nokbu hato lai ang tomkya kak-lak tüta ningkyaechu hünzom to sikngün fa ang müntom. Ku a JOWANPA, hünzom kaklak pangwüi amaüile fakya Zang changpu.”

²⁷Ofüinyix hwom Elim to ngui; ikhato shuasa 12 tamchu pam pün 70 nyemle tüikya. Ija ti zui ma hwome pom zaile athong.