Read Wancho Naga Laipao 16 Bible Online

Laipao 16 - Wancho Naga bible

Laipao 16

¹Israel khünaknu pangwüi Elim makhange achexle pao, ilaxle hwome Ijip nok toxkya füima lyetjang anyi nyixbün aga lükya to, hwom a Sin sak-hax to ngui; ija a Elim hia Sinai nyi zo ma tüikya.

²Ija sak-hax to hwom pangnusae Mosa hia Arun nyi to kaxthup-ngaotünle chang.

³Hwome hokhi ang thüi: “JOWANPAe kwom a Ijip nok towüi lang koxle müise texpu. Ekhato kwome müichu tamchu mama sütling pangwüi thung laxle müile sax ang koppu. Ikoxle nange kwom ija sak-hax ozan to woknuak ma zi ang apüikya changa.”

⁴JOWANPAe Mosa ang thüi: “Athax kue hünzom pangnu hanpak ang süt zangwat ningle ding to khange düt ang tomüi. Khünaknue paolaxle nyixfole ija nyix saxtangtangle tswonle athünüi. Ija ningle hwome ku kaxtombu kax ma laxle changcha ang wanle anoüi.

⁵Nyix azok lükya to hwome nyixfokya to tswonkya füi othom anyie nüile tswonlaxle moktak angkya changle.”

⁶Idaile Mosa hia Arun nyie Israel khünak pangnusa ang thüi: “Hünzom Ijip nok tokya alaile paokya a JOWANPA changpule aja hünzome awanüi.

⁷Ngainop JOWANPA nguile tüikya münwan ang hünzome zangchang ajepkya ngün ang kopüi. Hünzome ku to kaxthup-ngaotünle ngokya chixe atatle laxdaoa: changle, ija a chix zongto chichangle tüikya changle, chemthüikoxle kwome chix kaxtom kax ma laxle mokwüi.”

⁸Ifüima Mosa-e thüi: “JOWANPAe aja hansonge hünzom ang müisax ang koxüi ilaxle ngainop a hünzome chemtukux saxüihexle an koxüi; chemthüikoxle hünzome chix to chemtukux kaxthup-ngaotünle changpuix, chixe atatdaoa. Chemtue hünzome kwom to kaxthup-ngaotünle changpuix, ija a hünzome JOWANPA to kaxthup-ngaotünkya changpu.”

⁹Mosa-e Arun ang thüi: “Khünaknu pangwüi nguilaxle JOWANPA tunthoma ajong angkya kax laxkox, chemthüikoxle chixe hwom kaxthup-ngaotün atatle laxdaoa.”

¹⁰Arun-e khünaknu ang kax koxkya füi tomle hwom sak-hax chito pao. Ikhato allele zangfwom ma JOWANPA zangchangjep lai.

¹¹JOWANPAe Mosa ang thüi:

¹²“Kue Israel khünaknu kaxthup-ngaotün atatle laxdaoa. Lyetfa to hwome sax angkya müi ataküita le thüikox: ilaxle anopningle, woktex ma sax ang, hwome an ataküi. Ifüima hwome ku JOWANPA, hwom Zang changpule awan ang kopüi.”

¹³Hansonge tüle chongkya songsik osa zyem pile ngui; osa ibue hwom pom tojao ule chang. Ilaxle zangngai thoma hwom pom akhople nyenti dütle bang.

¹⁴Chemtue nyenti zuale paopuix, ipongma sak thün to awangle, paklongle okhao-okhao ma tütali bang. Ibu a nyenti dwonbu ningle tüikya.

¹⁵Chemtue Israel khünakbue ija ngünpuix, hwome chem hex chiawan laxle “Ija chemli hex?”, le tata ma atüi. Mosa-e hwom ang thüi: “Ija aJOWANPAe hünzom ang koxkya süt changle.

¹⁶Hünzom pangnusae wüi mae laxtangtangle mixhuak to khop anyi pong tswonle athün angkya JOWANPAe akaxdaoa.”

¹⁷Israel khünakbu ile tswon. Züizüie onüi tswon ikoxle züizüie hixle tswon.

¹⁸Chemtue hwome ija thütle changpuix, aluile tswonkyabu angchu onüi nuipule chichang ilaxle hidaole wüi tswonkyabu angchu chinguile nuipu lechu chichang. Pangnusae wüi mae laxtangtangle tswonle kop.

¹⁹Mosa-e hwom ang thüi: “Ija a owaechu ngainyixkya hanpak ang chithomüi.”

²⁰Ikoxlechu züizüie Mosa kax ma chilax ilaxle ahanle tüi. Ngainop ningle hukoxle ija shanle tüle nomle chongsa awangle bang. Ibu füi Mosa ang mongtsik.

²¹Nopfo to noke mae saxtangtangle tswonle athün. Chemtue zanghan tsakle khampuix, hax ma danle toxkya pangwüi chule pao.

²²Nyix azok lükya to hwome jao angkya to othom anyi ponge nüile athün, mixhuak to khop ali pong süt. Hwom kha angkya lompabu pangwüi nguilaxle ija bama Mosa hama wün,

²³ilaxle chixe hwom ang thüi: “JOWANPAe akaxdaoa, ngainyix a nazakle tamchu atsaole nui angkya din changpu. Hünzome chempang moktakse, lumse-songse hex, ma mong ma atsutsu komle song-kha koplax. Chemtukux atapuix ibibi a ngainyixkya hanpak ang süile koplax.”

²⁴Mosa-e kaxtom koxkya ningle hwome atakyakya ngainyixkya hanpak ang süile kop. Ija a nyale chima tamchu chonglangchu chiwangle otyatyale bang.

²⁵Mosa-e thüi: “Ija anyix saxlax, chemthüikoxle anyix a JOWANPA hanpak ang atsaole nuikya Sabath nyix changle; hünzome pom tatok to süt chemchu münataküi.

²⁶Hünzome nyix azok bama süt tswonüi ikoxle nyix anüt, nazakle nuikya nyix chemchu münbangüi.”

²⁷Nyix anüt lükya to khünak züizüi süt tswonle athün ang pao, ikoxle hwom thoma chemchu chibang.

²⁸Ifüima JOWANPAe Mosa ang thüi: “Hünzom khünakbue ku kaxtom ma münlaxpule otukux tomtata angamüi?

²⁹Hulax! JOWANPA hünzom ang Sabath nyix koxdaoa, idaile nyix azok lükya to chixe süt nyix anyi hanpak ang koxle; hünzom pangwüi ma ngwotnuinui to ngolax. Nyix anüt lükya to owachu ojongtochu taxpao.”

³⁰Ikhoma khünaknu a nyix anüt lükya to nazakle nui.

³¹Israel noke ija ang Mana le nyak; ija a thothole otsangsa lailaile, saxkya zongma nax-ti awutle zingkya an lailaile tijongle tüikya.

³²Mosa-e thüi: “JOWANPAe akaxle, ‘Kue hünzom Ijip nok tokya laile pao ang tompongma faokha to oja süt füi kue hünzom tuxpuix, ija süt tsüntsün to hwome naxngünlax ang, wongpe tuita ma awangle füinao thoma bang kox.’”

³³Ilaxle Mosa-e Arun ang thüi: “Tikkux tuita laxlax, ija ma mana Homar tuita shokox ilaxle ija JOWANPA tunthoma, tsüntsün to naxnui lax ang dankox.”

³⁴JOWANPAe Mosa füi akaxkya ningle Arun-e ija Tsaotsüt Suak tunthoma chimax-chisam angkya hanpakma dan.

³⁵Israel khünaknue mama zangpua 40 sax. Ija a hwome tingkop-haxzingle ating-anok angkya haxtok ha ma-alop ma-alople, thüikoxle Kanan haxtok longzi alople machang tanto saxle ngo.

³⁶(Ozan thütkya noknu thathop a ifah ma laxle).