Read Wancho Naga Laipao 17 Bible Online

Laipao 17 - Wancho Naga bible

Laipao 17

¹Israel khünaknu pangwüi Sin sak-hax angkya achexle paole, JOWANPA kaxtom lailaile haxmik tuita makhange ata haxmik to tailaile aham. Hwom Rifidim ma pom zaile athong, ikoxlechu ikhama ling angkya ti chitüi.

²Hwome Mosa to kaxthup-ngaotünle thüi: “Kwom ang lingti laxhüi.” Mosa-e lan: “Hünzome büthüikoxle ku to kaxthup-ngaotünle ngopu? Hünzome JOWANPA to chem thwontsingle ngopu?”

³Ikoxlechu khünaknu tilane tüle maxkya khoma Mosa to kaxthup-ngaotün ngokya chizak. Hwome thüi: “Nange kwom Ijip haxtok tokya, mixnu-naosa hia tsom-pom to lünle tilan ang azik ang alaile paokya hia?”

⁴Mosa-e mong fünle koxle JOWANPA to jop: “Ibu khünakbue ku a longfüi thuple langshuküi changa; kue hwom to chemle thüiüi?”

⁵JOWANPAe Mosa ang thüi: “Nang füi tomle Israel nok lompabu züizüi koplax, ilaxle khünaknu thoto achale lelax. Nange Nail shuanu to fitkya kiathox koplax.

⁶Sinai haxnu ma longnu tuita tokma ku nang tunthoma ajongüi. Ija longnu to chietkox ijama imakhange khünaknue ling ang ti laiüi.” Israel nok lompabu tunthoma Mosa-e ile mok.

⁷Ija kha ang Massah üntoxle Meribah le nyak; chemthüikoxle JOWANPA kem füi tüile leo? le khünakbue kaxthup-ngaotünle Israel noke chix to thwontsing.

⁸Refidim ma Amalek nok hüilaxle Israel nok to sing.

⁹Mosa-e Jihusua ang thüi: “Ngainyix Amalek nok füi azan ang khünak züita zünlax.”

¹⁰Jihusua-e Mosa kaxtom ningle mok ilaxle Amalek nok füi azan ang ka. Mosa hia Arun nyi a Hur koplaxle haxnukho to dong.

¹¹Mosa-e chix chak nwonle thomkya kople Israel noke wüi lüt ikoxle chemtue chixe chak ajole changpongma a Amalek noke lüt.

¹²Chemtue Mosa ang chak nale changpuix, Arun hia Hur nyie chix thung angkya longnu tuita apüilaxle ima athung, ilaxle hokhi a chix atale ajong üntoxle chix chak nwon ang asun. Ile hokhie zanghan dütkya kople nwonle thom.

¹³Ija ningle Jihusua-e Amalek nok to komkaile lüt.

¹⁴Ifüima JOWANPAe Mosa ang thüi: “Ija zan to lüt kax zale thomlax; ija a chialak angkya pukax tuita ang naxnui. Ilaxle kue Amalek nok to komkaile lüt angkya changle le Jihusua hama apuakox.”

¹⁵Mosa-e tö-tsap tuita tanlaxle JOWANPA to shwom ilaxle ija ang “JOWANPA a ku nyiluak”, le nyak.

¹⁶Chixe thüi: “JOWANPA Nyiluak a dingkho to nwonkox! Amalek nok füi JOWANPA tsüntsün to azanle ngo angkya changle.”