Read Wancho Naga Laipao 18 Bible Online

Laipao 18 - Wancho Naga bible

Laipao 18

¹Mosa-e Ijip nok tokya Israel khünaknu alaile paokya zuma, Zang-e hwom hanpakma chempangle moklaxpuix, ibu zing Midi nok zompu-zangpa Jethro, Kosa hohochonge komkaile atatle hüi.

²Ikhoma chix Mosa füi apong ang lai. Mosa-e hom ma toxkya chix kakonu Ziporah chuwüi chix füi tomle alaile apong.

³She-e puxkya Mosa sasün Gershom hia Eliazar nyi chuwüi tüikya. (Mosa-e thüi: “Mixnok chaxwan to ku a pünpao ang ngole hüikya changle”; idaile chixe sasün tuita ang Gershom le amün.

⁴Anaole chu chixe thüi: “Ijip wanghompa-e lang ang thüikya ku apa Zang-e ku azün”; ikhoma chix sasün tuita ang Eliazar ) le amün.

⁵Mosa otsao haxnu ma pom zailaxle athongle ngopongma, Mosa kakonu hia sasün nyi laxlaxle sak-hax to Jethro laile apong.

⁶Chixe Mosa hato hwom hüile ngokya kaxho kox.

⁷Ikhoma chix füi apong ang Mosa laile hüi. Chixe hohochong chitong shwom üntoxle tun apong. Hwome müimüi ngolaxma le tata ma atüilaxle Mosa nyihom to dong.

⁸Israel khünaknu khosün ang Ijip nok hia hwom wanghompa to JOWANPAe chemle mokpuix, ibu pangwüi chixe hohochong Jethro hama wün. Hwome lomba to apongle hüikya sikngün tamchu JOWANPAe hwom khosünle hüikya pangwüi chix hama wün.

⁹Chemtue Jethro-e ibu atatpuix, chix ang tüle mongmüi.

¹⁰Chixe thüi: “Ijip nok hia hwom wanghompa chak tokya hünzom azünkya JOWANPA ang münchong fakox! JOWANPA, owae chix khünaknu da ang ngokya khosünle koplaxpuix, chix achuak kox!

¹¹Athax kue awandaoa, JOWANPA, chix a baozangbu pangnu thakma achongkya changle. Chemthüikoxle Ijip noke hwom to chisumüile hwonpongkhae chixe ma khünaknu khosünle kopdaoa.”

¹²Ifüima Jethro-e, komkaile zokle ashunkya tö hia mama töbu kox angkya apüi; ilaxle Arun hia mama lompabu shwomkya tsyen ang ija otsao fongsax ang hwom pangwüi chix füito pao.

¹³Ofüi nyix a Mosa-e khünaknu bama kaxfün fale ngokya. Chix ang swomsa makhange hansong kople ojao chak chingai.

¹⁴Chemtue Mosa-e ile mokle ngokyabu Jethro-e pangwüi ngünle laxpuix, chixe Mosa ang thüi: “Nange khünaknu hanpakma mokle ngokya ibu a chem? Swomsa makhange zangnak ma tople khünaknu ajong thomlaxle nang tatae kaxfün chemle fangopu?”

¹⁵Mosa-e lan: “Ija kue ile mok angkya wüi laile, chemthüikoxle JOWANPA mongtex lom ang khünaknu ku hato nguile.

¹⁶Chemtue mixhuak anyi bama tsai-kax laile changüihex, hwom ku hato nguiüi, ilaxle opupu supuix ija kue tix fünle faüi. JOWANPA kaxtombu hia wanlombu hwom hama kue tix apuale koxüi.”

¹⁷Ijama Jethro-e lan: “Nange ija olom changle mokkya münchang.

¹⁸Ile chang koxle nangchu tamchu khünaknu chu nale shuüi. Nang tatae mok angkya ija a huanu changpu.

¹⁹Athaxpi kue nang hama müikya olom muale apuale fahüiang, ilaxle JOWANPA nang füi tüiüi. Khünaknu noknu mün ma JOWANPA pomtho ma ajong angkya tamchu hwom bama tsai-kax laikya zangwün chix hato apüi angkya nang mwot jaojao changle.

²⁰Nange hwom hama, hwom chemle ngoüi tamchu hwome chem moküi, ibu bama, JOWANPA kaxtom nange hwom hama akhix-akhanle ano fa angkya changle.

²¹Ikoxlechu ito bole, mokle tho-angkya khünakbu zünlaxle nange hwom a khünaknu lompabu ang zinglax; züizüi a ojat thakma azüi ang, züizüi a oho thakma azüi ang, iningle punyi-bün hia bün thakma azüi ang tomkox. Hwom a Zang thua zakyabu, owa to mongong ang tsuakle tüipuix, tamchu huxkün-lopmong chitüikya mix chang koxle müiüi.

²²Ibu a jento khünaknu kaxfün mixbu ang naxngo. Hwome chithünkya tsai-kax ibue nang hato apüiüi, ikoxlechu muakya zangwünbu a hwom lualua to hwome azutle tsuaküi. Ile chang koxle hwom bama hünlit lax angkya nang zongto ochwon ang changüi.

²³Nange ija Zang kaxtom ma laxle jangmok thüiningle, nang a itukux aduk-athangle münchangüi, ilaxle ibu khünak zangwün pangwüi müile fün-wünle chang üntoxle mahom to chat ang thoüi.”

²⁴Mosa-e Jethro zünkax-saikax ma lax,

²⁵ilaxle mokle tho tangkya mix Israel khünaknu kha angkya zünle kop. Chixe hwom ang hajat thakma, hota thakma, punyi-bün thakma üntoxle bün thakma apün ang tom.

²⁶Hwome khünakbu hanpakma othuithuima kaxfün mixbu ningle mok. Muakya zangwünbu hwom lailai to azutle lax ikoxle hwome chithünkya zangwün a Mosa hato apüi.

²⁷Ifüima Mosa-e Jethro füi wünzua kax akax, ilaxle Jethro a hwom hom to chat.