Read Wancho Naga Laipao 19 Bible Online

Laipao 19 - Wancho Naga bible

Laipao 19

¹Israel khünakbue Refidim danle tox, ilaxle hwome Ijip danle toxkya füima lyetkua azom lükya pongwang nyix hwom Sinai haxnu sak-hax to ngui. Ikhato hwome Sinai haxnucha ma pom zaile athong.

³Ikhato Mosa a Zang füi apong ang haxnukho to dong. JOWANPAe haxnukho tokhange Mosa nyaklaxle Jakop sixli Israel khünakbu füi ile akax ang tom:

⁴“JOWANPA kue Ijip nok to chempangle mok ilaxle olae hosa a ozangtok ma danle nwonle ahamkya ningle kue hünzom chemle nwonle paopuix üntoxle ikhato ku hato chemle apüipuix ibu pangnu hünzome ngünle hüipu.

⁵Athax, hünzome ku kax ma laxle ku Tsaotsüt otya ma jangthom, hünzom a ku khünakbu ang changüi. Chaxwannu komle ku kux changpu; hünzom a kue zünle kopkya,

⁶ku hanpakma atsaole thomkya khünaknu ang changüi. Zompu-zangpabu ningle hünzome ku thothale changüi.”

⁷Ikhoma Mosa haxnukho tokya julaxle khünaknu lompabu pangwüi sele asoxlaxle JOWANPAe chix hama akaxkya kax komle wünle kox.

⁸Ijama khünaknu pangnue notomle lan: “JOWANPAe chem akax daopuix ibu pangwüi kwome moküi.” Mosa-e ija JOWANPA hama wün.

⁹JOWANPAe Mosa ang thüi: “Ku hünzom hato tüle shixkya zangfwom ma nguiüi; ile kue nang füi zangwünkya khünaknue atatle laxüi üntoxle imakhange hwome nang to mongongkya tüiüi.” Mosa-e khünaknu kaxlan JOWANPA hama apua.

¹⁰Ilaxle JOWANPAe chix ang thüi: “Khünaknu hato paolaxle, anyix hia ngainyix a zangshwom angkya hanpakma malualua to atsaole ngobaklax thüikox. Hwome hwom nyizabu so angkya changle

¹¹ilaxle hopnyix a achwon-athale changüi. Ija nyix ku Sinai haxnu ma juüi. Ikhato khünaknu pangnusae ku ngün ang kopüi.

¹²Haxnu akhople khünaknue chikai angkya longzi tit, ilaxle khünaknu ang haxnu to chinga angkya tamchu ija hozui tojao chisox angkya akaxkox. Owawae ija to cha füi tingle jangchang, chix a mik max ang tomüi.

¹³Ija khünak to long füi thupüi chichangba san füi hapüi. Chix to owaechu chitwonüi. Ija wanlom a müi-hi-mix pangnu hanpak ang ngoüi. Ijama thaile achangchang mik max ang tomüi. Ikoxle chemtue nyazong mütüihex, hünzom khünaknu pangwüi haxnukho to dong angkya changle.”

¹⁴Ifüima Mosa haxnukho tokya julaxle khünaknu ang zangshwom angkya hanpakma achwon angkya kax kox. Ikhoma khünaknu pangwüi manyi mazaza sole achwon.

¹⁵Mosa-e hwom ang thüi: “Hopnyix a zangshwom ang achwonlax ilaxle ibaba ma sheko-lüka tomle jip-pomle taxchang.”

¹⁶Nyix azom lükya anopningle zangtsak-zangdung hüi; tüle shixkya zangfwom tuita haxnukho to lai üntoxle tüle zongkya nyazong mütkya ozing atat ang kop. Pom ma tüikya khünaknu pangwüi za.

¹⁷Zang füi apong ang Mosa-e pom mong tokya homtho to zunle alai; ile hwom haxnucha ma ajongle ngo.

¹⁸Sinai haxnu to bakle wünkhut füi tukle kop; ile JOWANPA ija ding ma wün füi ju. Wünkhut a tsanzok wünchao lailaile dong, Khünaknu a tüle abünle za.

¹⁹Nyazong zing süzong süzongle zong. Mosa-e akax ilaxle Zang-e zangdung füi chix kax to lan.

²⁰Sinai haxnukho to JOWANPA ju ilaxle ija haxnukho to Mosa nyakle dün.

²¹Mosa ikhato dong. JOWANPAe chix ang thüi: “Ku to hu angle longzi akaile chihüi angkya bama julaxle khünaknu ang kaxkhün koxle changkox. Longzi kaile jangchang thüiningle khünak ibu a zi angkya changle.

²²Ku hato hüikya zompu-zangpabu ngaxchu hwom malualua to atsaole kop angkya changle. Ile chichang thüiningle kue hwom to sikangünüi.”

²³Mosa-e JOWANPA ang thüi: “Khünaknu dong ang münthoüi chemthüikoxle nange kwom ang ija haxnu a tuita otsao haxnu changle le e-angkya kaxtom koxdaokya tüikoxle ilaxle ija akhople, ija chikai angkya longzi titkya tüile.”

²⁴JOWANPAe lan: “Julax, ilaxle nang füi tomle Arun dünhüi. Ikoxlechu zompu-zangpabu hia mama khünaknu a ku hato ija longzi akaile chihüiüi; ile jangchang thüiningle kue hwom ang sikngün apong ang tomüi.”

²⁵Mosa ju ilaxle JOWANPAe chix füi akaxkya pangwüi khünaknu hama wün.