Read Wancho Naga Laipao 2 Bible Online

Laipao 2 - Wancho Naga bible

Laipao 2

¹Ipongma Liwi sün tuitae Liwi cha wüi lax.

²Ija mixcha ma naotüi ilaxle sasün tuita pux. She-e ija naosa müiwüi müile ngünlaxle lyetkua azom pyenle thom.

³Chemtue ija naosa pyenle thom ang chithole tsongle hüipuix, she-e chix hanpak ang acha füi khong tuita walaxle ti chidong angkya hanpakma nüie atsamle among. Ikhama she-e ija naosa dan ilaxle ija khong shuakax ma acha tham khato danle tox.

⁴Hona a chix to chemle chang-changle cha tokhange hule ajongle ngo.

⁵Farao sacha wangchasa ija shuakha to ti-ajo ang ju. Ipongma she dachabu a shuakax to ahamle ngo. She-e acha tham to ija khong ngünle lax. She-e dacha tuita tsanle ija apüi ang tom.

⁶She-e ija dale hukoxle ikhama lüka naosa tuita ngünle lax. Ija naosa sop ilaxle she-e chix to mongkünle thüt. She-e thüi: “Ija a Ibri naosa tuita changüi.”

⁷Ofüima naosa hona hüilaxle Farao sacha ang thüi: “Ija nao to humele atsün ang kue Ibri sheko owawa lomle apüi ang cha?”

⁸Farao sachae she ang thüi: “Changle, apüihüi.” Ija shekosa pao ilaxle naosa honu sele apüile kox.

⁹Wangchasae she ang thüi: “Ija nao koplax üntoxle kue lax ang humele atsünkox, kue nang ang otha koxüi.” Idaile ija mixchae ija naosa lax üntoxle humele atsün.

¹⁰Chemtue ija naosa tsongle hüipuix, she-e ija naosa wangchasa hato apüile kox. She-e ija nao masa ningle lax. She-e ija nao ang Mosa le mün kox ilaxle thüi: “Chix a kue tikha tokya tswonle kopkya changle.”

¹¹Mosa mixmüi ang achangle tsongkya füima nyixta, chix mamixbu hato pao ilaxle hwom ang mwot atsangle amok ngokya ngün ang kop. Chixe Ijip sün tuitae Ibri sün tuita to fitle ngokya ngünlelax. Ija Ibri sün a chix füikya mamix tuita changkya.

¹²Chixe nong-tsax to hu ikoxle owachu chingün. Ile changpongma chixe Ijip sün ija langlaxle sak khato akhünle tox.

¹³Anaole ofüinyix laikya zuma, chixe Ibri sün anyi ahele ngokya ngünlelax. Chixe süthaile ngünkya mixsün füi akaxle thüi: “Nange hünzuipa Ibri sün to büthüikoxle chakmokpu?”

¹⁴Ija mixsüne lan: “Nang a kukhi thakma apünkya mix ang tamchu kaxfün fa-angkya mix ang owae zing? Nange ku chuwüi Ijip sün langkya ningle langse tsupia?” Ifüima Mosa za ilaxle ajang: “Kue mix langkya noke atatdaoa.”

¹⁵Chemtue Farao-e ija atatle laxpuix, chixe Mosa lang ang lom. Ikoxlechu Mosa a Farao chak tokya paole azang. Chix a Midi nok to ngo. Ikhato chix tüküi tüikya zui ma ngo.

¹⁶Midi nok zompu-zangpa ang sacha hwom tüikya. Ikhato hwom tikho ang hüi ilaxle tikkux awangle tikholaxle müibu ang ti aling angle hüi.

¹⁷Ikoxle züizüi chun-nyetmixbu hüilaxle hwom dyetle apao. Mosa hüilaxle hwom khose ilaxle müibu ang ti alingle kox.

¹⁸Chemtue hwom hopa Reuel hato chatle changpuix, chixe thüi: “Büthüipu, anyix büthüikoxle chwonle chatpu?”

¹⁹Hwome lan: “Ijip sün tuita chun-nyetmixbu chak tokya kwom kho-awale kopwüi; chixe tix kwom ang ti khole koxpu ilaxle müibu angchu alingle changpu.”

²⁰Chixe sasün hwom ma atüi: “Ikoxle chix a ongkha to tüi? Hünzome chix büthüikoxle dantox? Chix a fongsax ang se-kox.”

²¹Mosa ija mixsün füi ngo ang mongtsu. Ija mixsüne chix sacha Ziporah Mosa ma aju-asomle kox.

²²She-e sasün tuita ngün. Mosa-e chix mong-mongto zangwün: “Ija nok to ku a mixnok wünpa tuita idaile kue chix ang Gershom le amünüi.”

²³Namngo ngokya füima Ijip nok wanghompa zile pao. Israel khünaknu a hwom da ang ibu fangto ngolaxle tüle nuzao ikhoma akhongle sop. Ile da tuita chifün ma ngolaxle hwom to asunfale hwom sopkya ozing Zang ha alop.

²⁴Zang-e hwom mongsople nuzaokya ozing atat ilaxle chixe Abraham, Isak hia Jakop hwom füi Tsaotsüt laxkya texle atak.

²⁵Zang-e Israel khünaknu to hule ano ilaxle chixe hwom sikngünkya chifün awanle lax.